Nitri tut nabi pinai nitrowai nya
13
1 Lene TUHAN pai bida, 2 <<Na di tungwatu di ayaijo kikau bi e, ma apai kep nabi mben Israel nya di itri tut mun di mipek kep ei nidipti bu di kwei leu yonti ingon kanti. Ba, acuk yok bipia suar imiap Dani dihyet a.>>3 TUHAN Di Ninyeng Jei Bibor pai <<Buhun bibor mem nabi ngot di ingon mbum dima yok! Ide ningon kanti di imbot kep tut nya igyai leu yonti intin ba, ningat-hi-ngat di ingat cem nitrowai nitu he. 4 Je di mben Israel e, jide nabi dima yok ibon inyeng bi. Ba, idem kep nsien bigbehei di ilus-lus nyen ei minu ndig nigkumti nya he. 5 Igya ser mpia di ngug tig tti leusi nya ba, igikinding ngug tig nikineisi dima yok bi. Gima rino ei njap di Da di TUHAN dibindei ba, pran di biang hukum di dikes ei yok dip dima cut kwei lene yoni mingkiem ser Israel kan bi. 6 Ningat-hi-ngat di ingat nya ne nitrowai nitu. Mun di itri tut di mipek kep ei nidipti bu cem isuglai he. Ikon ighyet tut bipia mun di ipai sut nya ne ipai sut dihyet di disok ei yok dip lo, digicuk yok bi sren. Mbro nok gima lo, ingon ya mem gima ighyet di itri tut dima mipek kep mem yok! 7 Dipai biyok <Ningat-hi-ngat di jingat dima ne ningat-hi-ngat di nitrowai he ba, mun di jitri tut bipia mipek kep ei nidipti bu cem nisuglai he. Jipai bipia mun dima yok hagom ne Ditde nisok ei je dip rin lo, digipai mun hi bije nok gima bi sren! 8 Gima rino Da di TUHAN Di Dinyeng Jei Bibor dipai biyok: Jisuglai mun cem jingat ningat-hi-ngat di nitrowai he. Gima rino midikiju nok jide siceu. 9 Je di nabi di jisuglai sut mun di mipek kep ei nidipti kin ningat-hi-ngat di kwei leu jibou ngwakti di kwes bi cem e, midikes hukum ei je dip. Gino Ditde limwa nya di idem yam ei mem gima itri tut ide nikos tutti nya ne mijigwam bit yok bi. Mididip tut jinyeng leu daptar di mben Israel inyeng joti. Jingkwei hanyen ug ei jidihyei hanyen bi sren. Tug hon nisinati dima ne jikan tut bipia Dani ne TUHAN Di Ninyeng Jei Bibor ri.
10 Nabi nitrowai jen! Jibindei srawir Ditde limwa nya tug hon gi jipai bipia mun nyeng hagom mbut kin gi kei ba, mpia mbum-bra. Noro nok gima bi sren! Ditde limwa nya iba tig mma biwin ngug tig di ngkiem bi di mitti-tti nyen leu api je di nabi nitrowai jikwei ba, jiba cet kapur he bihwen kep. 11 Nabi nitrowai jen e, ngug tig dima milus bingwig. Dibindei ba, biget but mbras ba, hou sigau kin biget di mbras nok tig njep cem micut bihwen ngug tig dima, 12 leu api lus bingwig. Limwa nya yahagom mihig ser yam iba cet kapur he bihwen ngug tig dima mem mindei i?> >>
13 TUHAN Di Ninyeng Jei Bibor pai <<Midiba Ditde nigga biborti bikes hou sigau kin biget sigau kin biget di mbras nok tig njep kwei ba, dibihwen ngug tig dima bitimek hak. 14 Ditin ei mem gima didindei jide ngug tig di jiba cet kapur he bihwen dima bitti yon ba, dinggek bikinei-kinau leu api nikiou mijo brei bou jiyai him. Ngug tig dima milus bihwen je biyai nimai bak jahagom. Leu api jikan tut bipia Dani ne TUHAN ri.
15 Ngug tig dima kin je di jiba cet kapur he bihwen mijikan tut Ditde nigga je biborti yo. Leu api dipai bije bipia ngug tig kin je di jiba cet kapur he bihwen mijipror bijisar krebou. 16 Nabi nitrowai jen! Jitri tut bipia minu ndig Yerusalem bong kei gwam kei ba, mpia mbum-bra. Noro nok gima bi sren!>> TUHAN Di Ninyeng Jei Bibor simbot dat tu.
Nabi Yehezkiel tri tut nabi sop nitrowai nya
17 TUHAN pai <<Na di tungwatu di ayaijo kikau bi e, nogindini angig ayai kep sop di isrig jikieti di ibon yonti nok nabi sop dima. Ma asok kep yok ba, 18 abitri tut mun di Da di TUHAN Di Dinyeng Jei Bibor dipai sut yok biyok,
<Buhun bibor mem je! Lewo jicom li di mindur nya bijinap minghas di mindur nya di jibinggai jibou cem mem limwa nya yahagom leu binhyepo ibiyai nisindemti mem gima inyeng tak kep yo di hiter ide niyaijoti. Jijoi sut jinyeng tak kep Ditde limwa nya ide niyaijoti kin ide nimaisi cem. Lene jiba nisindemti dima bipek mun mem jenti. 19 Jihyet wer mpia hi tut Da ei Ditde limwa nya yoho bei leu binhyepo jibikam gandum barli nittun poi he ei jindati kin roti ninggop poi he. Jiyai nimai bak yo di ibon mun tunggwei bi nya. Jisindui sut yo di suar itug ndei nimai ba, igyaijo. Leu api jisuglai mun bak Ditde limwa nya apino iba ingon com je.> >>
20 TUHAN Di Ninyeng Jei Bibor pai bak sop di ibon yonti nok nabi sop dima yok <<Dingon mpo tut li di mindur di jibiyai nisindemti mem gima jinyeng bitak kep Ditde limwa nya igyaijoti kin imaisi dima. Midibrim li dima leu jinda krousi bidikwek yo di jinyeng tak kep yok dima leu jinda nsi bihigom ba, yoni mingwes ngun. 21 Midirik jide minghas di mindur nya cem biditeu Ditde limwa nya bingwes ngun leu jide nisindemti di sibut dima bijo ninno bijo kikau. Leu api mijikan tut bipia Dani ne TUHAN ri.
22 Jiba jide niris munti dima biyai yo di isingat di ijoi sut gima itug ndei mun di buhun leu Da bi nya ingon cun hak. Jibindei ba, yo di isibut nya ingon jei apino ibon sisar bijo kikau leu ba, ingwes ngun bi. 23 Nogindini ningat-hi-ngat nitrowai di jingat nya kin jide nisuglai sut mun di mipek kep ei nidipti bu nya hagom kes hon nohonti tu. Diteu Ditde limwa nya bingwes ngun leu jide nisindemti di sibut bibor. Leu api mijikan tut bipia Dani ne TUHAN ri.>>