11
1 Ma jiyai bram diyaisi bit leu nok diyai bram Kristus niyaisiNingginausi tut ninggai kep ser nibou
2 Dinggei sut je lewo jiyok ngon kep mun di dingginau je tut ba, jikrau kep ditde nipingok jeti di ditri tut bije nipou su. 3 Noro dijoi sut jingon dorti tut mun nyeng gom kin bu. Mun dima rino Kristus ninyeng tak kep bibikwop pinai nya yahagom lene no di pinai ninyeng tak kep nitnem lene Allah ninyeng tak kep Kristus. 4 Gima rino no di pinai di ya ei yo di imang bibor yoho bei bingat nadi ba, tri tut Allah nihyet cem lo, nggai kep ser nibou ne no dima binim kep Kristus. 5 No di sop di ya ei yo di imang bibor yoho bei bingat nadi ba, tri tut Allah nihyet cem lo, nggai kep ser nibou bi binim kep nijep. Gima tereu nok ikak nibou nta leu su. 6 Gino noni kou sut nggai kep ser nibou lene ma noni kak nonti nibou nta leu hak ug. Noro gino ikak nibou nta bikos nibou nta leu cem bindei ba, sop nya immai sut yonti lene ma inggai kep ser ibou hak ug. 7 Ma pinai nya inggai kep ser ibou au. Lewo Allah pai tes no di pinai noyam kin Nonti bidat Noti. No di pinai tereu nok kisina di bindo Allah Nonti njem kin nikei-kausi ri. Noro no di sop tereu nok kisina di bindo tut no di pinai nikei-kausi ri. 8 Allah ba no di sop ninggang bipai tes no di pinai bi noro ba no di pinai ninggang bipai tes no di sop. 9 Allah pai tes no di pinai mem gima mpu no di sop bitut mun di bon ninyeng mem noni bi noro Noni pai tes no di sop mem gima mpu no di pinai bitut mun di bon ninyeng mem noni. 10 Gima rino ma no di sop ba mun di binggai kep ser nibou bindo bindo bipia hiter ninyeng tak kep noni leu binhyepo malaikati nya ijoi sut noni. 11 Mbro nok gima lo, Tuhan ba ningon srip huk bipia sop Kresten nya igya biyonti leu pinai nya bigya biyongkom bi ba, pinai Kresten nya igya biyonti leu sop nya bigya biyongkom bi. 12 Mbro nok gino Allah ba no di pinai ninggang bipai tes no di sop habiei ei nimbie him lo, niabiati bu ne sop rino srek tut no di pinai. Ba, yahacem intun Allah di pai tes mun nyeng hagom him.
13 Ma jiba jingon srip huk gini. Dem tut gima sop ngat nadi ei yo di mbusyamei nya yoho bei lo, nggai kep ser nibou bi e? 14 Allah nipai testi ndo brei binye bipia dem tut gima pinai bet nibou nta bijei bi lewo niyaisi dima binim kep noni. 15 Noro no di sop kum ei nuubbuti drek dip gi noni bet nibou nta bijei bindun ser nibou a. 16 Gino hi tte tut munhyet dini lene dipai hak binoni bipia nyeni kin Allah de mbusyamei nindigsi nya nibit niyai kepti gom ngat dini tirigi nidem yam ei ba, niyai kepti hiter leu gima ne hi bi.
Ningginausi tut niki roti kin nidut biei ngat ngeisi
(Mat. 26:26-29; Mrk. 14:22-25; Luk. 22:14-20)
17 Tut mun di jo bijehei dini ne dinggei sut je bi. Jinduk yam ei mem njap nigwam kep ninghuisi lo, jibindei ba, ningat di kei ntun jeni him bi noro ningat di kinei. 18 Nigom ne hi mbot kep tut bida bipia tirigi jinduk yam mem njap nigwam kep ninghuisi lene jide nimpung nya iba nitok biyam. Dikan bipia mun poi di imbot kep bida ne mun di nijit-jau ri. 19 Jo nibreisi bipia nimpung di iba nitok biyam dima intun jide mbusyamei him leu binhyepo jingat yo di ingon gom nya brei bou jiyai him. 20 Mbro nok gino jikan bipia jidem yam mem jiki roti nibiyok ngon kep Tuhan lo, niki roti dima igbit bi. 21 Lewo tirigi jiyem njita lene tungwagom-gom yem kep njita didiyam bibet ningon mem nindigsi nya bi. Apino bihi inggum lo, nindigsi idut ba anggur ngei nindig bipu yok. 22 Mei! Nggon rino jiyai nok i? Jigimbun jide ig mem gima jiyem njita bijidut ba anggur ngei eisi bi e. Nggon rino jibimangkrei Allah de mbusyamei nya ba, jibinim kep yo di yuhui mbum nya i? Dibuhup bije notou i? Dinggei sut jeni e? E bi! Bit bon dinggei sut je kan bi.
23 Lewo ningginau jeti dini kwei leu Tuhan Nonti. Himmun di no dima tri ide Tuhan Yesus ne Noni yai roti nindak gom, 24 bipai sigyo kep bak Allah lene ba ninda biki roti bipai biyok <<Gini ne dingut di dikes ei mem je ri. Ma jiyai bram diyaisi dini ba, jibiyok ngon kep Da.>> 25 Nok gima cem tirigi igyem njita bidem leu su lene Yesus yai gi mokti bipai biyok <<Gi mokti dini ne Allah de gi preu nijep rin ba, dinggrom tak buk ser gi preu dima. Tirigi jidut ei gi mokti dini lene ma jibiyok ngon kep Da.>> 26 Bikwop mpe di jiyem roti bijidut ei gi mokti dini ne jibitri tut Tuhan nimaisi kikau ug bipek nikwei hanyenti kep.
27 Gima rino tungwa tou rino yem kep Tuhan de roti bidut ei Nide gi mokti ugwai-gwai ne no dima bon sisar tut Tuhan ningut kin ninggrom. 28 Gima rino ma bikwop tungwagom-gom mbus nonti ningonti nipou ug e. Leu api yem roti bidut ei gi mokti. 29 Leu gino tungwagom yem roti bidut ei gi mokti lo, yok ngon kep bipia midut dima ket ei Tuhan ningutti bi ne roti kin gi mokti di noni yem bidut dima bindei ba, Allah kes hukum ei noni dip. 30 Tug hon nisinati dima lene jimang bibor jinggwen cem jinghuisi wei cem ba, jibihi mai drek dip. 31 Gino imbus nyenti ingonti nipou ug e lene Allah kes hukum ei nye dip bi. 32 Noro Allah mbus nyeni ingonti bittem nye ser nhyema Noni kes hukum ei nyeni dip bit leu nok gi Noni mikes ei tungwatu dihyeisi dini dip mem nijam ningwig honti bi.
33 Gima rino disut bat jen, tirigi jidem yam ei mem jiki roti nibiyok ngon kep Tuhan ne ma jibet jingon mem yam. 34 Gino tungwagom nggum lene ma yem njita ei ig bei nipou ug e. Tug hon nisinati dima lene jide njap nigwam kep ninghuisi bindei ba, Allah kes hukum ei je dip bi. Tut mun di jingon kiowi eisi nindigsi nya ne midipingok jingonti tut ei mpe dino dihwou ngat je.