Nebukadnezar mumpriem
2
1 Tirigi Nebukadnezar ninyeng tak kep limwa nya mem ari bingwam can tu lene noni bong mai bimumpriem. Noro ningon buhun tut nide mun di mumpriem. 2 Gima rino noni sok nihyet bak yo di ingon ki kin yo di nung kui yok kin yo di inda dut kin yo di iko mun bibinggok tut ndiyok nya yahagom di igya kui noni ba, suar ikwei mbot kep mumpriem dima ningat bak. Tirigi yahagom idem yam bigya ei noho bei, 3 lene noni pai biyok <<Dingon buhun tut ditde mumpriem. Dijoi sut gima dikan tut ningat a!>>4 Yo dima iba nihyet Aram bibuhup <<Nnaba na di Nibou Ndig ayaijo ninno! Na di Andigpoi e, apui sut ade mumpriem binye leu api minipai igbit bina tut ningat a.>>a
5 Nibou ndig buhup <<Dikos tut bipia suar jimbot kep tut ditde mumpriem bibie bida leu api jicoi ei ningatti bram bu. Gi bi ne midikos jahagom kukiau leu api midibindei ba, jide ig tti biyem mpia ningwig a. 6 Lene gino jibuhup tut mumpriem bida ba, jibicoi ei ningatti cem bida lene midinjei mun di kei nindig bibor bak je bidibindei ba, jinyeng jei bibor cem. Gima rino ma jimbot kep ditde mumpriem ba, jibicoi ei ningatti cem bida hak ug.>>
7 Ibuhup hanyen bipai <<Andigpoi e, gi kei mem ambot kep ade mumpriem binye bibie ug e leu api minicoi ei ningatti binimbot kep bina.>>
8 Tirigi noni miap ibuhupti nok rino pai kep yok <<Igbit ri! Diba dingon kan bipia jibindin-ndin nyen lewo jo nibreisi mem je tut gi dikos tut bipia, 9 midikes hukum di noyam ei jahagom dip drek dip gino jimbot kep mumpriem dima bida bi a. Jiyok jingon gom mem jiris mun bida ba, jiba da bikek leu api jiyok jingon mem gima diluei dingonti. Noro bi! Ma jimbot kep ditde mumpriem bida leu api dikan tut bipia jidem mem gima jimbot kep ningat bram bu ri.>>
10 Yo di ingon ki ibuhup <<Andigpoi e, bit bon tungwatu bidem dihyei nisurti-nipekti hi mbot kep tut mimun bit leu angon kanti kan bi. Nibou ndig dihyeisi dini di ninyeng jei bibor ba, sindem bibor cem hi kak tut yo di ingon ki kin yo di nung kui yok nya kin yo di inda dut nya di igya kui noni nok gima bi sren. 11 Na di Andigpoi e, angon kanti dima nggruk bibor mem tungwatu dihyeisi dini. Kwar di tungwatu nya ikuk yok bak nya yongkom ingon ki mem gima ibuhup ahyet noro kwar dima hi ibong srig nye di tungwatu nya ikieti bi.>>
12 Tirigi nibou ndig miap ibuhupti nok rino noni gga yok nindig bibor leu api com nihyet leu binhyepo yo di ipingok kep ningonti ei minu Babel hagom itug ndei hukum nimai. 13 Gima rino noni cuk nide tentara nya leu binhyepo ikos yo dima bitut Daniel kin nisut bat nya yahagom.
Allah ndo Nebukadnezar de mumpriem bitut nicoi ei ningatti cem bak Daniel
14 Mpe dima lene Daniel ug ngat Ariokh di nibou ndig de nibou tentara di tin ei mem gima yai hukum nimai ei yo dima dip. Daniel ba ningon di sok kep nonti bimbrap bit noni, 15 bihig ser noni nggon rino nibou ndig kes hukum di buhun bibor dima ei yok dip i? Gima rino Ariokh buhup bipai sut mun di pek kep mem nibou ndig.
16 Daniel brim nimig buug ngat nibou ndig leu api hara noni leu binhyepo bet ningon mem nituti poi leu binhyepo Daniel ba ningon bisrip huk nibou ndig de mumpriem kin nicoi ei ningatti ug e. 17 Noni ngkwei hanyen ug ei nide ig bitri tut mun di pek kep tu nya bak Hananya kin Misael kin Azarya, 18 bibidip huk yok leu binhyepo ingat nadi bak Allah ei gwamti leu binhyepo Noni ngondut yok bindo igbit mimun tut mumpriem dima ba, bikin ser nhyema itug ndei hukum nimai bit yo di ingon ki nya di igya kui nibou ndig nindigsi nya bi. 19 Mmun mau mem njap gom ndia rino Allah ndo igbit mimun tut mumpriem dima bak Daniel tug hon ningat-hi-ngat. Gima rino noni nggei sut Allah ei gwamti, 20 bipai
<<Allah ningon ki cem sindem bibor cem! Ma tungwatu nya inggei sut Noni bijo ninno bijo kikau.
21 Ninyeng tak kep bed di biang hou kin bed di biang mpia ngeisi cem kin nijam nya hagom cem. Noni ta nibou ndig nya leu api cug inyeng di jei hanyen leu yok. Nongkom bindei ba, tungwatu nya ingon ki ba, ingon dorti.
22 Nongkom mbot kep mimun di jut bibor bikan tut mun di jo ei nidinditi hagom. Nipigati di sieng-siau kei nggai Noni.
23 Didigup bat-didigai bat nya ide Allah e, dinggei sut Na bidikon anyeng. Abindei ba, dingon ki ba, disindem cem. Abuhup dihyet tirigi dingat nadi lene apingok nyeni ningonti tut mun di nibuhup bak nibou ndig tu.>>
Daniel mbot kep mumpriem bak nibou ndig bicoi ei ningatti bram
24 Gima ngwig lene Daniel ug ngat Ariokh di nibou ndig cuk no bipia kes hukum nimai ei yo di ipingok kep nibou ndig ningonti pima bipai bak <<Ma akos yok au. Abuwak da ug ei nibou ndig noho bei lewo ditin ei mem dimbot kep nide mumpriem ba, dibicoi ei mumpriem ningatti bak.>>
25 Ariokh brim nimig bibuwak Daniel ug ei Nibou Ndig Nebukadnezar noho bei bipai bak <<Andigpoi e, dittau kep tungwagom leu mben Yahudi di akat yok kwei leu itimieisi. Noni mimbot kep ade mumpriem ba, bicoi ei mumpriem ningat cemti bina di Andigpoi.>>
26 Nibou ndig hig ser Daniel di ijem ninyeng hi Beltsazar bu <<Antin kimbo nok gi dem mem gima apai sut ditde mumpriem ba, abicoi ei mumpriem ningatti e?>> 27 Daniel buhup <<Andigpoi e, bit bon yo di ingon ki kin yo di nung kui yok nya kin yo di inda dut nya kin yo di iko mun ibinggok tut ndiyok nya yahagom ei dihyeisi dini imbot kep tut mumpriem dima bina kan bi. 28 Noro Allah ei gwamti sindem mem gima mbot kep mimun hagom. Noni mbot kep tut mun di micut igkep na di Andigpoi ei nidipti bu bina tu. Nogindini dimbot kep tut ade mumpriem kin ningat-hi-ngat di angat mpe di abong mai pima bina.
29 Tirigi na di Andigpoi abong mai pima lene amumpriem tut nijam gi nidipti bu. Allah di mbot kep tut mimun hagom ndo igbit mun di micut igkep na ei nidipti bu. 30 Noni ndo igbit nimbot kepti dima bida drek dip gi dintin kimbo dor njiriek tungwatu nindigsi nya bi. Noro leu binhyepo na di Andigpoi angon dorti tut ade mumpriem bitut mumpriem ningat ba, angon dorti tut angon kanti nya cem.
31 Andigpoi e, tirigi po ningat-hi-ngat pima bitimon na ne angat kwar di nindig krop di sieng-siau kei di bindei ba, angon ttin bibor di ya bibie aho bei. 32 Kwar dima nibou nok mas di pimbai kei ba, ningget kin ninda nok perak ba, ninghopti kin nintig bou nok ngkimom-tembaga. 33 Nindimuhum kin niriem nya nok ngkimom nitu ba, nimig nok ngkimom nitu kin igtuyap di srig yamti. 34 Tirigi ayai bong kep kwar dima rino tig nindig bibor nindak gom rim leu pimbien bou bicut kwei bitot kwar nimig di nok ngkimom nitu kin igtuyap bibindei ba, ki kukiau. 35 Ei nituti dima lene kwar dima titut yam tti biwer ngkimom nitu kin igtuyap kin ngkimom-tembaga kin perak kin mas ninnir-nnir di jo-jo yam dip di ndung-diem nok gandum ndung di ngwig ei ig jibei di tungwatu ibui gandum ngan eisi mem mpia ngeisi. Leu api hou miep nindung dima hagom bibit hou nimig ningwig. Noro tig nindig nindak gom dima dwoi sindam binindig bibor noyam kin nungug tou gom di kieng kep dihyeisi dini hagom.
36 Dindo ade mumpriem brei bina di Andigpoi tu. Nogindini midicoi ei ade mumpriem ningatti bina. 37 Andigpoi e, nani ne nibou ndig di ninyeng jei dor njiriek nibou ndig nindigsi yahagom ri. Allah ei gwamti ta nani ba, anyeng tak kep limwa nya. Asindem bibor ba, anggwes bibor cem ba, anyeng jei bibor cem. 38 Noni ta na di Andigpoi ba, anyeng tak kep tungwatu dihyeisi dini kin mindhe-ndhe kin ha nya yahagom. Kwar nibou di nok mas pima bindo tut na di Andigpoi ri. 39 Noro niabiati anyeng tak kepti ngwig hon nohonti tu lene nibou ndig nijep bu ninyeng tak kepti miya luei ahoti bu. Noro nide nisindemti kin ninyeng jeisi noyam kin na di Andigpoi bi. Niabiati bu lene nibou ndig nijep gi niningai bu ninyeng tak kepti miya luei gi hi dima nohoti bu. Kwar ninghopti di nok ngkimom-tembaga ndo tut nibou ndig dima ba, ninyeng mitak kep tungwatu dihyeisi dini hagom. 40 Niabiati bu lene nibou ndig nijep gi nibitai bu ninyeng tak kepti miya luei gi hi dima nohoti bu ba, noni nok ngkimom nitu di nggwes bibor. Ba, ngkimom nitu dima midram mun nyeng hagom bitut nibou ndig gi nipou kin nide limwa nya yahagom kukiau. 41 Kwar dima nimig kin nimig nda pijum nya nok ngkimom nitu kin igtuyap bisrig yamti ndo tut nibou ndig ninyeng tak kepti di mikwas canti ri. Bihi miyai nisindemti noyam kin ngkimom nitu lewo ngkimom nitu dima srig igtuyapti. 42 Nimig nda pijum nya di nok ngkimom nitu kin igtuyap srig yamti cem ndo tut nibou ndig cin inyeng tak kepti bu rin ba, hi sindem lene hi jet. 43 Ngkimom nitu kin igtuyap di srig yamti ndo binye bipia nibou ndig cin dima ibrim ingkek ba, ibindei sindem inyeng tak kepti tug hon gi ide bat nya iwak srig yamti bibindei ba, imbier kim yam noro bit bon igyai nok kan bi lewo ngkimom nitu kin igtuyap bit yam kan bi. 44 Ei nijam dino nibou ndig cin dima inyeng tak kep lene Allah ei gwamti mita Nonti ninyeng tak kepti di bit bon ug hon nohonti kan bi. Bit bon nibou ndig dihyeisi dini bitut ide tentara yahagom cem ibindei ba, Allah ninyeng tak kepti cut bak yoni kan bi. Noro ninyeng tak kepti dima mibindei timek nibou ndig bitut ide tentara pima yok yahagom ba, isar bingwig. 45 Andigpoi e, angat bou ayai him bipia tig ndig di rim kwei leu pimbien bou cut bitot kwar ngkimom nitu kin ngkimom-tembaga kin igtuyap kin perak kin mas bi e? Allah di ninyeng jei bibor ndo mun di micut igkep dihyeisi dini ei nidipti bu brei bina di Andigpoi. Dindat hagom bit leu nok amumpriemti pima leu api dicoi ei ade mumpriem ningat cemti bidipai igbit hagom bina tu.>>
Nibou ndig bindei ba, Daniel yai ninyeng jei
46 Leu api Nibou Ndig Nebukadnezar kuk no biba ningwak bikik mpia ei Daniel noho bei leu api cuk nide limwa nya leu binhyepo yoni cem ikuk yok binoni bibon midut nindig mindhe-ndhe kep hum bak binjei ide mun di kei hi bak noni cem. 47 Nibou ndig pai <<Daniel e, ade Allah ninyeng jei dor njiriek kwar di tungwatu nya ikuk yok bak hagom. Noni sindem dor njiriek nibou ndig nindigsi yahagom. Noni mbot kep mimun hagom kan. Gima hagom jo nibreisi mem da lewo aba angon di ki bipai sut mimun dima ningat bida tu.>> 48 Leu api Nebukadnezar bindei ba, Daniel yai ninyeng di jei bibor bitug ndei ndigban di nibok kak bibor cem. Noni ta Daniel ba, ninyeng tak kep ei minu Babel bikon ninyeng nok nibou mem yo di igya kui nibou ndig yahagom cem. 49 Daniel hara nibou ndig apino noni ce nihyet bita Sadrakh kin Mesakh kin Abednego ba, inok nibou di igya kui Daniel ei minu Babel. Noro Daniel nongkom ya kui nibou ndig ei nide kintrorti.