Ig can di jo dideu TUHAN De Ig
42
1 Leu api no dima buwak da ug ei mpia di jo bas hak gi nisai ma kwei bibie tut da ug ei ig hiter di ya ndam Tuhan De Ig ei nite bei mpia nijjai. Ig dima jo ting leu ig nindig di ya ndam Tuhan De Ig ei nite bei mpia nicutti bi. 2 Ig dima nijeisi dem meter ningot muhwi lene ninyanti dem meter nyatungwagom ba, muhwi. 3 Mpia di jo bas hak di iba ngug tig bikrop ttai ei ig dini nite di birok kik Tuhan De Ig ninyanti dem meter simnai. Lene ninghas nite hi birok kik mpia di jo bas hak di iba ngug tig bikrop ttai gi nisai ninjek dip. Ig dima bon nikiou ningai di jo-jo yam dip. Bikwop nikiou di jo-jo yam dip dima coi ndam bei ninsi leu gi nibehei a. 4 Puig di ninyanti dem meter muhwi ba, nijeisi dem meter ningot muhwi no mbut ninsi dima nuhui bei ninsi a. Dimbou di jo ei ninsi dima yok hagom kiek ndam bei mpia nijjai. 5 Ninsi gi jo anai nya wer kom dor njiriek ninsi gi nibehei nya. Lewo puig di mbut ninsi gi anai nuhui dip nya nyan dor njiriek gi nibehei nuhui dip nya. 6 Ninsi dima yok cem bon ninten ningai lene bon nide dihim di bahati nya noyam kin gi bahati ig di ya mpia di jo bas hak dima nindigsi nya bi.7 Iwin ngug tig di jo sur ninsi dima ei sirima ba, bikkin ser mpia di jo bas hak kin ninsi pima yok ba, nijeisi dem meter ningot can ba, muhwi. 8 Ninsi dima yok nipuig di bikwas mpia di jo bas hak di iba ngug tig bikrop ttai gi nisai pima nijeisi dem meter ningot can ba, muhwi. Noro ninsi dima yok ne nipuig di bikwas Tuhan De Ig rin ba, nijeisi dem meter ningot muhwi. 9 Dimbou nicoi leu nite bei mpia nipriti no jo ei dring tig nikiou ei ninsi dima yok nipuig nibehei mem yo di icoi leu mpia di jo bas hak gi nisai ma kwei.
10 Ig di noyam kin gi hi dima no ya ndam TUHAN De Ig ei nite bei mpia nibihog ba, ig dini ya ting leu ig di ya nite bei mpia nicutti pima bi. 11 Puig di mbut ninsi dima yok nuhui dip noyam kin puig gi mbut ninsi gi ya mpia nijjai nuhui pima. Nijeisi kin ninyanti noyam ba, mun nyeng nindigsi kin dimbou nya cem hagom noyam. 12 Dimbou gom cem no jo ei ninsi dima yok nibehei ei ninghas bei mpia nibiho di jo niyenti ei nite bei mpia nipriti ei ngug tig nikiou a.
13 Lene no dima pai bida, <<Ig cin dima kwes-kwau. Imam nya di igya ei TUHAN Noho bei he rima icoi ug eisi bigyem kep mindhe di ibui ninghui di kwes bindig ei nimbar hum dokti bak TUHAN. Ba, ikes mun di ibibon midut njita nibipai sigyo bak Allahti kin midut nibiyai nikos ser sisarti kin midut nibikum Allah de ningwamti hagom bak TUHAN di kwes-kwau nya ei sirima. 14 Gino imam nya igyai midyai ei TUHAN De Ig biput leu ba, ijoi sut yuug ei mpia di jo bas hak gi nisai ma kwei lene suar ijuk sinsun nibiyai midut hak ei ninsi dima yok. Suar ijuk sinsun hiter leu api yuug sut ug ei limwa nya di idem yam ei ikieti a.>>
Ninai hanjop di TUHAN De Ig joti
15 Tirigi no dima nai TUHAN De Ig ninsi bidem leu su lene noni buwak da ba, bicoi dimbou pmem ei nite bei mpia priti leu api noni nai hanjop di Tuhan De Ig joti. 16 Noni ba nide tom binai nite di birok kik mpia nipriti lo, dem meter sratus can ningot muhwi. 17 Leu api noni binai nite di birok kik mpia nijjai lo, gima cem dem meter sratus can ningot muhwi. 18 Leu api noni binai nite di birok kik mpia nibiho lo, gima cem dem meter sratus can ningot muhwi. 19 Leu api noni binai nite di birok kik mpia nicutti lo, gima cem dem meter sratus can ningot muhwi. 20 Ba, hanjop di Tuhan De Ig joti di bon nuhuisi bitai dima nijeisi kin ninyanti noyam ba, dem meter sratus can ningot muhwi. Ngug tig gom krop ttai hanjop nsi dima leu binhyepo bikwas hanjop nsi di kwes bijo ter mem TUHAN leu hanjop nsi di nindigsi nya hak.