KISAH TUT RASUL NYA
NIHYET GI BIBIE TUT
Srat Kisah Tut Rasul Nya binut Nihyet Di Kei Di Lukas Pas Kep. Lukas ningon kanti mem srat dini ndo brei sut notou yo di ibit Yesus itri tut Nihyet Di Kei tut Yesus ei minu ndig Yerusalem kin hanjop Yudea kin Samaria hagom kikau ug bipek minu nohon keti bit leu nok Allah Ninnei bie tut yok. Srat dini pui sut Ninjei Bit Krestenti di ntun mben Yahudi him leu api kieng kep dihyei nisurti-nipekti. No di pas kep srat dini joi sut gima yo di ikwop kep nya ikan tut bipia yo di ingon jo kep Yesus inok nimpung di injei siceu nya bisrep tut nibou ndig Roma ninyeng di tak kep nide limwa nya bi. Noro ikan tut bipia Ninjei Bit Krestenti dini ne mun di kei-kau di luei Ningginau Yahuditi di kei haigtu bi dima ri.
Srat Kisah Tut Rasul Nya bon nide hanjop nsi ningai di pui sut Nihyet Di Kei tut Yesus nintek gimahapti kin Allah Ninnei nita mbusyamei nyati bidem minu cem. (1) Leu nimbie him tirigi Ninjei Bit Krestenti kieng kep minu ndig Yerusalem niabiati Yesus kui ug ei gwamti leusi. (2) Ninjei Bit Krestenti kieng kep hanjop nsi nindigsi nya ei minu Palestina. (3) Ninjei Bit Krestenti kieng kep minu nindigsi nya di jo tai Muk Hacan kikau ug ei minu ndig Roma.
Mun nyeng gom di bon ninyeng ei srat Kisah Tut Rasul Nya rino midyai di Allah Ninnei yai niabiati Noni srek kwei bisindem tut yo di ingon jo kep nya ei minu ndig Yerusalem mem njap Pentakosta. Jo nibreisi bipia Allah Ninnei bie tut bisindem tut mbusyamei bitut nibou mbusyamei nya bikwop mmun-njap mem mun di yuum bit leu nok srat dini pui sut binyeti. Nihyet tut Ninjei Bit Krestenti ei nijam gi nimbie him ngat dini lene irop ninda ndigsi tut ei nitri tut nihyet poisi. Lukas pas kep nihyet di nibou nya itri tut di tibim ei yuhui him mang bibor ei srat diniti. Ba, nihyet dima sindem tut yo di ingon jo kep nya kin yo di inggre kin mbusyamei ide nitig mbier tut yam ei Kristusti cem.
Nirop Ninda Ndigsi
Itin ei mem gima itri tut Nihyet Di Kei 1:1-26
a. Tuhan Yesus nicuk yo di igya kui Noni ningwigsi kin nipreu ei mem yokti 1:1-14
b. Idimig no di ya luei Yudas nohoti 1:15-26
Itri tut Nihyet Di Kei ei minu ndig Yerusalem 2:1--8:3
Itri tut Nihyet Di Kei ei hanjop Yudea kin Samaria 8:4--12:25
Paulus de midyai 13:1--28:31
a. Paulus nimbutti gi nigom mem gima tri tut Nihyet Di Kei 13:1--14:28
b. Nibou mbusyamei nya isimbot kep biyam ei minu ndig Yerusalem 15:1-35
c. Paulus nimbutti gi nican mem gima tri tut Nihyet Di Kei 15:36--18:22
d. Paulus nimbutti gi niningai mem gima tri tut Nihyet Di Kei 18:23--21:16
e. Paulus sima ei ig bui nsi ei minu ndig Yerusalem kin Kaisaria kin Roma 21:17--28:31