TUHAN sigion kwar di tungwatu nya ikuk yok bak nya
6
1 TUHAN pai bida, 2 <<Na di tungwatu di ayaijo kikau bi e, ma acap nungug him ei minu Israel leu api abitri tut Ditde nisok tut hukumti di mem yoni biyok. 3 Ma acuk nungug nya kin mbigdip nya kin pimbien nya kin mbang briep nya tut mun di Da di TUHAN Di Dinyeng Jei Bibor dipai sut biyok. Ma acuk yok bingig itingou mem ba, yahati tut mun di dipai dima yok. Dipai dihyet di nijit bipia midipinak singau simeda mem gima bindei sar mpia di tungwatu nya ikuk yok bak kwar eisi nya. 4 Singau simeda dima minggek ide nimbar hum dok nya bingwig lene bindei kimbo ide nimbar hum dok di indig biei nggrai di ui-gwang kei eisi nya cem. Yo di ingat rin ei sirima yahagom mitug ndei nimai ei kwar di ikuk yok bak yoho bei. 5 Midibindei ba, mben Israel ide nimbiam ngut tti sinsiou ser mpia leu api midigimahap injum sinsiou ttai nimbar hum dok dima yok. 6 Minu ndig Israel hagom kin nimbar hum dok nya kin kwar di tungwatu nya ikuk yok bak hagom minggek sinsiou cem ba, siceu nya minjei nimbar di indig biei nggrai di ui-gwang kei eisi nya hagom ug ei dihyeisi ba, mun di ibon bou inda him nya hagom misar. 7 Tungwatu nya mimai sinsiou tirima-tirima apino yo di ingwes ngun nya mikan tut bipia Dani ne TUHAN ri.8 Midisindui sut ba, ibou poi he mingwes ngun leu nimai dima leu api intek gimahap srig ngkiai nya ikieti ba, 9 ibong ei ingkiaisi. Tirigi igwam ei ingkiaisi lene yoni migyok ngon kep Da bingon huk niti bipia dikes hukum ei yok dip ba, dibinim kep yok cemc drek dip gi ingon gom tut Dani bi ba, iba inghim biDa lene iba kwar di ikuk yok bak nya biluei Da cem. Leu api ingon him wei sut yonti njem hanyen tut mun nyeng hagom di kinei bibor kin gi suwok bibor di ibon tu nya. 10 Apino mijo nibreisi mem yok bipia Dani rino TUHAN. Nisok kepti di diyai biyok nya hagom nok ninos yokti di mikui-kausi bi sren.>>
11 TUHAN Di Ninyeng Jei Bibor pai <<Ma jingon ngguk ug! Ma jipim ug! Ma jiba jingon di ngguk bibor bipim tut mun di kinei bibor kin mun di suwok hagom di mben Israel ibon tu nya. Yoni mimai tug hon pran kin ninggum kin nsuwer ajar. 12 Yahagom mitug ndei Ditde nigga biborti. Yo di ibong ei ingkiaisi micut ei ninggwenti leu api imai. Yo di ibong dideu mimai ei pranti. Lene niken di jo mimai inggum. 13 Nimai ngut nya mijo sinsiou ei kwar di tungwatu nya ikuk yok bak nya ikieti cem ttai nimbar hum dok nya cem ba, imai sinsiou ei mbigdip di jo anai nya cem ei nungug dip gom-gom cem ei biei di nimeng nggrou gom-gom nibehei cem ei biei ndig behei cem bidem mpia di ibon midut ei nimbar hum dokti bak ide kwar di ikuk yok bak eisi nya hagom. Leu api tungwatu nya yahagom mikan tut bipia Dani ne TUHAN ri. 14 Igbit ri! Midisu dinda mem gima dibindei timek ide minu ba, wer ha he bong ei iggum ndigsi di jo ei nite bei mpia nibiho kikau ug bipek kin minu ndig Ribla di jo ei nite bei mpia nijjai. Midiba diyai ngat mpia di mben Israel ibong niti nya hi bi. Apino yahagom mikan tut bipia Dani ne TUHAN ri.>>