NINGAT-HI-NGAT TUT TUHAN DE IG EI NIJAM GI NIDIPTI BU
40:1--48:35
TUHAN buwak Yehezkiel ug ei minu ndig Yerusalem
40
1 Nijam di nibong ei ningkiaisi dima ne njap gi nisimnai mem bed gi nigom ei ari bingwam gi nyatungwagom ba, muhwi ri. Nijam dima ne ari bingwam gi nisimnaibrimigtai niabiati minu ndig Yerusalem cut leu su ri. Njap dima ne dingkek kan bipia TUHAN de nisindemti sindem tut da bibuwak da ba, nuug. 2 Allah buwak da ug ei dihyei Israel tug hon ningat-hi-ngat gom bikes da ei nungug di anai gom dip leu api dingat minu ndig gom di bon ig di dimbun di ingot nya ei doho bei. 3 Noni buwak da ug ei mpia dima lene dingat pinai gom di sieng-siau kei noyam kin ngkimom-tembaga. Noni krau nai di iba minghas linen bibon kin tom nai gom ei nindati biya kui dimbou pmem.4 Bipai bida <<Na di tungwatu di ayaijo kikau bi e, angig atingou mem dihyet mungkun kei ba, angig ayai kep mun nyeng hagom di dindo bina. Lewo Allah buwak na kwei mem gima atri tut mun nyeng hagom di angat bou ayai him bak mben Israel.>>
Dimbou pmem di birok kik mpia nipriti
5 Leu api dingat Tuhan De Ig di iba ngug tig bikrop ttai. No dima kinyon eisi lene ba nide tom binai nijeisi lo, dem meter ningai lene nai ngug tig dima bingat lo, nanaisi dem meter ningai. Lene nindokti cem dem meter ningai. 6 Leu api noni ug ei dimbou pmem di birok kik nite mpia nipriti bikui lin mbrei di bon ninten ba, ug krau ninggrupti binai dimbou hui ba, ninyanti dem meter ningai. 7 Ninsi di kom di imbut kak di jei bibor jo ei sirima ba, bon ninsi nya mem yo di igya ser nya. Ninsi ningai jo bei ninda com lene ninsi ningai jo bei ninda prak. Bikwop ninsi dima bon nijeisi kin ninyanti noyam ba, dem meter ningai. Dring tig di bikwas ninsi dima yok nindokti dem meter can biniken. Ninsi di imbut kak dima bon nijeisi dem meter ningai di ibinut bu ba, ibicoi ug ei ninsi nindig di birok kik Tuhan De Ig. 8 Leu api no dima nai ninsi nindig dima bingat lo, ninyanti dem meter bitai. 9 Ninsi dima birok kik dimbou pmem niyenti nite dima kwei ba, ibicoi TUHAN De Ig. Dring tig di bikkin ser ninsi dima kin Tuhan De Ig nindokti dem meter gom. 10 Ninsi di mem yo di igya ser di jo ei ninsi di kom ei bei ninda com kin ninda prak pima hagom noyam. Ninyanti kin nijeisi noyam ba, dring tig di bikkin ser ninsi dima hagom nindokti cem noyam.
11 Leu api no dima nai ninsi di imbut kak di ibicoi ug ei dimbou pmem dima ninyanti ba, dem meter muhwindagom biniken ba, dimbou pmem dima ninyanti dem meter muhwi. 12 Ngug tig di cun di nanaisi dem meter niken he ba, nindokti cem dem meter niken he no jo ei ninsi niya ser di nijeisi kin ninyanti hacem dem meter ningai pima noho. 13 Leu api no dima nai ngug tig di jo ei ninsi niya ser nijeisi bei ninghim kikau ug ei ninsi di noyam di birok kik pima ei bei ninghim bu ba, dem meter simnaibrimigcan biniken. 14 Leu api noni nai ninsi di nindig pima cem ba, nijeisi dem meter simnai. Ninsi ndig dima bie ug ei mpia di jo bas hak di iba ngug tig bikrop ttai di jo nisai simiak Tuhan De Ig. 15 Nitingti leu dimbou pmem ei bei nisai pima kikau ug bipek kin ninsi nindig di bon dring tig di bikkin Tuhan De Ig pima dem meter ningot can ba, muhwi. 16 Itu nimihyeti mien-mien nya ei dring tig gi ninghim kin dring tig gi bikwas ninsi dima yokti. Iba dui sraba di ikilis ningwes bimau dring tig ei bei ninsi di imbut kak pima ei nite hi nite hi.
Mpia di jo bas hak ei TUHAN De Ig di iba ngug tig bikrop ttai di jo nisai ma kwei
17-18 Leu api no dima buwak da binicoi kak dimbou pmem ba, nehei ug ei mpia di jo bas hak di iba ngug tig bikrop ttai di jo nisai ma kwei. Itap ninsi ningot ningai sir dring tig ninghim ba, ibigahai Tuhan De Ig dima. Ig jou di iba tig ma bibon no jo ttai mpia di jo bas hak dima buum yam. Mpia di jo bas hak dima jo nimo jug leu mpia di jo bas hak di jo ninsi a.
19 Dimbou pmem hiter bu di jo anai di nuhui dip kiek ndam mpia di jo bas hak di jo ei ninsi dima no jo. Lene no dima nai dimbou pmem cin dima ba, niting leu yamti dem meter ningot muhwi.
Dimbou pmem di birok kik mpia nijjai
20 Leu api no dima nai dimbou pmem di birok kik mpia nijjai di ibicoi ug ei mpia di jo bas hak di jo ninsi pima. 21 Ninsi niya ser ningai ei dimbou pmem dima bitut ninsi di imbut kak kin dring tig di bikkin nya kin ninsi nindig nijeisi kin ninyanti kin nanaisi hagom noyam kin gi hi di jo ei dimbou pmem di birok kik mpia nipriti. Nitingti leu dimbou pmem ei bei nisai ma kwei kikau ug bipek kin ninsi titut yam dem meter ningot can ba, muhwi lene ninyanti dem meter simnaibrimigcan biniken. 22 Ninsi nindig kin nimihyeti nya kin dui sraba ningwes di ikilis nya hagom noyam kin gi jo ei dimbou pmem di birok kik mpia nipriti. Lin mbrei di bon ninten muhwindacan rino ibikui ndam dimbou pmem dima. Ninsi nindig jo ser niyenti birok kik mpia di jo bas hak ei Tuhan De Ig nisai ma kwei. 23 Dimbou pmem hiter bu di ibicoi mpia di jo bas hak dima ei ninggimau yon birok kik dimbou pmem di birok kik mpia nijjai pima ba, noyam kin gi jo ei dimbou pmem di birok kik mpia nipriti cem. No dima nai dimbou pmem cin dima ba, niting leu yamti dem meter ningot muhwi.
Dimbou pmem di birok kik mpia nibiho
24 Lene no dima buwak da ug ei dimbou pmem di birok kik mpia nibiho ba, nai gima cem lo, noyam kin dimbou pmem nindigsi nya. 25 Itu mihyeti ei ninsi nya cem noyam kin gi jo ei dimbou pmem nindigsi nya. Nitingti leu dimbou pmem bei nisai ma kwei kikau ug bipek kin ninsi titut yam dem meter ningot can ba, muhwi lene ninyanti dem meter simnaibrimigcan biniken. 26 Lin mbrei di bon ninten muhwindacan rino ibikui ndam dimbou pmem dima. Ninsi nindig jo ser niyenti birok kik mpia di jo bas hak dima ei Tuhan De Ig nisai ma kwei. Iba dui sraba ningwes di ikilis bimau dring tig bei ninsi di birok kik ninsi di imbut kak nya. 27 Dimbou pmem hiter bu di ibicoi ug ei mpia di jo bas hak dima ei ninggimau yon no jo dima. No dima nai dimbou pmem cin dima ba, niting leu yamti dem meter ningot muhwi.
Dimbou pmem di birok kik mpia nibiho di ibicoi ug ei mpia di jo bas hak ninsi
28 Leu api no dima binut bu bibuwak da ba, ba da bicoi dimbou pmem di birok kik mpia nibiho ba, nicoi ug ei mpia di jo bas hak ninsi. Noni nai dimbou pmem dima bingat lo, nanaisi noyam kin dimbou pmem nya gi nisai ma kwei cem. 29 Ninsi niya ser nya kin ninsi nindig nya kin dring tig gi ninsi nya hagom noyam kin gi jo ei dimbou pmem nindigsi nya. Ninsi niya ser nya ei dimbou pmem dima yok bon nimihyeti nya cem. Ba, nitingti leu dimbou pmem bei nisai ma kwei kikau ug bipek kin ninsi titut yam dem meter ningot can ba, muhwi lene ninyanti dem meter simnaibrimigcan biniken. Lin mbrei di bon ninten muhwindaningai rino ibikui ndam dimbou pmem dima. 30 Dimbou pmem de ninsi ndig di jo ttai nya dima nijeisi dem meter simnaibrimigcan biniken lene ninyanti dem meter ningai. 31 Ninsi nindig birok kik mpia di jo bas hak dima ei nisai ma kwei. Ngug tig bei ninsi di birok kik puig di ibicoi leu dimbou pmem kwei cem iba dui sraba ningwes di ikilis bimau. Lin mbrei dibon ninten muhwindaningai dima mem ibikui ndam dimbou pmem dima.
Dimbou pmem di birok kik mpia nipriti di ibicoi bei mpia di jo bas hak ninsi
32 No dima binut bu bibuwak da binicoi dimbou pmem di birok kik mpia nipriti ba, nicoi ug ei mpia di jo bas hak ninsi. Noni nai dimbou pmem dima bingat lo, nanaisi noyam kin dimbou pmem nya gi jo nisai ma kwei cem. 33 Ninsi niya ser nya kin ninsi nindig nya kin dring tig gi ninsi nya noyam kin gi jo ei dimbou pmem nindigsi nya. Ninsi niya ser nya ei dimbou pmem dima yok cem bon nimihyeti nya. Ba, nitingti leu dimbou pmem bei nisai ma kwei kikau ug bipek kin ninsi titut yam dem meter ningot can ba, muhwi lene ninyanti dem meter simnaibrimigcan biniken. Lin mbrei di bon ninten muhwindaningai rino ibikui ndam dimbou pmem dima. Dimbou pmem de ninsi ndig di jo ttai nya nijeisi dem meter simnaibrimigcan biniken lene ninyanti dem meter ningai. 34 Ninsi nindig birok kik mpia di jo bas hak ei nisai ma kwei. Ngug tig bei ninsi di birok kik puig di ibicoi leu dimbou pmem kwei cem iba dui sraba ningwes di ikilis bimau. Lin mbrei di bon ninten muhwindaningai dima ibikui ndam dimbou pmem dima.
Dimbou pmem di birok kik mpia nijjai di ibicoi ug ei mpia di jo bas hak ninsi
35 Ningwigsi lene pinai dima buwak da ug ei dimbou pmem di birok kik mpia nijjai binai dimbou pmem dima lo, nanaisi noyam kin dimbou pmem nindigsi nya. 36 Dimbou pmem dima bon ninsi niya ser nya kin dring tig gi ninsi nya kin ninsi nindig ba, hagom noyam kin gi jo ei dimbou pmem nindigsi nya. Ninsi dima yok kin ninsi nindig bon nimihyeti nya. Puig di ibicoi dimbou pmem ug ei ninsi nijeisi dem meter ningot can ba, muhwi lene ninyanti dem meter simnaibrimigcan biniken. 37 Ninsi nindig birok kik mpia di jo bas hak ei nisai ma kwei. Ngug tig bei ninsi di birok kik puig di ibicoi leu dimbou pmem kwei cem iba dui sraba ningwes di ikilis bimau. Lin mbrei di bon ninten muhwindaningai dima ibikui ndam dimbou pmem dima.
Ig nindig ngat di jo dideu dimbou pmem di birok kik mpia nijjai
38 Ninsi di ibikum eisi bu ei mpia di jo bas hak ei nisai ma kwei ibinut kin dimbou pmem ei nite bei mpia nijjai. Ninsi di ibikum eisi bu dima bon nide dimbou gom mem ibicoi. Ninsi dima rino mem ipiap mindhe-ndhe di ibui bindig ei nimbar hum dokti ninghui a. 39 Meja bitai no jo ninsi ndig dima. Can jo nite hi lene can jo nite hi bu. Meja dima yok mem gima ibui mindhe-ndhe di indig kep hum ei nimbar hum dokti kin mindhe-ndhe di ibui mem midut nibiyai nikos ser sisarti kin mindhe-ndhe di ibui mem midut nibikum Allah de ningwam kin ide nitunggweisi cem. 40 Meja bitai bu no jo ei nisai ma kwei. Can jo bei dimbou pmem di birok kik mpia nijjai ei nite hi nite hi. 41 Ba, meja mem ibikos mindhe-ndhe di ibui mem ide midut nya hagom nimangti muhwindaningai. Meja bitai jo ninsi nindig lene bitai jo ei mpia di jo bas hak ei nisai ma kwei. 42 Iba tig bibon meja bitai di jo ninsi di ibikum bu pima mem ibitin ei mindhe-ndhe di ibui mem midut nya. Meja dima nanaisi dem meter niken he ba, nijeisi kin ninyanti hacem dem meter niken. Ikes nimbumbati di ibikos mindhe di ibui nya keyam ei meja dima yok nidip. 43 Meja dima yok bon ninghas him ninyanti dem senti muhwindacan biniken. Igyok mikwau di ibui mem midut nya hagom ei dip.
44 Leu api no dima buwak da ug ei mpia di jo bas hak ninsi. Ig jibei can no jo dima ba, gom ya simin dimbou pmem ei nite bei mpia nijjai bikiek nimbou hui ndam bei mpia nibiho lene gom jo simin dimbou pmem bei mpia nibiho bikiek nimbou hui ndam bei mpia nijjai. 45 No dima pai bida bipia ig jibei di ikiek nimbou hui ndam bei mpia nibiho dima mem imam nya di igyai midyai ei TUHAN De Ig. 46 Ba, ig jibei di ikiek dimbou hui ndam bei mpia nijjai dima mem imam nya di igyai midyai kui nimbar hum dokti. Suar imam dima yok yahagom leu yo di intun Zadok him. Lewo Lewi ne pung di Zadok ntun him rin ba, yo dima he rima igya ei TUHAN Noho bei mem gima ibiyai midyai nibikuk yok bak Noni.
Mpia di jo bas hak ninsi di iwin TUHAN De Ig eisi
47 No dima nai mpia di jo bas hak ba, nijeisi kin ninyanti hacem dem meter ningot muhwi. Tuhan De Ig jo ei nite bei mpia nicutti lene nimbar hum dok gom jo ei Ig dima nuhui. 48 Leu api noni buwak da ug ei TUHAN De Ig ei ninsi gi jo nuhui dip ug. Ba, noni nai ninsi di ibicoi ug ei Ig dima ba, nijeisi dem meter muhwindacan ba, ninyanti dem meter can biniken. Lene noni binai dring tig ei ninghas cin ba, nindokti dem meter gom biniken. 49 Itas dihim can ei sirima ba, hi jo bei anda prak lene hi jo bei anda com. Ninsi gi jo nuhui dip dima nijeisi dem meter simnai lene ninyanti dem meter muhwindagom. Lin mbrei di bon ninten simnai kui ug ei ninsi dima.