TUHAN ngkwei hanyen kwei ei Nide Ig
43
1 Leu api no dima buwak da ug ei dimbou pmem di birok kik mpia nipriti, 2 bidingat lo, nisieng-siausi di piga kei di bindo tut Allah Israel ningat di kwei leu nite bei mpia nipriti. Dimiap Allah nihyet di dem muk ndigsi tirigi tti tignam nibimbiti pimo. Lene Allah de nisieng-siausi bindei ba, dihyeisi dini piga kei. 3 Ningat-hi-ngat dima noyam kin gi hi di dingat mpe di Allah kwei mem gima bindei timek minu ndig Yerusalem ba, noyam kin gi dingat ei Minyei Kebar nyai pima cem. Leu api ditti ug ei dihyeisi bidiba dingwak bikik dihyei bidikuk da bak. 4 Nisieng-siausi dima kwei bicoi kak dimbou pmem di birok kik mpia nipriti dima leu api coi kikau ug ei TUHAN De Ig.5 TUHAN Ninnei kon da ba, buwak da ug ei mpia di jo bas hak di jo ei sirima bidingat lo, TUHAN De Ig mpung tut Nide nisieng-siausi di piga kei di bindo bipia Allah ningat rin ei mpia dima. 6 Sisip no dima ya simiak da yo lene dimiap TUHAN nihyet di mbrap bit da kwei leu Nide Ig bipai, 7 <<Na di tungwatu di ayaijo kikau bi e, gini ne Ditde banggo mbrei ri. Midibong ei sirini ei limwa Israel ikieti ba, dinyeng mitak kep yok bijo ninno bijo kikau. Yoni kin ide nibou ndig nya mibindei ba, map kui dinyeng kwesti tug hon kwar di ikuk yok bak ba, itig nibou ndig nyah ei mpia dini bu bi. 8 Nipou yo ne nibou ndig di ide nya iwin ide ig lene itu ide dimbou hui ba, itas ide cou dimbou hui nya simin dimbou hui kin cou dimbou tta nya ei Ditde Ig. Ba, iba dring tig gom ngat he rino bikwas a. Ibindei ba, map kui dinyeng kwesti tug hon ide nibon munti di bindei ba, igyai ttin. Gima rino diba Ditde nigga biborti bindei sar yok. 9 Noro hon ammani bikui ne suar ikes hon ide nikuk no bak kwarti nya leu ba, iket nibou ndig di ide nya inguti leu mpia dini. Gima leu api midibong ei ikieti bijo ninno bijo kikau.>>
10 Leu api TUHAN pai bu <<Na di tungwatu di ayaijo kikau bi e, ma atri nihyet tut Ditde Ig dini bak mben Israel. Acuk yok ba, ingig igyai kep nikilisti di bipingok yok tut niwinti. Abindei ba, igwam nimmaiti drek dip ide sisar di ibon nya hagom. 11 Gino igwam nimmaiti drek dip ide nibon munti nya lene ma apai sut Ditde Ig dini biyok. Apai sut nikilisti dima biyok bitut nindigsi kin dimbou nicoi kak nya kin dimbou nehei kak nya kin niprion tig ma nindig di bijo-jo yam dipti kin nidimigsi nya kin niggai serti nya di jo mem hagom. Ba, apas kep gima hagom mem yok leu binhyepo ibiyok ngon kep nidimigsi nya cem hagom. 12 Nikos tut pijum mem TUHAN De Ig ne suar hanjop nsi di jo ttai nya hagom ei nungug dip dini kwes-kwau.>>
Nimbar hum dok
13 Gini ne nimbar hum dok nindigsi bit leu nai di ibinai Tuhan De Ig ri. Itig got ei nikiou ba, nijutti dem meter niken ba, ninyanti cem dem meter niken. Got ninghas di pijum di jo bei got nisai nanaisi dem senti simnai. 14 Leu got di jo ei nikiou kui bipek kin nimbar hum dok nitta di jo dihyeisi ne nanaisi dem meter gom. Ba, nitta dini yai ninten gom di ninyanti dem senti ningot can di jo nidip. Nitta gi jo hacan cem nanaisi dem meter can. Ba, nitta dini cem bon ninten gom di ninyanti dem senti ningot can di jo nidip bu. 15 Nimbar hum dok nitta di jo anai ne mpia di indig mindhe-ndhe di ibui ei niti rin ba, nanaisi dem meter can. Nimbar bon sapi bou nggai di jei bitai ba, hi ntun bibikwop nuhuisi nya. 16 Nimbar hum dok ninjek dip hu kwei ninyanti kin nijeisi hacem noyam ba, bikwop ninghas nya dem meter muhwindagom. 17 Nitta di jo nahacanti cem bon ninghas him bitai ba, bibikwop ninghas him dem meter muhwindacan. Nitta bon nuhui dip bei nisai ba, nanaisi dem senti simnai. (Got dima ninyanti dem meter niken.) Ba, lin mbrei di bon ninten di ibikui ug ei ninjek dip no jo ninghas nite di birok kik mpia nipriti.
Midut nipiga nimbar hum dokti
18 TUHAN Di Ninyeng Jei Bibor pai bida, <<Na di tungwatu di ayaijo kikau bi e, angig atingou mem mun di dipai bina. Tirigi iwin nimbar hum dok dima biput tu lene suar apiga nimbar hum dok tug hon midut nindig mindhe-ndhe di ibui mem ibikuk yok biDa ei dip. Aba mindhe-ndhe dima yok ninggrom bigimahap nimbar hum dok ningat. 19 Imam po intun Lewi him di intun Zadok ninsi de nya him he rima ikwei ya ei Doho bei mem gima ibon midut. Da di TUHAN Di Dinyeng Jei Bibor rino ditri tut nihyet dima. Ayai sapi nikre di nehen pap ningut gom bak yo dini mem midut nibiyai nikos ser sisarti. 20 Ayai ninggrom poi mien ba, abidip sapi bou nggai di jo nuhuisi bitai ei nimbar ninjek dip. Abidip nuhuisi bitai ei nitta di jo hacan cem. Abidip nimbar hum dok dima ninghas him nya hagom cem. Tug hon nisinati dima ne abindei pwoi nimbar hum dok dima ba, akes pijum ei mem Da. 21 Ma ayai sapi nikre di ibui mem midut nibiyai nikos ser sisarti ba, andig ningut ei mpia di ipigig sut ei di jo ei hanjop nsi di kwes-kwau ei Tuhan De Ig joti nisai ma kwei. 22 Njapti kui bu lene suar abui kambir nikre di bok-ba bi ba, andig ei nimbar hum dokti mem midut nibiyai nikos ser sisarti. Ma aba ninggrom bindei pwoi nimbar hum dok noyam kin gi aba sapi nikre di nehen pap bindei pwoi pima. 23 Gima ngwig leu lene ayai sapi nikre di nehen pap gom kin kambir nikre di nehen pap gom kin bu ba, hacem bok-ba bi, 24 leu api ajem kwei biDa. Suar imam nya iba nsim bahap mindhe cin dima leu api indig hacem titut yam ei nimbar hum dokti bak Dani. 25 Suar abui kambir ningut gom kin sapi nikre di nehen pap ningut gom kin kambir nikre ningut gom bikwop njap-njap kikau mem njap muhwindacan nok midut nibiyai nikos ser sisarti. Aba mindhe-ndhe di bok-ba bi bibon midut dima. 26 Suar imam nya ibon midut nipiga nimbar hum dokti dima mem njap muhwindacan leu binhyepo ibitin ei nimbar hum dok mem ibibon kep midut nya eisi. 27 Tirigi njap muhwindacan dima kes hon lene suar imam nya ikinyon ei nibon midut gi nindig mindhe-ndhe kin midut nibiyai ningon kwes kin Allahti. Leu api midingon kei sut jahagom. Da di TUHAN Di Dinyeng Jei Bibor disimbot dat tu.>>