NIHYET DI KEI DI
LUKAS
PAS KEP
NIHYET GI BIBIE TUT
Nihyet Di Kei Di Lukas Pas Kep ndo Yesus nok Nibou Ndig di teu tungwatu nya leu sisar biyai niyaijo nijep biyok di Allah preu ei mem mben Israel kin tungwatu dihyeisi dini hagom cem. Lukas pui sut ei srat diniti bipia Allah Ninnei kes midyai nitri tut Nihyet Di Kei leu Allah bak Yesus leu binhyepo Noni tri tut bak yo di yuhui mbum nya. Nihyet Di Kei dini mpung tut ayat di bipingok yo di ingon buhun nya ingonti. Nihyet di biyai ingon di llei jo ei srat Lukasti ba, ei nitriti pui sut Yesus ningwoi-ngwoi lene ei ninggrupti pui sut Yesus nikui ug ei gwamti. Noro nipui mun tut Ninjei Bit Krestenti nikijuti kin nikieng kep minu dima nisurti-nipekti niabiati Yesus kui ug ei gwamti leu su ne nitriti jo ei srat Kisah Tut Rasul Nyati. Ba, Lukas pas kep srat dima cem.
Hanjop nsi gi nican kin gi nimuhwindagom (angig ayai kep Nirop Ninda Ndigsi di jo bijehei dini jug) tibim tut ayat mang bibor di jo ei Nihyet Di Kei Di Lukas Pas Kep diniti he. Ayat bihi pui sut malaikatinya di ipai doia kin gembala nya di yuug ngat Yesus ningwoi-ngwoi. Hi kin bu tut Yesus tirigi munggwom yo di coi ei Tuhan De Ig kin nihyet nibiti nindati tut timiei minu ndig Samaria Gom Di Ningon Nggriu kin Pinai Pilei Di Pror cem. Nihyet Di Kei Di Lukas Pas Kep sum nihyet eisi tut nadi kin Ninnei Gi Kwes kin midyai di sop di ibit Yesus igyai kep nya kin Allah nikos ser tungwatu nya ide sisarti cem.
Nirop Ninda Ndigsi
Lukas tri tut ningon kanti 1:1-4
Yohanes kin Yesus isrekti kin nijam dino inok munggwom mien yo 1:5--2:52
Yohanes di tur tungwatu nya ei minyeiti nide midyai 3:1-20
Yesus yai nitur No ei minyeiti leu api Bilis bingon Noni 3:21--4:13
Yesus yai midyai ei mben Galilea ikieti 4:14--9:50
Yesus jo leu Galilea buug ei Yerusalem 9:51--19:27
Ari nitindur gom gi ningwigsi ei Yerusalem kin minu mien di gahai nya 19:28--23:56
Yesus nikiju hanyen leu nimai eisi kin nindo Nonti ningat bak tungwatu nyati kin nikui ug ei gwamti 24:1-53