Nisindemti nya di Allah Ninnei yai binye
12
1 Nogindini dibuhup jide srat di bitut Allah Ninnei de nisindemti nya. Tut gima ne dijoi sut jingon dorti tut ningginausi di nijit-jau nya. 2 Jikan tut bipia tirigi jingon tindur yo ne kwar di ibon innei bi nya iris jeni ei nikineisi ba, jisrawir. 3 Suar jiyok ngon kep bipia gino Allah Ninnei bie tut tungwagom lene bit bon noni rom nihyet kui Yesus kan bi. Ba, gino Allah Ninnei bie tut tungwagom bi lene bit bon noni pai <<Yesus ne Tuhan rin>> kan bi.4 Nisindemti nya di Allah Ninnei yai binyeni ter leu yam noro hagom ntun Allah Ninnei gom ngat him. 5 Midyai di Tuhan ndo binyeni nya ter leu yam noro nyeni igyai midyai dima hagom mem Tuhan Yesus gom ngat. 6 Nyeni igyai midyai dima tug hon nisinati di ter leu yam noro hagom ntun Allah gom ngat him ba, Noni sindem tut bikwop tungwagom-gom. 7 Allah yai mun di bindo tut Allah Ninnei di ningat rin ei bikwop tungwatu nya ingonti biyok leu binhyepo yo di mbusyamei nya ibimpu yam. 8 Allah Ninnei yai nisindemti hi bak tungwagom leu binhyepo tungwagom dima ba ningon di ki bitri tut nihyet. Allah Ninnei gom ndia yai nisindemti hi bak tungwa hiter bu leu binhyepo tungwa hiter dima ba ningon di dorti bindim ningan bram. 9 Allah Ninnei gom ndia yai nisindemti hi di dor tunggwei bak tungwa hiter leu binhyepo tungwa hiter dima ba ningon com Kristus. Ba, Noni yai nisindemti hi bak tungwa hiter leu binhyepo tungwa hiter dima ninda kan ba, ba ninda kanti dima bimpu yo di inggwen nya bikei hanyen. 10 Allah Ninnei yai nisindemti hi bak tungwa hiter leu binhyepo tungwa hiter dima bibon mindur. Noni yai nisindemti hi bak tungwa hiter leu binhyepo tungwa hiter dima bitri tut Allah ningon kanti. Noni yai nisindemti hi bak tungwa hiter leu binhyepo tungwa hiter dima bimig mbus nisindemti nya di ntun Allah Ninnei him leu nisindemti di ntun Allah Ninnei him bi nya. Noni yai nisindemti hi bak tungwa hiter leu binhyepo tungwa hiter dima ba nihyet mindur nya bimbrap. Noni yai nisindemti hi bak tungwa hiter leu binhyepo tungwa hiter dima biluei nihyet mindur dima hanyen brei bak tungwatu nya. 11 Nisindemti dini yok hagom ntun Allah Ninnei gom ngat him ba, Noni ba nisindemti di ter leu yam dima bisindem tut tungwagom-gom bit leu ningon kanti.
Nimbumbati nya hagom ntun ningut gom ngat him
12 Kristus ningut noyam kin nye di tungwatu ingut di bon nimbumbati mang bibor. Mbro nok gino ingut bon nimbumbati mang bibor lo, hagom bicim tindei yam nok ningut gom ngat. 13 Nok gima tut nyeni yahagom cem. Mben Yahudi kin ngkiai nya ba, awak nya kin yo di igyai inyeng nya cem yahagom igyai nitur nye ei minyeiti di bindei ba, ibicim tindei Kristus tug hon Allah Ninnei gom dima. Allah bindei ba, Allah Ninnei gom dima coi kwei ei nyeni yahagom ingonti tu.
14 Ningut dima bon nititnon he bi noro bon nimbumbati mang bibor. 15 Gino nimig pai <<Nnaba dani ne ninda rin bi. Gima rino dani dintun ningut him bi.>> Nipaisi dima bindo bipia nimig ntun ningut dima him bi e? E bi! 16 Gino nitingou meng pai <<Nnaba dani ne niyai njep rin bi. Gima rino dintun ningut him bi.>> Nipaisi dima bindo bipia nitingou meng ntun ningut dima him bi e? E bi! 17 Gino ningut titut yam nok niyai njep he lene miba mindei bimiap mpia i? Gino ningut titut yam nok nitingou meng he lene miba mindei bitinip mun nghap i? 18 Noro Allah nyohou dimig nimbumbati hagom bintun ningut him bit leu ningon kanti. 19 Gino ningut dima hagom nok nimbumbati ninyeng gom ngat he lene bon ningut di haigtu bi. 20 Gima rino nimbumbati mang bibor nonaha lo, hagom ntun yam him nok ningut gom ngat he.
21 Gima rino dem tut gima niyai njep pai bak ninda <<Disuar na bi e?>> E bi! Dem tut gima nibou pai bak nimig <<Disuar na bi e?>> E bi! 22 Noro isuar nimbumbati di tungwatu nya ikan bipia mbriong cem. 23 Inyohou nimbumbati di tungwatu nya ikan bipia bon ninyeng bi nya ba, inyohou juk sinsun ser nimbumbati di immai joti nya cem. 24 Noro inyohou juk sinsun ser nimbumbati di tungwatu nya ingat di kei su nya bi. Allah cim nimbumbati hagom bintun ingut him tug hon gi ijuk sinsun ser nimbumbati di bon ninyeng bi nya bijo coi sinsun di nggai ser nya. 25 Leu binhyepo nimbumbati nya iba nitok biyam bi noro yahagom yahati tut yam sur yam. 26 Gino nimbumbati gom ninghuisi wei lene wei bitut nindigsi nya cem ba, yahagom inghuisi wei. Gino hi nggei sut nimbumbati gom lene bitut nindigsi nya cem bibindei hagom ingon llei bibor bit.
27 Jahagom sok yam ne Kristus ningut rin ba, bikwop tungwagom-gom noyam kin nimbumbati di nggre kin ningut. 28 Nok gima cem Allah ta nimbumbati hagom bintun mbusyamei nya him bit leu ningon kanti. Noni ta yo di igya kui Yesus bigya bibie. Leu api ta yo di imbot kep tut Allah ningon kanti abia kep yok bu. Leu api ta guru nya abia kep yok bu. Leu api ta yo di ibon mindur nya kin yo di ibindei yo inggwen nya ikei hanyen kin yo di ingondut nuhui mbum nya kin yo di ibie tut tungwatu nya kin yo di iba nihyet mindur bimbrap nya cem yahagom ei mbusyameisi. 29 Yoni yahagom inok yo di igya kui Kristus rin e? Yoni yahagom inok yo di imbot kep tut Allah ningon kanti rin e? Yoni yahagom inok guru nya rin e? Yoni yahagom inok yo di ibon mindur nya rin e? 30 Yoni yahagom inok yo di ibindei yo di inggwen nya ikei hanyen rin e? Yoni yahagom inok yo di imbrap nihyet mindur nya rin e? Yoni yahagom inok yo di iluei nihyet mindur dima hanyen brei bak tungwatu nya rin e? E bi! 31 Gima rino ma juhuk bram nisindemti nya di bon ninyeng dor njiriek mem jenti.
Mbro nok gima lo, dindo puig di kei bibor kei dor njiriek bije.