TUHAN ba nibou ndig Gog bikes hukum ei mben Israel dip
38
1 Lene TUHAN pai bida, 2 <<Na di tungwatu di ayaijo kikau bi e, ma asigion Gog di nibou ndig di ninyeng jei ei minu ndig Mesekh kin Tubal ei minu Magog. 3 Apai binoni bipia Noni ne Da di TUHAN Di Dinyeng Jei Bibor Ditde nitok ri. 4 Midipingok ninghwak him leu lene midiba nikoisi nya bisrou niji a. Ba, dibikri noni behei sut nide nimpung tentara nya cem. Nide nimpung tentara di ibri kuda kan di ijuk sinsun di noyam dima imang bibor ba, yahagom ittei ide mun di ibipukep tibor ninggwenti nya kin singau simeda cem. 5 Tentara minu Persia kin Sudan kin Libia yahagom injei bit nibou ndig dima lene yahagom ikrau ide singau simeda bitin topi yeng ngkuong cem. 6 Nikon pran cig nya leu minu Gomer kin Bet-Togarma ei nite bei mpia nijjai cem ikiju binjei bit noni ba, mben nindigsi nya cem imang bibor bu injei bit. 7 Acuk noni bitin ei lene asok kep tentara ngot di ibicom yam bit noni nya yahagom ba, ingig itingou mem nicuk yoti. 8 Ug ei ari bingwam poi bu lene midicuk no mem gima coi bihwen minu gom bitut timiei di induk yok di ibicom yam hanyen kwei leu mben ngkiai nya ikieti bibong kei bigwam kei ei minu dima. Nibou ndig Gog miyai nungug Israel di mpia mbum-bra bram di wer ig kum kroisi mimbrek ngan tu dima biyati lo, tini bu ne limwa di ingat rin eisi nya ibong kei igwam kei hanyen. 9 Noni kin nide tentara kin mben ngot di injei bit noni minjei kwei ba, icoi bihwen bidem kep nok sigau. Yoni mikieng kep minu dima noyam kin bumbuhui di jun minu dima.>>10 TUHAN Di Ninyeng Jei Bibor pai bak Nibou ndig Gog <<Ei nituti dima ne ma atin ei angon kanti di kinei bibor mem yok. 11 Akos tut mem gima anjei siceu ba, ahwen minu di bon ngug tig bi dima. Biken tirigi timiei minu dima ingon jo nyahan ba, ibong kei igwam kei ei minu ndig ngot di mbun nide ngug tig bi kin ide minggwen hi di ibiya ngkiem ser cem bi dima. 12 Mpe dima lene ahwen timiei di ibong ser minu ndig di nipou yo wer ig kum kroi dima yok leu lene abipos ndigban di ide nya hagom. Nipou yo ne timiei minu ndig dima yok induk yam bingkwei hanyen leu ingkiaisi lene iba yok bicom yam hanyen. Lo, tini bu ne ima ndigban kin mindhe-ndhe nimuhup tu nya mang bibor bibong ei dihyeisi dini nahacan ngatti. 13 Timiei minu Syeba kin Dedan kin nitri-nipek mun cig di ibong ei minu Spanyol nya mihig ser noni <Apo acuk ade tentara nya mem gima ipos ndigban cem icincau bipos mas kin perak kin mindhe-ndhe nimuhup tu nya ba, jipian gima yok hagom bijuug sut e?> >>
14 Gima rino TUHAN Di Ninyeng Jei Bibor cuk da mem gima dipai nisokti dini bak nibou ndig Gog <<Ningat ne anjei ade siceu nya lene acoi ba, ahwen Ditde limwa nya ei nitutti di yahagom ibong kei igwam kei yo. 15 Akiju ba, ambut leu abong kikepti di jo ting bibor ei nite bei mpia nijjai ba, aya tut tentara di nindig bibor di mipbor ngat ningkom. Yo dima ne nimpung tentara di ibri kuda kan di ikwei leu minu ngkiai nya hagom ri. 16 Leu api acoi ba, ahwen Ditde limwa di mben Israel. Ahwen yokti dem kep nok hou sigau di cut di hwen dihyeisi dini. Gino nitutti dem ne midipinak na mem gima ayai Ditde dihyei ba, ayati. Nibou ndig Gog e, midihwen yok tug hon na leu api tungwatu nya yahagom mikan tut bipia dinyeng rino Allah di Kwes-Kwau. 17 Nani ripo ditri tut bak Ditde awak di nabi Israel nya pima bi e? Yoni itri tut bipia ei nijam di gwam dip bu ne midicuk tungwagom mem gima coi minu Israel bihwen. Da di TUHAN Di Dinyeng Jei Bibor disimbot dat tu.>>
Hukum di Allah kes ei nibou ndig Gog dip
18 TUHAN Di Ninyeng Jei Bibor pai <<Noro tirigi nibou ndig Gog coi bihwen Israel lene midoom dingonti tut bi. Ba, dihwen noni haninyai lewo digga bibor. 19 Midiba Ditde nigga biborti bisimbot dat bipia hammi njap dima tau rino ngkit di buhun bibor micut igkep minu Israel. 20 Wau nya kin ha nya kin mindhe-ndhe nindig kin nimien nya hagom kin yo di yahagom di ingat rin ei dihyei njek dip dini migwam nidigitti tirigi igya um Da. Nungug nya mitti ei yam dip lene pimbien nya cem mikau dop ei yam dip ba, ngug tig nya cem hagom milus bingwig ei yam dip. 21 Midikes mun di buhun ninyeng hagom ei Gog dip biyai ba, gwam nidigitti. Da di TUHAN Di Dinyeng Jei Bibor disimbot dat tu. Nide tentara nya miba ide singau simeda bidat yam. 22 Midiba nsuwer ajar kin nisiber ninggromti bihwen noni. Midiba biget es di mbras nok tig njep kin hum kin belerange di dut bibor bihwen noni kin nide tentara nya kin ngkiai nya imang bibor di injei siceu bit noni yahagom. 23 Tug hon nisinati dima lene midindo brei bak ngkiai nya yahagom bipia dinyeng jei bidingon kwes-kwau cem. Apino yoni mikan tut bipia Dani ne TUHAN ri.>>