SRAT DI PAULUS PAS
MEM MBUSYAMEI EI MINU NDIG
KOLOSE
NIHYET GI BIBIE TUT
Minu ndig Kolose jo ei Asia Mienti ba, jo kilometer muhwi leu minu ndig Efesus di jo bei mpia nicutti. Paulus nonti ta mbusyamei dima ei minu ndig Kolose bi. Noro tirigi noni yai midyai ei minu ndig Efesus di nok nibousi mem hanjop nsi di nibou ndig Roma ninyeng tak kep dima lene noni cuk Allah de awak nya ibou poi ba, yuug ei minu ndig Kolose leu binhyepo ipingok kep yo di mbusyamei ingonti. Paulus miap tut guru nitrowai nya ibou poi di ingat rin ei minu ndig Kolose di ibrim ighyet eisi bipai <<suar yo di ingon jo kep nya ikuk yok bak ninnei di inyeng tak kep nya kin nisindemti nya ei mpia-bbed him>> ba, ibiyai niteu leu sisarti kin niyaijo nijep titut yam. Ba, guru dima yok itri tut bipia suar yo di ingon jo kep nya icoi bit bibindei mbut midut sunat kin nicuk yokti nya tut njita di ipigig sut.
Paulus pas Srat Mem Mbusyamei Ei Minu Ndig Kolose leu binhyepo ba Kristus ningginausi di nijit bisrep tut guru nitrowai nya ighyet di bindei srawir yo di ingon jo kep nya. Ningat ne Yesus Kristus sindem mem gima teu tungwatu nya leu sisar biyai niyaijo nijep di kei-kau biyok ba, ningginausi hiter kin midut di sindem bi mibindei mbres yok leu Kristus. Allah pai tes dihyeisi dini tug hon Kristus ba, Noni mibindei dihyeisi bitut tungwatu nya ingon kwes kin Noni hanyen tug hon Kristus. Bon tungwatu dihyeisi dini igyok ngon mem gima igyai niteu leu sisarti kin niyaijo nijep tug hon Kristus Nongkom he. Paulus ngginau yok tut ide ninok gom kin Kristusti di bindei ba, igyai munti nya di kei bibor mintun yoni him.
Ma igyok ngon kep bipia Tikhikus di pwoi srat dini buug sut ug ei minu ndig Kolose dima hei sut Onesimus di Paulus pinak bingkwei hanyen bikuk no bak niceu di Filemon ei minu ndig Kolose bipwoi srat nimbrap gau Onesimusti di Paulus pas bak Filemon.
Nirop Ninda Ndigsi
Paulus pigo yo di mbusyamei nya ei minu ndig Kolose 1:1-8
Kristus ningon mien paisi kin niyai munti nya 1:9--2:19
Niyaijo nijep tug hon Kristus 2:20--4:6
Paulus kes nihyet hon bipigo yok 4:7-18