SRAT NABI DANIEL
NIPUI MUN TUT DANIEL KIN NISUT BAT NYA
1:1--6:28
Pinai pilei Yahudi nya di igya kui Nebukadnezar
1
1 Tirigi Yoyakim ninyeng tak kep timiei Yehuda nya mem ari bingwam ningai leu su lene Nebukadnezar di nibou ndig minu Babel kon pran bit timiei minu ndig Yerusalem ba, nide tentara nya igyon ttai minu ndig Yerusalem. 2 TUHAN sindui sut ba, Nibou Ndig Yoyakim cut bak Nebukadnezar di cat ndigban di nibok kak nya nite hi leu TUHAN De Ig. Noni njei bikat timiei Yehuda nya bikri yok hanyen ug ei nide ig kwar nibousi ei minu Babel leu api ttei ndigban di nibok kak di pos nya hagom buug sut ei nibousi mem nide kwar di kuk no bak binju hagom ei ig gudanti.3 Gima leu su lene nibou ndig cuk mindor Aspenas di ninyeng tak kep nibou ndig de ig bei nsi nya leu binhyepo noni ug dimig pinai pilei mben Yehuda ibou poi di nibou ndig njei bikat yok kwei nya lo, nggok gi hi di intun nibou ndig Yehuda him kin gi intun yo di inyeng jei nya him cem. 4 Suar noni nggok pinai pilei nya di inghuisi kwes cem yuubu cem icoi pikor ninno ba, wer ingon ki cem ikan bidem tut mun nyeng hagom cem ba, idem mem gima igyai kep midyai bit nibou ndig ei nide kintrorti. Suar Aspenas ngginau yok tut nihyet Babel leu binhyepo yahagom imbrap nihyet Babel bipas hurup Babel cem kan. 5 Nibou ndig cuk Aspenas leu binhyepo noni ngei njita di nibou ndig de ig bei nsi nya igyem bikwop njap bak yo dima. Leu binhyepo niabiati pinai pilei pima yok igyai hagom bit leu nok nibou ndig nicuk yokti dima mem ari bingwam ningai su lene suar ikwei ya ei nibou ndig noho bei mem gima igyai midyai ei nide ig. 6 Pinai pilei Daniel kin Hananya kin Misael kin Azarya nya isrig yo di Aspenas dimig yok ei pimati ba, yahagom itimieisi leu minu Yehuda. 7 Mindor di ninyeng tak kep nibou ndig de ig bei nsi nya dima jem ibou bitai dini inyeng Beltsazar kin Sadrakh kin Mesakh kin Abednego.
8 Daniel ningon nddong bikos tut bipia noni mibindei ba, map kui noniti tug hon gi yem njita kin gi dut ba anggur ngei di nibou ndig de ig bei nsi nya igyem kep bikwop njap bi. Gima rino noni bidip huk Aspenas tut njita hiter. 9 Leu api Allah bindei ba, Aspenas ningon nggriu sut Daniel, 10 noro ningon digit tut nibou ndig nicuk noti. Gima rino noni pai bak Daniel <<Nibou ndig nonti ndo igbit njita di ayem kin ndia ngei di adut tu. Ba, gino noni yok niyai kep na bingat lo, anghuisi kwes noyam kin pinai pilei nindigsi nya bi lene mpaba mikes hukum nimai ei da dip.>>
11 Gima rino Daniel brim ningkek kep no di ya ser noni kin nisut bat ibou ningai bipai binoni, 12 <<Andigpoi e, ma abingon mem gima angei simeng mem niyem kin minyei mem nidut ug ei njap nitindur simnai. 13 Mpe dino njap simnai ngwig leu lene ma abinai sut nyeni ninghuisi kin pinai pilei nindigsi nya di igyem njita di nibou ndig de ig bei nsi nya igyem kep inghuisi leu api akos tut binye bit leu angon kanti.>>
14 No dima ce ighyet ba, bingon nok ingon kanti dima mem njap simnai. 15 Tirigi tto bou dem lene noni ngat bou niyai him bipia inghuisi kwes kei ba, isindemti nindig bibor dor njiriek nindigsi di igyem njita di nibou ndig de ig bei nsi nya igyem kep. 16 Hon kep njap dima kui lene noni sindui sut ba, igyem njita nitu he. Suar igyem njita di nibou ndig ndo biyok bu bi.
17 Allah bindei ba, pinai pilei ibou bitai dima ingon ki tut mun nyeng hagom. Noni bindei ba, Daniel ne nimbot kep ningat-hi-ngat cig kin mumpriem cig ri.
18 Tirigi ari bingwam ningai di nibou ndig preu ei pima ngwig leu su lene Aspenas buwak pinai pilei nya yahagom kwei bigya ei Nebukadnezar noho bei. 19 Niabiati nibou ndig kin yo dima isimbot kep biyam tut mun nyeng mang bibor tu lene jo nibreisi mem noni bipia Daniel kin Hananya kin Misael kin Azarya ingon ki ba, inghuisi kwes nindig bibor dor njiriek nindigsi nya yahagom. Gima rino noni ta yok ba, igyai midyai bit noni ei kintrorti. 20 Bikwop mpe dino nibou ndig ningon kiowi niti tut mun nyeng hi bihig ser yok ba, hig pus yok tut lene ibou bitai dima iba ingon di ki kin iji di ngkiem bibuhup mbisimnai dor njiriek yo di nung kui yok kin guru nya di igya kui nibou ndig ide nipingok noti yahagom ei minu Babel.
21 Daniel yai midyai ei nibou ndig de kintrorti kikau ug bipek nijam dino Nibou Ndig Kores leu Persia hwen bitimek mben Babel.