SRAT DI PAULUS PAS
MEM MBUSYAMEI EI MINU NDIG
FILIPI
NIHYET GI BIBIE TUT
Paulus ta mbusyamei minu ndig Filipi ei Eropa bibie leu mbusyamei nindigsi nya. Minu ndig Filipi jo ei hanjop Makedonia di nibou ndig Roma ninyeng tak kep. Paulus pas kep Srat Mem Mbusyamei Ei Minu Ndig Filipi tirigi noni sima ei ig bui nsi. Mpe dima lene ningon buhun tut Allah De awak nya ibou poi ei minu ndig Filipi kin ibou poi bu di iba ide ningginausi bibindei srawir yo di mbusyamei. Mbro nok gima lo, srat dini tibim tut Paulus de ningon llei biborti kin nide niba ningon com mbusyamei dimati. Mindei ribindei dino Paulus ningon a tut mbusyamei dima nok i? Nide niba ningon com Kristus nindig biborti rino bindei a.
Paulus pas srat dini lewo gi nimbie him ngat noni pai sigyo bak yo di mbusyamei ei minu ndig Filipi tut munkwas di yoni ibahati tut noni tirigi mun di buhun cut igkep noni. Gini bon nituti mem noni pingok ingonti leu binhyepo ibrim ingkek ba, ingon nddong tut mun di buhun di cut igkep yok. Noni tigtai yok leu binhyepo iba ibou coi mem yam bit leu nok Yesus di ba nibou coi. Iba ingon di jei biyai inyeng mang ba, ikan tut yonti he au. Noni pingok ingonti tut Allah nisingat tut yokti he di bindei ba, inok gom kin Kristus tug hon ide niba ningon com Noti. Inok gom kin Kristus tug hon nicoi bit midut di ntun Puig Yahudi niggai serti him bi. Lene Paulus pas kep tut ningon leisi kin ningon jo nyahanti di Allah yai bak yo di inok gom kin Kristus.
Paulus ba srat dini bisum nihyet ei mun di bon ninyeng mem yo di inggre kin mbusyamei. Mun dima ne ningon llei biborti kin ningon nddongti kin ningon kwes kin yamti kin nita nibou ei ninyohou niba ningon com Kristusti kin niyai munti di kei biborti nya nok yo di Kresten di nijit nya. Srat dini mbot kep tut Paulus di ningon ngakei yo di inggre kin mbusyamei minu ndig Filipi nindig bibor cem.
Nirop Ninda Ndigsi
Paulus pigo mbusyamei minu ndig Filipi 1:1-11
Tut mun di pek kep mem Paulus nonti 1:12-26
Yo di Kresten igyaijo nok gom kin Kristus 1:27--2:18
Paulus ningon kanti mem Timotius kin Epafroditus 2:19-30
Paulus sok kep yok tut siceu nya di ingat rin ei nisai kin ikieti 3:1--4:9
Paulus pai sigyo bak yo di mbusyamei nya 4:10-20
Paulus pas kep gi ningwigsi 4:21-23