NIHYET DI KEI DI
YOHANES
PAS KEP
NIHYET GI BIBIE TUT
Nihyet Di Kei Di Yohanes Pas Kep ndo bipia Yesus ne Allah Nihyet di jo ninno bijo kikau ri. Ba, Nihyet dima luei nitta binok tungwatu lene kwei bong bit nye. Bit leu nok gi jo ei srat diniti ba, Yohanes pas Nihyet Di Kei dini leu binhyepo yo di ikwop kep nipas kepti nya ingon jo kep bipia Yesus ne Nibou Ndig di teu tungwatu leu sisar biyai niyaijo nijep biyok di Allah preu ei mem yok ba, Noni ne Allah Nipmot ri. Tungwatu nya igyai niyaijo nijep tug hon ide niba ningon com Noniti (20:13).
Srat dini nitriti ndo bipia Allah Nihyet di jo ninno bijo kikau dima ne Yesus rin ba, hanjop nsi mang bibor pui sut mindur di Noni bibon nya. Mindur dima ndo brei bipia Yesus ne Nibou Ndig di teu tungwatu nya leu sisar biyai niyaijo nijep biyok di Allah preu ei mem tungwatu nya ri. Noni ne Allah Nipmot ri. Bikwop mindur di Tuhan Yesus bibon di ipui sut nya bitut gi Noni kin tungwatu nya ihig yam nyen nya jo ei srat diniti. Ide nihig yamti dima ribindei dino mindur ningginausi nya jo nibreisi. Hanjop nsi dima ndo binye bipia bihi ingon jo kep Yesus bigya kui Noni noro hiter isrep tut Noni ba, ingon jo kep bi. Pasar 13-17 pui sut notou Yesus kin yo di igya kui Noni inok gom kin yam nipou tirigi yo di imbuk nya injei bikat Noni mem mmun bigyo. Pasar dima pui sut notou Yesus pingok ingonti bibiwin kep ingonti cem mem mmun dima. Lene ninggrupti pui sut notou ikat Yesus bibindei sima Noni leu api ipek Noni kin biei salib kin nikiju hanyen leu nimai eisi bindo Nonti brei bak yo di ibit Noni gi niabiati kiju hanyen leu nimai eisi tu.
Hanjop nsi gom tut sop di cut ei sisar nicut tut yamti (8:1-11) ne jo ei nibikrop serti ninsi lewo hanjop nsi dima jo ei srat nipas ei ninda him nibokti kin terjemahan nijam nitimieiti bi.
Yohanes huk nihyet ei nide sratti tut mun di kei-kau di Allah yai binye tug hon Kristus. Mun dima ne niyaijo nijep di jo kikau ri. Noni yai mun di kei dima binye tirigi ingat rin ei dihyeisi dini. Niyaijo nijep di jo kikau mipek kep mem yo di ingon jo kep bipia Yesus ne puig di bie ndam Allah bindo Allah brei binye cem ri. Nongkom ne niyaijo nijep nibousi ri. Mun di bon ninggap leusi rino Yohanes ba mun di ntun dihyeisi dini him bingginau tungwatu nya tut mun di bit bon pror hanyen bi. Bihi rinok minyei kin roti kin nipigati kin gembala nya bitut domba di ide nya kin biei anggur bitut ningat cem.
Nirop Ninda Ndigsi
Nihyet di bindei dino tungwatu nya igyai niyaijo nijep 1:1-18
Yohanes di tur tungwatu nya ei minyeiti kin yo di igya kui Yesus bibie nya 1:19-51
Yesus yai midyai ei tungwatu nya igyai him 2:1--12:50
Yesus de njap gi ningwig honti nya ei minu ndig Yerusalem kin minu mien di gahai nya 13:1--19:42
Yesus nikiju hanyen leu nimai eisi kin nindo Nonti bak tungwatu nyati 20:1-31
Yesus ndo Nonti brei ei hanjop Galilea mbigom kin bu 21:1-25