Nibou ndig Gog nicutti
39
1 TUHAN Di Ninyeng Jei Bibor pai, <<Na di tungwatu di ayaijo kikau bi e, ma apai kep nibou ndig Gog di ninyeng tak kep minu Mesekh kin Tubal nya. Apai bak bipia nide nitok rino Dani. 2 Midipingok ninghwak him lene dibuwak noni behei leu minu ting bibor ei nite bei mpia nijjai kwei ei nungug him ei minu Israel. 3 Midibui ninda tut nide hampiap billet leu ninda prak leu api midibindei timek tibor nide nya billet leu ninda com cem. 4 Nibou ndig Gog miya tut nide tentara nya titut yam kin yo di injei siceu bit noni ba, yahagom mikrop ei nungug him ei minu Israel. Midiyai nimbiam ngut nya bak ha nya kin mindhe di niten-pos nya binok ide mun di igyem. 5 Nide tentara nya mikrop bimai ei miaisi nya. Da di TUHAN Di Dinyeng Jei Bibor disimbot dat tu. 6 Midibindei ba, hum yem mpia ei minu Magog kin les him ei mpia di timiei nya ibong kei igwam kei eisi apino tungwatu nya yahagom mikan tut bipia Dani ne TUHAN ri. 7 Noro midindat kep dinyeng di kwes-kwau brei ei mben Israel ikieti bidibindei ba, map kui dinyeng dimati bu bi. Leu api ngkiai nya yahagom mikan tut bipia Dani ne TUHAN ba, mben Israel ide Allah di Kwes-Kwau ri.>>8 TUHAN Di Ninyeng Jei Bibor pai <<Ningat ne njap di ditri tut mun dima yok hagom mikwei yo. 9 Timiei minu ndig ngot ei minu Israel minduk yam binjei ba, imbus mun di ibipukep tibor ninggwenti kin singau simeda kin hampiap kin tibor kin tom nibui tungwatu nyati di siceu ide di imai leu nya hagom. Leu api icat gima yok hagom keyam nok biei di indig. Ba, biei dima dem mem indig kep hum kikau ei ari bingwam nitindur muhwindacan. 10 Ba, suar yuug ei miaisi mem gima irop biei bi suar yuug ei bahamti mem gima iwim biei di mui cem bu bi. Lewo minggwen di nimbiam imai leu dima yok mang bibor bidem mem gima ibindig kigkep huma. Yoni mipos ndigban bicat ningwig leu yo di nipou yo ipos ide ndigban ba, icat ningwig leu yok hanyen bu. Da di TUHAN Di Dinyeng Jei Bibor disimbot dat tu.>>
Nitig nibou ndig Gogti
11 TUHAN pai <<Mpe dino mun dima yok hagom pek kep lene midipek hanjop nitig nimbiam ngutti nittou nsi gom bak nibou ndig Gog ei minu Israel yo. Midipek hanjop dima ei mbang briep ei nite bei mpia nipriti ei Igpong Nsim nite dima ug. Yoni mitig Gog bitut nide tentara nya titut yam ei mpia dima. Tungwatu nya mijem mbang briep dima ninyeng <Mbang Briep Tentara Gog.> 12 Mben Israel ibou ngwak misibui sut nitig nimbiam ngut hagom bijo kikau ei bed muhwindacan leu binhyepo map kui dihyei dimati bu bi. 13 Timiei minu dima yahagom mimpu yam tut nitig nimbiam ngutti dima. Gima rino yoni itug ndei mun di kei leu Dani ei Ditde njap nibindei timek siceusi nya. Da di TUHAN Di Dinyeng Jei Bibor disimbot dat tu. 14 Tirigi bed muhwindacan pima ngwig leu lene yo dima midimig ibou poi ei mem gima imbut bidem minu dima nisurti-nipekti binggok ser nimbiam ngutf di jo hak ei dihyeisi yo nya. Gino ingat bihi yok rinaha lene mitig leu binhyepo ibindei pwoi minu dima leu map di kuisi. 15 Gino ingat tungwatu njum gom kak imbutti dima lene idat mun gom simin ba, ibitto leu binhyepo nimpung nitig ningut ingat lene itig tungwatu njum dima ei Mbang Briep Tentara Gog. 16 Tug hon nisinati dima lene ibindei pwoi minu dima leu map di kuisi. (Ei nidipti bu ne tungwatu nya iwin minu ndig di ninyeng Nimpung Tentara Gog ei mbang briep dima.)>>
17 TUHAN Di Ninyeng Jei Bibor pai bida, <<Na di tungwatu di ayaijo kikau bi e, ma ajem kep ha nya kin mindhe-ndhe nya hagom kwei leu nima kwei-nima kwei mem gima igyem kep nimbiam ngut di ditin ei mem yok nya. Midibon pesta nindig bibor ei nungug him ei minu Israel leu api yoni mipuk bigyem nimbiam inghui bidut inggrom a. 18 Suar igyem tentara di mimbri kui ingkek di ibrim ingkek nya ingut lene ibidut nibou di inyeng tak kep nya inggrom cem. Yo dima itug ndei nimai noyam kin kambir nikre kin kambir nipmot bat kin sapi nikre di pap-nap kei di ibui nok mikwau. 19 Tirigi diyai nimai bak yo dima tereu nok mun di ibui mem midut nya lene ha nya kin mindhe-ndhe nya migyem immau. Ingon him wei ba, idut inggrom bipu yok. 20 Inghop mimpung tut kuda kin tungwatu di ibri kuda dima kin yo di mimbri kui ingkek tut nikon pran nya ei Ditde meja. Da di TUHAN Di Dinyeng Jei Bibor disimbot dat tu.>>
Mben Israel ide nipindi hanyenti
21 TUHAN pai <<Midindo Ditde nikei-kau-keisi bak ngkiai nya bingat. Yahagom mingat gi diba Ditde nisindemti bindei mbut nikos tutti di sren kei nya. 22 Hon kep njap dima kui mben Israel mikan tut bipia Dani ne ide TUHAN Allah ri. 23 Ngkiai nya yahagom mingon huk niti bipia mben Israel ibon sisar tut Dani apino dipinak yok ug ei ingkiaisi ug a. Dikes yok ei cem disindui sut yok ba, ide siceu nya ibindei timek yok leu api itug ndei nimai ei pranti cem tu. 24 Dibibon yok dem igbit map di kui yokti kin ide nibon mun kineisi. Leu api dikes yoni hak ei.>>
25 TUHAN Di Ninyeng Jei Bibor pai <<Noro tini bu ne midingondut Ditde limwa Israel di intun Yakub him. Midibindei ba, mun di isuar nya hagom midem mem yok. Dinyohou dinyeng tug hon nisinati dima leu binhyepo ikon dinyeng kikau. 26 Tirigi ibong kei igwam kei ei ide minu hanyen lene hi di hwen bit yok bu bi. Lene yoni mibbwe ser gi itug ndei nimmai drek dip ide naham nimbuk kep Dati. 27 Midibuwak yok hanyen kwei leu ide nitok joti nya ide minu yo. Diyai munti dima mibindei ba, dikwes-kwausi jo nibreisi mem ngkiai nya yahagom. 28 Apino Ditde limwa nya mikan tut bipia Ide TUHAN Allah riDani. Lewo Dani rino dipinak yok ug ei ingkiaisi ba, Dani rino dibuwak yok kwei ei yonti itimieisi hanyen. Dikes tungwagom ngat he ei ingkiaisi dima bi sren. 29 Miduhug Dinnei ei mben Israel dip lene midikes yok ei bu bi sren. Da di TUHAN Di Dinyeng Jei Bibor disimbot dat tu.>>