Israel nitimekti dideu su
7
1 TUHAN pai bida, 2 <<Na di tungwatu di ayaijo kikau bi e, Da di TUHAN Di Dinyeng Jei Bibor dipai bak dihyei Israel bipia gini ne jam dem mem minu dini titut yam niyaijo ningwig honti ri!>>3 TUHAN pai <<Israel e, nogindini ade njap ningwig honti dem mem na tu. Ma atug ndei ditde nigga biborti. Midimbus angonti bit leu ade nibon munti di suwok nya. 4 Dingondut na bidikos ser ade sisar kan bi. Dikes hukum ei na dip bit leu ade nibon munti di suwok di abon tu nya. Leu api ma akan tut bipia Dani ne TUHAN ri.>>
5 TUHAN Di Ninyeng Jei Bibor pai bak mben Israel <<Mun di buhun mijo-jo yam dip kep na. 6 Nogindini mun di hagom ngwig hon tu. Gini ne ayaijo ningwig honti ri. Nituti mem gima angwes ngun hi jo bu bi. 7 Je di mben di jibong ei minu dini e, mun nyeng hagom ngwig hon nohonti mem je tu. Nogindini nibon pestati ei nimbar hum dok ngot di jo ei nungug him bu bi. Niyok nisinsiou ei niti he rijo ba.
8 Jei bi ne atug ndei Ditde niggati di buhun bibor. Midimbus angonti bit leu ade nibon munti. Dikes hukum ei na dip drek dip mun di suwok hagom di abon nya. Dibuhup ade nibon munti di suwok hagom hanyen bina. 9 Dingondut na bidikos ser ade sisar kan bi. Dikes hukum ei na dip bit leu mun di suwok hagom di abon tu nya. Leu api mporo akan tut bipia Dani ne TUHAN rin ba, Dani rino midikes hukum ei na dip.>>
10 Njap di mun di buhun cut igkep mben Israel tau tu. Nisibutti digek tu. Tungwatu nya ide ninggei sut yonti kui bipek kin ninggram him tu. 11 Nisibutti kum eisi lene gima bindei ba, minggwen di ibikum ei nisibutti mang bibor ba, jiriek bu tu. Ide ndigban di inyeng tut nya kin inyeng di jei kin ide nisindemti di mipbor ngat hagom sar hak leu yok. Hi gi jo bi.
12 Nituti kwei haninyai ba, njap dima cem dideu tu! Nitri-nipek mun cig mitug ndei ningat nibikum eisi hi bi. Lewo Allah mikes hukum ei yo di yahagom dip. 13 Nitri-nipek mun cig mitug ndei nide mun di tri tu hanyen bi. Lewo Allah de nigga biborti micut igkep tungwatu nya yahagom. Yo di isibut nya cem mingwes ngun kan bi. 14 Pun mbrei nibimbiti mibong lene yahagom itin ei. Noro hi dima ug bikon pran bi. Lewo Allah de nigga biborti cut igkep yahagom ser tu.
Hukum micut igkep mben Israel drek dip ide sisar
15 Pran cut bidem puig hagom ba, nsuwer ajar kin ninggum jo bidem ig hagom. Tungwa tou rino ningat rin ei minu ndig nisai mimai ei pranti. Tungwa tou rino bong ei minu ndig ninsi mimai tug hon nsuwer ajar kin ninggum. 16 Bihi mingwes ngun binang ug ei nungug him. Yoni mingat rin ei nungug him bidem kep hakimoi nya di tungwatu yuhuk yok leu mbang briep nya. Yahagom milua drek dip ide sisar. 17 Tungwagom-gom ninda mbris ba, nibiau digit. 18 Yoni mijuk sinsun kron ba, idigit-digoi. Ikak ibou nta apino hiter ingwes pri gau yok drek dip ide nimmaisi. 19 Yoni micom ide mas kin perak ei puig sinon nok mumpiang. Lewo ei njap di TUHAN siber niggati ei yok dip ne bit bon mas kin perak dima teu yok bingwes ngun kan bi. Noro mas kin perak dima bindei ba, icut ei sisarti. Iba mas dima bimpu ingon priti bicut ba, igyem mas kin perak dima kep inggumti kan bi. 20 Nipou yo ne inggei sut ide tig permata di kei-kau-kei nya di ibimau yonti lo, iba tig permata dima bibon kwar di ikuk yok bak di suwok nya. Apino TUHAN bindei di ingon mpo tut ide ndigban dima.
21 TUHAN pai bak mben Israel <<Midisindui sut ba, ngkiai nya micoi bipos jide ndigban leu je. Nisibut cig nya mibrim ndigban jide sin jeti bibindei ba, map kui ndigban dima yoti. 22 Gino nipos mun cig nya inggek Ditde Ig ba, ibindei bimap kuisi lene midisu dinda mem gima dimpu je bi.
23 Minu hagom jo nisinsiouti. Niyai nimai biyamti kieng kep hagom ba, nimbuk tut yamti jo bidem minu ndig titut yam. 24 Midinduk ngkiai nya di isibut bibor nya kwei ba, ibong bidem jide ig hagom. Tirigi disindui sut ba, yo dima ibindei timek jide mpia di jikuk je bak Allah eisi nya lene jide pinai di mimbri kui ingkek nya migwam nidigitti drek dip. 25 Ningon nggukti kin ningon dahatti micut igkep yok leu api inggok nibong kei nigwam keisi noro igitau kep bi sren. 26 Mun di buhun kin nibimbiti di tibim tut nihyet di kinei mingkwei-ngkwei nyen kep je. Jahara bak nabi nya leu binhyepo itri tut ide ningat-hi-ngat di ingat nya bije lo, igipai mun bije kan bi. Imam nya cem ingginau limwa nya kan bi ba, nipingokti cem ngwig leu nibou nya tu. 27 Nibou ndig nya mipim kui jei lene nipmot di ya luei nohoti cem ningon dahat leu ba, limwa nya midigit-digoi ei ide nittinti. Midikes hukum ei je dip bit leu jide nibon munti nya hagom. Digwam nok nikei mem je nok gi jigwam nok nikei mem yo di hiter tu. Leu api mijikan tut bipia Dani ne TUHAN ri.>>