SRAT DI PAULUS PAS
MEM MBUSYAMEI EI MINU NDIG
EFESUS
NIHYET GI BIBIE TUT
Ei Srat Mem Mbusyamei Ei Minu Ndig Efesus ne Paulus tri tut Allah ningon kanti dini <<Allah nipai testi ei gwamti kin dihyeisi dini hagom mibicim tindei yam nok gom ei Kristusti ba, Noni nok nibou mem hagom>> (1:10). Tug hon srat dini lene Paulus tigtai Allah de limwa nya leu binhyepo iba igyai munti nya bahati tut Allah ningon kanti. Ba, ningon kanti dini ne Allah de limwa nya yahagom inok gom kin yam tug hon ide ninok gom kin Yesus Kristusti ri.
Srat Efesus nitriti ndo brei binye tut notou inok gom kin yam. Paulus nyohou ngginau nye tut notou Icig Allah hig Nide limwa nya kwei kin notou Allah kos ser ide sisar bikwek yok leu sisar nisindemti tug hon Nipmot Yesus Kristus kin notou Allah tak buk kep Nide nipreu ei mem Nide limwa nyati tug hon Nonti Ninnei cem. Ei hanjop nsi gi nican lene Paulus tigtai yo di ikwop kep srat dini leu binhyepo ingon kwes kin yam ba, igyaijo nok gom kin Kristus tug hon ide niba ningon com Noti.
Paulus ba nihyet nibiti ninda gom-gom bindo brei biyok bipia Allah de limwa nya inok gom kin yam lewo inok gom kin Kristus. Mbusyamei nok ningut gom ba, Kristus nok nibou mem ningut dima cem mbusyamei nok ig lene Kristus nok ig dima nikiou cem mbusyamei tereu nok no di sop ba, Kristus tereu nok sop dima nijjep. Paulus ningon kei bibor tirigi yok ngon kep Allah nisingat tut tungwatu nyati tug hon Kristus lene gima bindei ba, nipas kepti nya ndo brei biyok bipia ningon mpung bipihas hagau tut nipai sigyoti kin ninggei sut Allahti. Paulus ba ningon di mpung tut Kristus ningon ngakei nyeti kin nimai ei biei salibti kin nikos ser ide sisarti kin nisingat tut nyeti kin ningon di kwes-kwausi bimian ser mun di pek kep mem yo di ingon jo kep nya yahagom.
Nirop Ninda Ndigsi
Paulus pigo mbusyamei ei minu ndig Efesus 1:1-2
Kristus kin Nide mbusyamei 1:3--3:21
Niyaijo di nijep bu drek dip gi inok yo di Kresten 4:1--6:20
Paulus pas kep gi ningwigsi 6:21-24