7
1 TUHAN pai bu <<Bikwop nituti di ditin ei mem dibindei ba, Ditde limwa Israel ingon kwes hanyen bidiyai nibong kei nigwam keisi hanyen biyok cem lene dingat ide mun di kinei bibor kin ide sisar di ibon nya he. Iris yam bipos ndigban leu tungwatu ei ide ig kin yo di igya-ya nyen kak simpak mem gima ipos ndiyok cem. 2 Wer ingon dorti tut bipia diyok ngon kep mun di kinei bibor di ibon dima yok hagom cem bi sren. Noro ide sisar ngot di ibon nya kieng kep yok apino dingat hagom mungkun kei bou diyai him.>>Yuhum yam nsi ei nibou ndig de ig
3 TUHAN pai <<Limwa nya iba ide niris mun igkeisi kin ide nibon mun di kinei biborti biris ei nibou ndig kin yo di igya kui noniti. 4 Yahagom yuhum yam nsi mem yok lene ingon gom tut yok cem bi. Ide ningon di kinei sut hiterti dem kep hum di nikang roti cig miep binjeng bigyo bibou kioi roti bidwoi mem gima non ei niti ug e ba, gi jo ne hum priot di mbom he. 5 Ei njap ndig di nibou ndig bon pesta ne ibindei ba, noni ya tut yo di igya kui noni idut ba anggur ngei kikau. Gima pu yok bibindei ba, iba ingkek ndok bibon mun di kinei cem. Leu api nibou ndig yai nillei bit yo di yuhum yam nsi mem noni. 6 Yo dima ingon kanti di kinei kin ide niggati dima nimbom drit nyahan ei ingonti mmun jei ba, gima dem kep hum di nimbom drit ei hum kwaisi. Ba, njap tekti lene njeng bidem kep hum njeng di cig-cai di yem tungwatu.
7 Ide niggati di bindei di ingon kui kep nibou di ide nya bindei ba, igyai nimai biyok bigwam-gwam yam dip. Mbro nok gino igyai mun di kinei bibor mem nijam dima lo, hi ngat nadi bahara Da mem gima dimpu yok cem bi.>>
Mben Israel igyok ingon mem ngkiai nya ikwei mpu yok
8 TUHAN pai <<Mben Israel idem kep roti nindak gom di nikang roti cig kang lo, nite hi mui lene nite hi ngun lewo igyok ingon mem ngkiai di ibong ttai yok nya ikwei mpu yok. 9 Ingon guhuk niti tut ide nisindemti di cut leu yok drek dip ide niyok ningon mem ngkiai di ibong ttai yok dima bi sren. Apino ide niyaijo ningwig honti dideu su lo, igikan tut bi sren. 10 Mben Israel ide ningon jeisi jo nibreisi hak bibindo tut ide nitunggweisi nya. Mbro nok gino mun dima yok hagom pek kep mem yok tu lo, iginggok Da ba, ingkwei hanyen ndam Da di ide TUHAN Allah cem bi. 11 Mben Israel di imig dia idem kep hakimoi mbrei di ningon mbum. Nipou yo ne limwa di ide nya yahara mben Mesir kwei bimpu yok. Leu api inang ndam mben Asyur bu! 12 Noro bikwop mpe di ingkwei-ngkwei nyen binjiriek Da ne dicom jala ser yok ba, diba jala bikat yok noyam kin tungwatu nya di ikat ha nya. Midikes hukum ei yok dip drek dip ide nibon mun kineisi nya di dikan tut tu.
13 Buhun bibor mem yok lewo yaham mbuk kep Da tu! Yoni mitimek bingwig lewo ihwen bit Da. Dipi biditeu yok bingwes ngun lo, ide nikuk no biDati nya hagom nitrowai he. 14 Ingat nadi mungkun kei biDa bi. Tirigi ingat nadi ne injei yonti ug ei bilen di ibongti ba, iba nipim kui jeisi bingat nadi noyam kin yo di iba ingon com Da bi nya ibon kikepti. Tirigi yahara gandum kin ba anggur ngei ne ibindei yonti bibok noyam kin yo di ikuk yok bak kwar nya ibon kikepti. Ihwen bit Da nijit-jau a! 15 Mbro nok gino Dani rino dibindei di indig ba, diyai ide nisindemti biyok lo, igyok ingon gom mem ihwen biDa. 16 Idor bit kwar di ikuk yok bak di mbun nisindemti hi bi sren dima yok bijo kikau nok. Idem kep hampiap di drot-drau ba, dem mem gima hi ba ningon com yok bi. Nibou di ide nya iba ingon di jei bimbrap. Gima rino yoni mitug ndei nimai tug hon singau simeda apino mben Mesir ipa ndip yok.>>