SRAT DI PAULUS PAS
MEM MBUSYAMEI EI MINU NDIG
ROMA
NIHYET GI BIBIE TUT
Paulus pas srat Roma bak mbusyamei nya ei minu ndig Roma leu binhyepo itin ei mem noni tirigi ug ngat yok ei nidipti bu. Noni kos tut bipia miyai midyai ei yo di ingon jo kep nya ikieti ei Roma mem nijam poi leu api ug kikau minu Spanyol gino mbusyamei nya ei Roma yahati tut noni. Paulus pas srat dini bingginau yok tut Allah nicuk nyeti nya hagom leu binhyepo yoni igyaijo bit leu Allah ningon kanti mem yok.
Niabiati Paulus pigo yo di inggre kin mbusyamei ei Roma bipai biyok bipia ngat nadi kikau mem yok lene noni ndat kep tut ayat gom di bon ninyeng ei srat diniti: <<Lewo Nihyet Di Kei mbot kep tut nisinati tut Allah nibiyai tungwatu nya ingon kwes kin Noniti. Nisinati tug hon ide niba ningon com Noniti ei nimbie him kikau ug bipek ningwigsi kep>> (1:17).
Niabiati bu ne Paulus nyohou ngginau yok tut ayat dima. Suar mben Yahudi kin ngkiai nya yahagom igyai ingon di kwes kin Allah hanyen lewo sisar nisindemti om kep yahagom noyam. Gino tungwatu nya iba ingon com Yesus Kristus lene yoni migyai ingon di kwes kin Allah hanyen bu. Leu api Paulus ngginau yok tut niyaijo nijep di mipek kep mem tungwatu nya gino inok gom kin Kristus. Niyaijo nijep dima kum ei nisindemti bu tug hon ide ningon di kwes kin Allahti. No di ningon jo kep Yesus ningon kwes kin Allah leu api Allah Ninnei kwek no dima leu sisar kin nimai eisi nisindemti. Tug hon pasar 5-8 Paulus ndo Allah ningon kanti tut Allah nikos tutti nya kin Allah Ninnei de nisindemti ei yo di ingon jo kep nya ide niyaijoti. Leu api Paulus mbot kep tut mben Yahudi kin ngkiai nya ide nibicim tindei Allah ningon kanti mem tungwatuti. Paulus rop ninda ndigsi tut mben Yahudi ide nikou sut Yesusti bit leu Allah ningon kanti mem yok leu binhyepo bon nituti mem Noni ba nisingat tut tungwatu nyati bimpu ngkiai nya tug hon Yesus Kristus. Paulus ningon ngkiem tut bipia mben Yahudi mikou sut Yesus kikau bi. Ei srat Roma ninggrupti ne Paulus pingok yo di mbusyamei ei minu ndig Roma ingonti tut yo di Kresten igyaijo nijepti ba, gi bon ninyeng mem yok rino suar ita ibou ei ningondut yo di hiterti. Tut gima ne Paulus nyohou pingok ingonti leu binhyepo ibon yonti nok awak mem Allah ba, ice tut bibit nibou pemerinta nya icuk yokti nya lene suar ingondut isut bat yo di Kresten bibirop yo dima ide ningon kiowi tut ingon mienti cem. Paulus pas kep srat ningwigsi bikes hon mem yok tug hon nipigo nisut bat nyati kin ninggei sut Allahti cem.
Nirop Ninda Ndigsi
Paulus pigo yo di inggre kin mbusyamei nya ei minu ndig Roma 1:1-17
Tungwatu nya isuar niteu leu sisarti kin niyaijo nijepti 1:18--3:20
Allah de puig di bie ndam niteu leu sisarti kin niyaijo nijepti 3:21--4:25
Niyaijo nijep ntun him ide ninok gom kin Kristusti 5:1--8:39
Allah ningon kanti mem mben Israel 9:1--11:36
Yo di Kresten igyai kepti di igbit nya 12:1--15:13
Srat ningwigsi bitut Paulus nipigo yokti 15:14--16:27