Yehezkiel kos nibou nta leu
5
1 TUHAN pai <<Na di tungwatu di ayaijo kikau bi e, ma aug yai singau simeda di nggwen kei kwei leu api abikak ahui nta kin abou nta hagom leu. Anai abou nta dima ei kiloti leu api akwas ei nittou nsi ningai. 2 Suar andig nittou nsi gom ei minu ndig dima ninggimau yon tirigi niyon ttai minu ndig dima kes hon leu tu. Aba ade singau simeda bikkin abou nta dima lene abimbut ba, abigahai minu ndig dima. Leu api akrau nittou nsi gi ningwigsi ba, agimahap ug ei hou him. Leu api midiba Ditde singau simeda buhuk bram gima. 3 Ma aba anda om abou nta poi mien bijo lene ma anggai gi hi dima ei ade sinsun ninghasti. 4 Leu api ayai abou nta dima poi mien bu ba, acom ei humti ba, asindui sut bingkiong hak ug. Hum midwim mpiati bikieng kep mben Israel hagom leu mpia di acom abou nta ug ei humti dima.>>5 TUHAN di ninyeng jei bibor pai <<Angat i! Gini ne minu ndig Yerusalem ri. Dikes minu ndig dini ei dihyeisi nahacan ngatti lene ngkiai ide minu di ibongti nok minu ninda rom jo ttai minu ndig Yerusalem. 6 Noro minu ndig Yerusalem rok Ditde nicukti ei su apino jo nibreisi bipia minu ndig dima kinei bibor dor njiriek ngkiai nya. Minu ndig dima gibit dihyet bi bidor njiriek minu ngkiai nya di jo ttai nya hagom. Minu ndig Yerusalem yai mun tunggwei dicukti nya bikou sut gi bit Ditde niggai serti nya.>>
7 TUHAN Di Ninyeng Jei Bibor pai <<Minu ndig Yerusalem e, angig atingou mem! Agibit dicukti nya kin diggai serti nya bi. Arok dicukti bibor ei apino munhyet mang bibor kim na dor njiriek ngkiai nya ba, ayai bram ngkiai dima yok ide niyai kepti nya. 8 Gima rino Da di TUHAN Di Dinyeng Jei Bibor dipai brei bina bipia ade siceu rino Dani. Midikes hukum ei na dip bou ngkiai nya igyai him. 9 Midikes hukum di buhun bibor ei ade timiei nya dip ba, gima ne dibon bak hiter bigyo kwei bipek ammani kep lene midibon nok gima bu bi sren. Diyai nok gima drek dip ayai munti di dingon mpo tut. 10 Apino ndigpoi nya mibui yonti imunggwom bat nya bigyem lene munggwom nya mibui ide ndigpoi nya bigyem yok. Gima rino midikes hukum ei yok dip ba, midibindei yo di ingwes ngun nya bintek gimahap nima ug-nima ug.
11 Dani ne Allah di niyaijo kin TUHAN Di Ninyeng Jei Bibor cem rin ba, ditri tut bipia midikes hukum ei na dip. Dikos ser ade sisar bi. Lewo abindei ba, map kui Ditde Ig tug hon ayai munti di kinei bibor nya di bindei ba, diyai ttin ningat tu. 12 Ade timiei nya nittou nsi gom mimai tug hon nsuwer ajar kin ninggum di buhun di hwen minu ndig dima. Lene siceu nya miba singau simeda bitot timiei ade nya nittou nsi gom bu ei minu ndig nisai. Lene midibindei nittou nsi gom bintek gimahap nima ug-nima ug bidiba singau simeda buhuk yok nyen-nyen.
13 Mporo atug ndei diggati kin dingon mpo tut nati kikau kep dingon bibou dingon cut ug e. Tirigi mun dima yok hagom cut igkep na leu su lene aba angon com bipia Da di TUHAN dimbrap bit na ba, digga bibor drek dip ade ningon di gom tut Dati bi. 14 Awer ig kum kroi ningkom ba, ngkiai nya di ibong ttai na miba ighyet bicig na. Bikwop yo di imbut binjiriek na miyoom yok leu na.
15 Gino digga na bidingon nggrom kep na cem bidikes hukum ei na dip cem lene ngkiai di ibong ttai na nya mingkek henha drek dip. Lene iba ighyet bicig na ba, gi ingat na lene ingon him wei sut na cem. 16 Dicok tut njita ade di atin ei nya hagom leu ba, disindui sut ade timiei nya bimai inggum. Yoni mitug ndei ningon di dut tut ninggumti ba, gima dem kep tibor nggwen di tibim yokti di bindei sar yok. 17 Ter leu ninggum di buhun bibor pima lene midiba nsuwer ajar di buhun bibor kin yo di isibut bibor kin pran bihwen ade timiei nya. Midiba mindhe di niten-pos biyai nimai bak amunggwom bat nya ningwig a. Da di TUHAN disimbot dat tu.>>