Allah kes hukum ei nikuk no bak kwar cig nya dip
14
1 Mpe dima lene mben Israel ide nibou nya ibou poi ikwei ngat da ba, ihig ser da tut TUHAN ningon kanti. 2 Leu api TUHAN pai bida, 3 <<Na di tungwatu di ayaijo kikau bi e, yo dini ikuk yonti bak kwar nya apino icut ei sisarti tu. Leu api nggon rima ihig ser Da i?4 Gima rino ma apai biyok bipia Da di TUHAN Di Dinyeng Jei Bibor disok ei na dip bak yoni <<Bikwop mben Israel gom-gom dino ikuk yok bak kwar nya di isindui sut di icut ei sisarti leu api ikwei hara nabi mem gima pingok ingonti ne midiba nibuhupti di dem mem kwar di ikuk yok bak di mang-mang dima yok bibuhup biyok! 5 Kwar di ikuk yok bak dima mbres Ditde limwa nya ei minu ting leu Da tu. Noro mpaba dibuhupti dima bindei ba, Ditde limwa nya mingkwei hanyen ndam Da.>>
6 Apai bak mben Israel cem bipia Da di TUHAN Di Dinyeng Jei Bibor dipai <Ma jittin ser jide sisar di jibon nya. Jiba jinghim bak jide kwar di jikuk je bak di bibon ningon him weisi dima hak ug.>
7 Bikwop mpe dino mben Israel gom e, he ngkiai hi di bong timiei ei mben Israel ikieti gom mbres nonti minu ting leu Da bikuk no bak kwar nya leu api hara nabi hi mem gima pingok ningonti lene Danti midibuhup no dima nihyet. 8 Midiba nitok bak noni ba, duubon noni nok bindo mem nindigsi nya. Dicom noni leu Ditde limwa nya ikieti leu api yoni mikan tut bipia Dani ne TUHAN ri.
9 Gino nabi gom cut ei niris noniti leu api buhup tunggwei ne Dani rino diris nabi dima. Da di TUHAN Di Dinyeng Jei Bibor midicom noni leu mben Israel ikieti. 10 Nabi dima kin no di hara nabi di pingok ningonti tunggwei dima yahacem itug ndei hukum di noyam. 11 Dibon nok gima yok ser hyema mben Israel yoom yonti ei minu ting leu Da cem bibindei ba, map kui yokti cem bi. Apino inok Ditde limwa nya lene Dani dinok ide Allah. Da di TUHAN Di Dinyeng Jei Bibor disimbot dat tu.>>
Nuh kin Daniel kin Ayub
12 TUHAN pai bida <<Na di tungwatu di ayaijo kikau bi e, 13 gino timiei minu hi ibon sisar ba, iba ingon di gom bibit Da bi lene midikes hukum ei minu dima dip. Midibindei timek ide njita leu yok lene midikes ninggum di buhun bibor kwei ei yok dip cem ba, dibiyai nimai bak mindhe-ndhe nya kin tungwatu nya cem. 14 Mbro nok gino Nuh kin Danelk kin Ayub nya ibong ei mpia dima lo, ibou ningai dima ide nibon munti di kei teu yonti njem innei he ba, ingwes ngun. Da di TUHAN Di Dinyeng Jei Bibor disimbot dat tu.
15 Hi rima dikes mindhe di niten-pos kwei mem gima ittem timiei di ibong ei minu dima leu api buhun bibor mem yok ba, hi di brim ningkek mem gima mbut binjiriek minu dima kan bi. 16 Mbro nok gino Nuh kin Danel kin Ayub nya ibong ei minu dima lo, deheng bitug hon Da di Allah di niyaijo kin Da di TUHAN Di Dinyeng Jei Bibor dinyeng bipia bit bon yoni iteu tungwa hi biningwes ngun bitut yonti imunggwom bat nya cem kan bi. Noro yonti njem-nnei he rino ingwes ngun a. Lene minu dima wer iggum ndigsi hanyen hak ug.
17 Hi rima dipinak pran kwei ei minu dima tug hon tentara di ikrau minggwen di sindem kei nya bikwei mem gima diba yok bicok tut tungwatu kin mindhe-ndhe nya leu minu dima cem. 18 Gino Nuh kin Danel kin Ayub nya ibong ei minu dima lo, deheng bitug hon Da di Allah di niyaijo kin Da di TUHAN Di Dinyeng Jei Bibor dinyeng bipia bit bon yoni iteu tungwa hi bitut yonti imunggwom bat nya cem bingwes ngun kan bi. Noro yonti njem he rima ingwes ngun a.
19 Hi rima dipinak nsuwer ajar kwei ei minu dima leu api dibindei ba, Ditde nigga biborti kui mpia kep tungwatu kin mindhe-ndhe bisar cem lo, 20 mbro nok gino Nuh kin Danel kin Ayub nya ibong ei sirima lo, deheng bitug hon Da di Allah di niyaijo kin Da di TUHAN Di Dinyeng Jei Bibor dinyeng bipia bit bon yoni iteu tungwa hi bitut yonti imunggwom bat nya cem bingwes ngun kan bi. Noro yonti njem he rima ingwes ngun tug hon ide nibon munti di kei nya.>>
21 TUHAN Di Ninyeng Jei Bibor pai <<Midikes Ditde hukum di buhun bibor ninyeng bitai ug ei minu ndig Yerusalem dip mem gima dibicok tut tungwatu kin mindhe-ndhe nya. Ba, hukum dima yok rino pran kin ninggum di buhun bibor kin mindhe di niten-pos kin nsuwer ajar. 22 Mpaba bihi ihallu leu ba, iteu imunggwom bat nya bingwes ngun bikwei ngat na lene ma ayok ayai kep yok. Gino angat ide nibon munti di kinei bibor bou ayai him ba, angon huk niti bipia cut igbit nijam di dikes hukum ei minu ndig Yerusalem dip, 23 leu api nani cem ma angon huk niti bipia gi diyai dibou tut yok di itug ndei hukum dima ne mun di igbit ri. Da di TUHAN Di Dinyeng Jei Bibor disimbot dat tu.>>