Inggam dimbou pmem di birok kik mpia nipriti
44
1 No dima buwak da ba, nuug ei dimbou pmem di birok kik mpia nipriti ei Tuhan De Ig niyati dima lo, dimbou pmem dima nggam ser tu. 2 Lene TUHAN pai bida, <<Suar dimbou pmem dini jo nok ba, nggam kikau. Ma ikau hanyen leu au. Ma jisindui sut ba, hi coi kak dimbou pmem dima cem au. Lewo mben Israel ide Allah di Dani dicoi kak dimbou pmem dini kwei ei Ditde Ig tu. Gima rino suar inggam ser bijo kikau. 3 Mbro nok gima lo, disindui sut ba, nibou ndig di ninyeng tak kep limwa nya ug ei dimbou pmem dima mem gima yem njita di kwes ei Doho bei a. Noro suar noni coi kak dimbou pmem dima leu ninsi di nindig pima bingkwei-ngkwei nyen kak puig dima.>>Nisindui sut yo di icoi ei TUHAN De Ig
4 Leu api no dima buwak da ba, nuug ei dimbou pmem di jo ei nite di birok kik mpia nijjai ei Tuhan De Ig. Tirigi dimian huk Ig dima lene dingat lo, nisieng-siausi di piga kei di bindo tut TUHAN di ningat rin ei sirima piga bidem Nide Ig titut yam. Leu api dinjei danti ug ei dihyeisi bidikuk da bidiba dingwak bikik mpia, 5 leu api TUHAN pai bida, <<Na di tungwatu di ayaijo kikau bi e, ma ayok ngon kep mun di angat kin mun di amiap dima nok mungkun kei. Midipai sut Ig dini nidimigsi kin niggai serti nya hagom bina. Ma angig ayai mungkun kei kep yo di disindui sut ba, icoi ei Ig dini kin yo di diggai ser yok nya.
6 Ma apai bak limwa Israel di yaham imbuk kep Da kwop dima bipia Da di TUHAN Di Dinyeng Jei Bibor midisindui sut ba, ibon mun di bindei bidiyai ttin ser bu bi. 7 Yoni ibindei map kui Ditde Ig tirigi indig kep mindhe-ndhe nimmau ndok kin ninggrom bibikuk yok biDa noro isindui sut ba, ngkiai di ibit midut sunat kin dihyet cem bi icoi kwei ei Ditde Ig a. Tug hon ide nibon munti di bindei ba, diyai ttin ser dima itunggwei Ditde nipreu di dipreu ei mem yok tu. 8 Yongkom he rino ibon kep midut di kwes-kwau nya ei Ditde Ig bi noro isindui sut ba, ngkiai nya rino ibon kep midut dima yok a.
9 Da di TUHAN Di Dinyeng Jei Bibor disimbot dat bipia disindui sut ba, ngkiai nya di ibit midut sunat bi kin yo di ibit dihyet bi icoi kwei ei Ditde Ig bi. Nicukti dima mem ngkiai di ibong timiei ei mben Israel ikieti cem.>>
Ibindei hei yo di intun Lewi him leu nimpung imam nya
10 TUHAN pai bida, <<Midikes hukum ei yo di intun Lewi him di ikes Da ei leu ba, ikuk yok bak kwar nya bit mben Israel nindigsi nya. 11 Disindui sut ba, igyai midyai niya ser dimbou pmem kin midyai ugwai-gwai ei Ditde Ig ba, ibui kep mindhe-ndhe mem midut nindig mindhe mindhe titut kep humti kin gi ibimpu limwa nya he yo. 12 Yoni ibon midut nikuk no bak kwar nya mem mben Israel tu. Tug hon nisinati dima ne ikri Ditde limwa nya ug ei nibon sisarti. Gima rino Da di TUHAN Di Dinyeng Jei Bibor diba neheng bipai bipia suar itug ndei hukum. 13 Ma igyai midyai nok imam mem Dani ba, ingget Ditde mun di kwes-kwau cem icoi ug ei Mpia Di Kwes-Kwau cem au. Gima ne hukum di dikes ei yok dip drek dip ide nibon munti di bindei bidiyai ttin ser nya pima ri. 14 Hon kep ammani kui ne didimig yok ei mem gima igyai kep midyai di nggruk bibor he ei Ditde Ig.>>
Nidimig sutti mem imam nya
15 TUHAN Di Ninyeng Jei Bibor pai <<Mpe di mben Israel ikes Da ei lene imam di intun Zadok him iba ingon gom bita ibou ei niyai midyai mem Dani kikau ei Ditde Ig. Gima rino nogindini suar yoni rima ikwei ya ei Doho bei mem gima ittei mindhe di ibui nimmau di ndok bindig ei nimbar hum dokti lene iba ninggrom bigimahap nimbar hum dok ba, ibibon midut mem Da. 16 Yongkom he rino icoi kwei ei Ditde Ig bigyai midyai mem Da ei Ditde nimbar hum dok bibie tut yo di ikuk yok biDa ei Ditde Ig a. 17 Mpe dino icoi kak dimbou pmem mem gima ikwei ei mpia di jo bas hak gi ninsi ne suar ijuk sinsun di iba minghas linen bibien . Gino igyai kep midyai ei mpia dima kin Ditde Ig cem lene ma ijuk sinsun di iba domba ninta bibien au. 18 Noro suar ijuk sinsun bopen di iba linen binap lo, igiti bang bi. Lene suar iba minghas linen bingot kep ibou. Leu binhyepo ingkek dut ba, yahanggwap mbilen bi. 19 Nipou tirigi yehei ug ei ig him gi nisai ma kwei di limwa nya idem yam eisi dima bigyo lene suar ijuk sinsun imam dima bikes hak ei ninsi di kwes nya ei Ditde Ig a. Leu api ijuk yonti ide sinsun ei yokti leu binhyepo sinsun imam dima bindei ba, mun di buhun cut igkep limwa nya bi.j
20 Ma imam nya ikak ibou leu ba, ibou le au. Lene ma isindui sut ibou nta jei bibor cem au. Suar ikos ibou bicun bit leu nikos-tutti di jo tu. 21 Nipou tirigi icoi ug ei mpia di jo bas hak gi ninsi bigyo lene ma idut ba anggur ngei au.
22 Ma imam nya iwak sop gwam nitta pilei Israel ningat di bon mun bigyo e, he imam hi nitnem kibom di mai leu he e. Ma iwak sop di nijjep kes ei au.
23 Suar imam nya ingginau Ditde limwa nya leu binhyepo ibisrip tut mun di ikwas pijum ei mem TUHAN kin mun di ikwas pijum ei mem bi niter leu yamti kin mun di bindei mbut nikwes-kwausi kin mun di map kuisi. 24 Gino ingon buhun tut yam tut munhyet di bitut ide nikos tutti nya lene suar ikwam minggwen bit yam ser munhyet dima bit leu Ditde niggai serti nya di jo tu nipaisi. Suar ibon pesta nibikuk yok biDati nya bibit leu Ditde nicukti kin Ditde nikos tutti di jo tu nipaisi. Lene ma idimig Njap Nigwam Kep Ninghuisi nok njap di kwes pijum ei mem Da.
25 Ma imam hi bindei ba, map kui nontiti tug hon gi ngget nimai ngut au. Noro tut nide ndigpoi nya kin nimunggwom bat nya kin nide adig-ajoi nya kin nikwohop di wak pinai bigyo ne disindui sut ba, ngget ingut a. 26 Tirigi noni pwoi hanyen leu ningget ingutti tu lene ma gwam mem njap muhwindacan ug e. 27 Leu api ug ei mpia di jo bas hak gi ninsi ei Ditde Ig bibon midut nindig mindhe ei nimbar hum dokti biDa mem gima bindei pwoi nonti. Leu api disindui sut ba, noni miyai midyai nok imam hanyen ei Ditde Ig a. Da di TUHAN Di Dinyeng Jei Bibor disimbot dat tu.
28 Imam nya he rino igyai inyeng imam nok ide mun ninda rom. Gima ne mun di itug ndei leu mun di dikwas tut mben Israel rin ba, jo biyok leu nintun him kikau ug ei nintun him. Imam nya ide ndigban inda rom hi ei dihyei Israel bi. Lewo ide mun ninda rom ne Dani. 29 Suar itug ndei mun di bahati tut yok tug hon midut njita nibipai sigyo bak Allahti kin midut nibiyai nikos ser sisarti kin midut nibikum Allah de ningwamti di ibon mem mben Israel bitut mun nyeng hagom di ide limwa nya ikwas pijum tut Da. Ba, gima yok hagom ne ide mun di bahati tut yok ri. 30 Suar imam nya itug ndei bibikwop ningat hagom di kei bibor kei di limwa nya igyai nimbie him ngat kwei leu miaisi nya bitut mun nyeng hagom di ikwas tut Da. Bikwop mpe di mben Israel ikang roti ne suar ikwas roti nindak di ibon nimbie him ngat tut imam nya. Tug hon nisinati dima lene midinjei mun di kei bak mben Israel ide ig bei nsi nya. 31 Ma imam nya igyem ha kin mindhe-ndhe nindigsi nya di nonti mai kin gi mindhe di ten hiter ttem di mai ei cem au.>>