Allah njei mun di kei bak Israel
36
1 TUHAN pai <<Na di tungwatu di ayaijo kikau bi e, ambrap bit nungug nya ei minu Israel ba, acuk yok bimiap kep TUHAN Di Ninyeng Jei Bibor nisok kep yoti. 2 Israel de siceu nya iba ingon di nggei-hi-nggei bipai <<Sigyo. Nyeni ima mbigdip di jo mimbrek ngan dima bou nye tu.>> 3 Mpe di mben di ibong ttai je icoi jide minu bihwen je ba, ipos ndigban leu je pima ne ighyet kinei sut mben Israel yahagom. 4 Gima rino nungug nya kin mbigdip nya kin minyei pmot nya kin mbang briep nya kin minu ndig di wer ig kum kroi di ide timiei nya ikes bijo ei tu nya kin ngkiai nya di ibong ttai nya di ipos ndigban leu yok biba ighyet bicig yok cem e, ma jingig jitingou mem nihyet di TUHAN Di Ninyeng Jei Bibor pai bije.>> 5 Noni pai <<Diba Ditde nigga biborti di cig-cai bipai kep ngkiai nya di ibong ttai je ba, dibipai kep mben Edom pijum. Yo dima iba ingon di kei kin ingwes di pri gau Da biyai Ditde dihyei bigyati lene ijem Ditde minta nidumti nya bou yok nok ide. 6 Gima rino ma ambot kep tut dingon kanti mem mben Israel. Apai bak nungug nya kin mbigdip nya kin minyei pmot nya kin mbang briep nya bipia Da di TUHAN Di Dinyeng Jei Bibor digga yok ba, bit bon doom dingonti drek dip ngkiai nya di ighyet wer mpiahi tut yok bibor bingwes pri gau yok cem kan bi. 7 Da di TUHAN Di Dinyeng Jei Bibor diba neheng bipai bipia mben ngkiai nya di ibong ttai minu Israel mitug ndei nihyet di wer mpiahi tut yoti. 8 Noro nungug Israel jen e, dipai bije bipia jide biei nya nuug mitug ninda-nda nya bingat ningat hanyen bu mem je di Ditde mben Israel. Jei bi ne mijingkwei hanyen ri. 9 Ditti kin je tu. Dipreu ei mem je bipia mijikkin jide dihyei bijindim ningan eisi hanyen bu. 10 Midikum ei Ditde limwa Israel imangti bikum eisi ba, ibong bidem minu ndig hagom. Yoni miwin minu di nggek bingwig su nya hagom hanyen bu. 11 Midikum ei jide limwa kin jide mindhe-ndhe nyati ba, imang bibor dor njiriek nimangti ei nimbie him pima. Ba, ide nintun him yokti nya imang bibor. Midisindui sut ba, ibong nyahan ei minu dima noyam kin gi nipou hanyen. Midibindei ba, jiyemti kin jimati dem mem je dor njiriek gi juum nipou yo a. Apino yoni mikan tut bipia Dani ne TUHAN ri. 12 Midibuwak Ditde mben Israel bingkwei hanyen bibong ser ide minu hanyen bu. Yoni migyai idihyei di ngat ningat bijo kikau mem yok nok ide dihyei ninda rom lene imunggwom bat nya mimai inggum bu bi.13 Da di TUHAN Di Dinyeng Jei Bibor dipai bipia ningat ne ijem dihyei dini ninyeng dihyei di yem tungwatu kin dihyei di pos imunggwom bat nya di ibong niti cem. 14 Noro hon kep ammani kui ne dihyei dini miyem tungwatu bipos imunggwom bat nya bu bi. Da di TUHAN Di Dinyeng Jei Bibor disimbot dat tu. 15 Dihyei dini mimiap kep ngkiai nya di iba ighyet bicig yok ba, inghim koi sut tungwatu ighyet di kinei sut yok bu bi. Dihyei dini misiber mben di ibong niti nya inggrom bu bi. Da di TUHAN Di Dinyeng Jei Bibor disimbot dat tu.>>
Mben Israel igyai nibong kei nigwam keisi hanyen
16 Lene TUHAN pai bida, 17 <<Na di tungwatu di ayaijo kikau bi e, mpe di mben Israel ibong ei itimieisi ne ibindei ba, map kuisi tug hon igyai munti nya kin igyaijoti di kinei nya. Dingat ide nibon munti dima noyam kin sop di nitta kan mun cem.c 18 Dikiber Ditde nigga biborti ei yok dip drek dip gi ihwen nimbiam imang bibor ei idihyei dima bibindei ba, map kuisi tug hon kwar di ikuk yok bak cem. 19 Dikes hukum ei yok dip drek dip igyaijoti kin igyai kepti nya leu api dibindei bintek gimahap ug ei minu ngkiai ide nya. 20 Ibindei ba, map kui dinyeng di kwes-kwau bidem imbutti kin igwamti bijo kikau tug hon tungwatu nya di ipai kep inghapti <Mben dini ne Allah de limwa nya rin lo, suar ikes ide minu di Allah yai biyok bijo ei.> 21 Dingon pri tut dinyeng lewo mben Israel ibindei ba, map kui dinyeng di kwes-kwau bidem imbutti kin igwamti.
22 Gima rino ma atri tut Da di TUHAN Di Dinyeng Jei Bibor dihyet di disok ei na dip bak mben Israel di nibimbiti pai <Midiyai mun nyeng gom lo, mun dima nok bindo mem je di mben Israel bi noro nok mun di bindo tut dinyeng di kwes-kwau di jibimangkrei bijico kep bidem jingkiaisi hagom tu. 23 Midindo dinyeng di jei bibor nikwes-kwausi di jibimangkrei bijico kep bidem jingkiaisi hagom bak ngkiai nya leu api mijo nibreisi mem yok bipia Dani ne TUHAN ri. Da di TUHAN Di Dinyeng Jei Bibor disimbot dat tu. Midiba jeni bindo bindo bak ngkiai nya bipia Da di TUHAN Gom Ngat bidingon kwes-kwau. 24 Midimbus je kwei leu bikwop ngkiai nya yahagom ikieti leu api dibuwak je hanyen kwei leu dihyei nisurti-nipekti mem gima jibong ei jitimieisi hanyen. 25 Gima ngwig lene midiba minyei di pimbai kei biprok je leu binhyepo jingon pwoi leu jide kwar nya kin mun nindigsi di bindei ba, map kui je tu nya. 26 Midiyai ningon di nijep kin nibou ngwakti di nijep bije. Midiba ningon di bit dihyet biluei ningon di tindak di noyam kin tigya. 27 Midikes Dinnei ei jingonti bidipijuk je leu binhyepo jibit Ditde niggai serti kin Ditde nicuk jeti nya hagom. 28 Mpe dima lene mijibong ser minu di diyai bak jidigup bat-jidigai bat nya. Mijinok Ditde limwa nya lene dinok jide Allah. 29 Midikwek je leu map di kui jeti hagom. Midipui dihyet tut jide gandum ba, hagom nnum kei apino ninggum mihwen je bu bi sren. 30 Midibindei ba, jide biei di ningat ntun him nya nggrou kei. Jide beisi nya nnum kei leu binhyepo ninggum di buhun di bindei ba, ngkiai nya ingwes om kep jeti micut igkep je bu bi sren. 31 Jingon muhukti tut jiyai munti di kinei bibor nya kin mun di jiyai tunggwei di nipou nya leu api jikoi jihwap tut jide sisar kin jiyai kepti di kinei bibor nya. 32 Je di mben Israel e, ma jiyok ngon kep bipia jenti rino jibindei di dibon mun dini yok hagom bi. Suar jimmai sut jenti ba, jiba jingon bisrip huk jenti nok nikinei-kinau nya drek dip jiyai munti nya. Da di TUHAN Di Dinyeng Jei Bibor disimbot dat tu.> >>
33 TUHAN Di Ninyeng Jei Bibor pai <<Tirigi dipiap je bijipwoi kei leu jide sisar nya ne midisindui sut ba, jibong ser jitimieisi ba, jikinding jide ig hanyen. 34 Gi nipou ne yo di ikriau jide beisi nya ingat lo, hagom ngoi-nga tu. Noro midisindui sut ba, jiyai miai eisi hanyen bu. 35 Leu api yahagom minggap leu sut. Lewo beisi di nipou ngoi-nga dima tini bu ne noyam kin Miai Eden bu. Minu di nipou timek bingwig dima tini bu ne mpung tut timiei nya di ipindi tentara nibousi di igya coi nya hanyen tu. 36 Mijo nibreisi mem ngkiai nya di gahai di ingwes ngun nya bipia Da di TUHAN dipindi minu di timek bingwig nya bidiyai miai ei iggum ndigsi nya hanyen tu. Da di TUHAN disimbot dat tu bidiyai hagom bit leu nok gi dipreu ei mem yokti.>>
37 Lene TUHAN Di Ninyeng Jei Bibor pai <<Je di mben Israel e, midisindui sut ba, jahara Da leu binhyepo dimpu je hanyen. Midibindei ba, jidigek kep mpia noyam kin domba nya di idigek bimang-mang. 38 Nogindini jide minu mien nya timek bingwig noro jei bi ne hagom mpung tut limwa nya noyam kin minu ndig Yerusalem di mpung tut domba nya imang bibor mem nijam di imam nya ibon midut nya pima. Mpe dima lene mijo nibreisi mem je bipia Dani ne TUHAN ri.>>