Mbang briep gom di mpung tut nimai njum di ngak-cai
37
1 TUHAN ningat rin bit da ba, Nide nisindemti kui bidem dingonti. Leu api TUHAN Ninnei buwak da bikes da ei mbang briep gom di mpung tut nimai njum di ngak-cai nya. 2 Noni buwak da binimbut bidem mbang briep dima nisurti-nipekti bidingat lo, nimai njum dima mang bibor ba, hagom ngak-cai. 3 Noni hig ser da <<Na di tungwatu di ayaijo kikau bi e, nimai njum dini yok mikiju biyai niyaijo hanyen e?>>Dibuhup <<Na di TUHAN Di Anyeng Jei Bibor e, Nangkom he rino akan tut a.>>
4 Lene Noni sok nihyet ei da dip bak nimai njum di ngak-cai dima bipai, 5 <<Da di TUHAN Di Dinyeng Jei Bibor midihi dinnei ei jinsi bidibindei ba, jiyaijo hanyen. 6 Midibindei ba, jinggiluk kin jinghui ntun je him leu api midiba jingkek di nijep bu binggai kep je hanyen. Midihi dinnei ug ei jinsi leu binhyepo jiyaijo hanyen. Leu api jikan mungkun tut bipia Dani ne TUHAN ri.>>
7 Gima rino da di Yehezkiel ditri tut nihyet di TUHAN sok ei da dip dima bak nimai njum nya dima. Nipou tirigi dikes dihyet bigyo lene dimiap mun di sigu-sigak bidingat lo, nimai njum sindi bicim yam hanyen. 8 Tirigi dinyohou ngig diyai kep mun di bitimon da dima lene dingat bu lo, ninggiluk kin ninghui ntun him leu api ningkek di nijep bu nggai kep hagom hanyen. Noro ninnei jo ingutti bigyo.
9 Lene Allah cuk da bu bipai <<Na di tungwatu di ayaijo kikau bi e, dipai bina tut houd bipia Da di TUHAN Di Dinyeng Jei Bibor dihig hou cut kwei leu dihyei nisurti-nipekti leu api dibihi ninnei ei nimai ngut nya insi leu binhyepo yahagom ikiju ba, igyaijo hanyen.>>
10 Gima rino ditri tut nihyet di TUHAN sok ei da dip leu api hou cut kwei ba, hi ninnei ei nimai ngut nya insi apino yahagom ikiju ba, igyaijo hanyen. Yahagom imangti ningot ndig ba, dem mem ibibon tentara di isindem bibor nimpung hi ri.
11 Allah pai bida <<Na di tungwatu di ayaijo kikau bi e, mben Israel noyam kin nimai njum dini. Yoni ilua sok tut yonti bipai bipia inok nimai ngak-cai cem ingon cut leu su cem njap nituti hi mem yok bu bi cem. 12 Gima rino ma atri tut bak Ditde limwa di mben Israel bipia Da di TUHAN Di Dinyeng Jei Bibor midikau dimbou leu ide jui dip bidiwin yok hanyen leu imai eisi. Midibuwak yok hanyen kwei ei itimieisi cem. 13 Niabiati diyai igbit dingon kanti dima hagom tu lene Ditde limwa nya mikan mungkun tut bipia Dani ne TUHAN ri. 14 Midihi dinnei ug ei insi leu binhyepo ikiju bigyaijo hanyen leu api disindui sut ba, ibong ser itimieisi hanyen. Mpe dima lene yoni mikan mungkun tut bipia Dani ne TUHAN ri. Da di TUHAN disimbot dat tu. Midiyai hagom bit leu nok gi dipreu ei mem yok.>>
Yehuda kin Israel ibicom yam nok mben gom hanyen
15 TUHAN pai bida mbigom kin bu, 16 <<Na di tungwatu di ayaijo kikau bi e, ma ayai tom gom ba, apas eisi <Mben Yehuda inyeng di tak kep yonti.> Lene ma ayai tom gom kin bu ba, apas eisi <Mben Israel inyeng di tak kep yonti.> 17 Leu api akrau tom dima niyenti nya hacem ba, abinut yam leu binhyepo nok tom gom ngat bou tungwatu nya igyai him. 18 Tirigi ade limwa nya ihig ser na tut tom dima nimbot kepti lene ma, 19 apai biyok bipia Da di TUHAN Di Dinyeng Jei Bibor midiyai tom di ndo tut mben Israel leu api midibinut kin tom di ndo tut mben Yehuda. Midipai tes tom cin dima binok tom gom ngat ei dindati.
20 Ma akrau tom cin dima ei andati leu api ando bak ade limwa nya. 21 Lene ma apai biyok bipia Da di TUHAN Di Dinyeng Jei Bibor miditeu Ditde limwa nya yahagom leu ngkiai nya ikieti leu api midimbus yok keyam bidibuwak yok hanyen kwei ei itimieisi. 22 Midibindei ba, ibicom yam. Ninyeng di tak kep yontiti gom ngat he ei itimieisi bidem nungug him ei minu Israel hagom. Ide nibou ndig gom ngat ninyeng mitak kep yok. Yoni mikwas yonti ter leu yam binok canti bi lene inyeng tak kep yonti canti bu bi. 23 Yoni mikuk yok bak kwar di mpiei bibor bi lene ibon sisar di bindei ba, map kui yokti bu bi. Midikwek yok leu ingon di mang di bindei ba, igyai mun kinei sut Da hagom. Midibindei ba, ingon kwes-kwau leu binhyepo inok Ditde limwa nya ba, Dani ne ide Allah ri. 24 Nibou ndig di noyam kin Ditde awak di Daud ninyeng mitak kep yok. Yahagom mibicom yam nok gom leu api nibou ndig dima ninyeng mitak kep yok. Ingon gom tut diggai serti bibit hagom nok gi kei cem. 25 Yoni kin ide nintun him di bram yam nya mibong ser itimieisi di diyai bak Ditde awak di Yakub kin idigup bat-idigai bat nya di ibong ser nipou su bijo ninno bijo kikau. Nibou ndig di noyam kin Ditde awak di Daud ninyeng mitak kep yok kikau. 26 Midipreu ei mem yok leu binhyepo ibong kei igwam kei bijo ninno bijo kikau. Midinjei mun di kei bak yoni lene midibindei ba, idigek kep mpia. Midiwin Ditde Ig ei ikieti bijo ninno bijo kikau. 27 Midibong bit yok bidibon Danti nok ide Allah leu api yoni inok Ditde limwa nya. 28 Tirigi diwin Ditde Ig di jo ninno bijo kikau ei ikieti lene mijo nibreisi mem ngkiai nya yahagom bipia Da di TUHAN didimig mben Israel ei ba, inok Ditde limwa nya.>>