Minu Moab nisar ningwigsi
48
1 TUHAN Di Sindem Bibor di Allah Israel pai sut minu Moab <<Buhun bibor mem timiei Nebo lewo ide minu ndig lus tu! Siceu nya icoi bihwen Kiryataim leu bigyati ba, igya kep nide tentara nibousi di igya coi bitimek. Apino timiei minu ndig dima igwam nimmaiti. 2 Minu Moab ninyeng jeisi cut tu. Siceu nya igyai minu ndig Hesybon bigyati tu. Itin ei ingon kanti mem gima icok tut mben Moab yahagom hak ei sirima. Siceu mibindei ba, ighyet di kui yam ei minu ndig Madmen ntus. Lewo tentara nya injei siceu ndam minu ndig dima bihwen. 3 Amiap e, timiei minu ndig Horonaim yahara <Nibindei sar o! Nibindei timek o!>4 Minu Moab timek hak tu o! Munggwom mien ide naharati tibim kikau ba, timiei minu ndig Zoar nya imiap tu. 5 Amiap nihyet nipimti kak puig di kui ndam minu mien Luhit ba, nihyet nipim kui jeisi kak puig di juk ndam Horonaim ri. 6 Ipai biyam <<Jinang haninyai o! Jinang bijingwes ngun ug o! Jinang sindem dem kep nok keledai nehek nidorti ei iggum ndigsi o!>>
7 Minu Moab e, aba angon com ade nisindemti kin ade ninyeng tut ndigbanti he. Noro tini bu ne siceu nya mibindei timek na ri. Siceu mikon jide kwar Kamos bitut imam nya kin yo di inyeng jei nya bikri yahagom ug ei nicom yok ug eisi. 8 Minu ndig hagom timek lene hi di jo cem bi. Mbang briep nya kin briep bou him nya cem sar. Da di TUHAN disimbot dat tu. 9 Atas tig nibitto nimai jui mem minu Moab lewo jei bi ne minu dima timek krebou hak ug ri. Timiei Moab nya cem yahagom itti bingwig lene tungwa hi di bong ei sirima bi.>>
10 No di brim Ningkek tut midyai TUHAN de mungkun kei bi tug ndei nisigion noti. No di kus nide singau simeda di biyai nimai bak tungwatu bi cem tug ndei nisigion noti.
Siceu mibindei sar minu ndig ngot di jo ei minu Moab
11 TUHAN pai <<Minu Moab bong kei gwam kei habiei nipou su. Siceu nya icom noni ug ei ningkiaisi bigyo. Noni dem kep ba anggur ngei di isindui sut bijo ei aigmui mindhe ngkekti di isiber di srig ba anggur ngei hiterti bi. Anggur ngei dima no nui tun ba, nyop kei yo.
12 Noro tto bou dem leu api midicuk tungwatu bisiber minu Moab noyam kin ba anggur ngei di isiber leu dibijig bingwig ba, ibindei kimbo cem. 13 Mben Moab inso ide kwar Kamos ninghapti. Noyam kin mben Israel di inso ide kwar Betel di iba ingon com pima ninghapti. 14 Pinjoi ndig di mben Moab e, nggon rino jiba jinsi bbed-bau bipai <Nyeni ne nihwen kep mun cig rin ba, mimbri kui ningkek cem ninda jo kep nikon pranti ninno tu, i?> 15 Lewo siceu nya ibindei sar minu Moab kin minu ndig nide nya bigyai nimai bak nide tentara di mimbri ngat nya tu. Dani disimbot dat tu. Dani ne nibou ndig ba, TUHAN Di Sindem Bibor ri. 16 Jei bi ne minu Moab timek lewo mun di buhun di micut igkep noni son dideu dimbou hui tu.
17 Je di ngkiai nya di jibong dideu minu Moab di jikan tut ninyeng jeisi di tibim bidem minu nya e, ma jipim tut noni! Jipim ba, jibwos-bwos nyen <<Minu Moab ninyeng tak kep mun nyeng hi bu bi o! Nide ninyeng jeisi kin nisindemti pror tu o!>> 18 Je di timiei minu ndig Dibon e, ma joom je leu jide mpia di yai ninyeng jei ba, jigwam ei dihyeisi kin atriemti. Lewo no di nggek ade minu Moab kwei krau su ba, noni mibindei timek jide tentara nibousi nya hagom ri. 19 Je di timiei minu ndig Aroer e, jiya puig nghas bijiyok jiyai kep! Jihig yo di inang di illu nya <Mindei rino cut igkep je i?> 20 Yoni ibuhup <Minu Moab cut ba, bon ninyeng bu bi su. Gima rino ma jipim tut ndina. Jipai sut bidem yo di ibong dideu Minyei Arnon ninggup ug bipek kin nibrig bipia minu Moab timek tu.> >>
21 <<Hukum tau su bicut igkep minu ndig ngot di jo ei briep bou him tu. Minu ndig dima yok rino Holon kin Yahas kin Mefaat, 22 kin Dibon kin Nebo kin Bet-Diblataim, 23 kin Kiryataim kin Bet-Gamul kin Bet-Meon, 24 kin Keriot kin Bozra. Minu ndig di ting kin gi dideu yam ei minu Moab tug ndei hukum tu. 25 Minu Moab de nisindemti cut tu ba, ninyeng jeisi timek hak tu. Da di TUHAN disimbot dat tu.>>
Minu Moab tug ndei noom ug ei dihyeiti
26 TUHAN pai <<Abindei minu Moab ba, nibou ngwak sibui lewo kon nonti ei Doho bei. Noni mirim-rim nyen ei ninjimti apino tungwatu nya mipa ndip. 27 Nipou yo ne minu Moab pa ndip mben Israel bi e? Minu Moab bibon mben Israel dem kep nok gi ikat no di bit yo di inggimang nya pimo bi e?
28 Je di timiei minu Moab e, jinang bijikes minu ndig jide nya ei leu ba, jibong ei mbigdip di bon hak nggreti nya bijinoyam kin hakimoi mbrei di ngot naham ei hak nggreti di anai nya. 29 Jingon jei bibor! Dimiap tut gi jinggei sut jenti kin jingon di jei bibor cem ba, jikon jenti bijillei-lau sut jenti cem! 30 Da di TUHAN dikan tut jingon jeisi. Jihyet nok bu tan lene jibon munti nya bon ninyeng bi. 31 Gima rino dipim kui jei sut jeni kin timiei minu ndig pmem di Kir-Heres cem jahagom. 32 Midipim tut timiei minu ndig Sibma nindig dor njiriek leu timiei minu mien Yaezer nya. Sibma dem kep ba anggur kioi di ita di ninda nya dwim kikau ug ei Igpong Nsim nite hi ba, nitingti ug ei Yaezer. Noro tini bu ne dibindei sar ningat di ngat mem nijam mpia ngei nya kin ba anggur ngat nya hagom tu. 33 Niba ningon di llei bimbos-hi-mbosti ntus hak leu minu Moab di nnum-kei tu. Dibindei ba, ba anggur ngei di biam kwei leu mun di ikimut ba anggur ngat eisi ba, pingge leu su. Tungwa hi di kimut anggur ngei kin gi ba ningon di llei bimbos-hi-mbos bi.
34 Timiei minu ndig Hesybon kin Eleale nya ipim ba, ighyet di ipim dima tibim kikau ug ei Yahas bimiap. Lene timiei Zoar kikau ug bipek kin Horonaim kin Eglat-Selisia nya cem imiap ipimti a. Ipim kep Minyei Pmot Nimrim di pingge leu yok tu. 35 Midibindei ba, mben Moab ikes inda tut gino ibon midut nindig mindhe-ndhe nya ei humti ei mpia di ikuk yok bak kwar eisi nya. Da di TUHAN disimbot dat tu.
36 Timiei minu ndig Kir-Heres kin Moab yahagom ide mun di inyeng tut nya hagom sar hak tu. Dingat mun di cut igkep yo dima lene dingon ngguk tut yok dem kep no di ba porei bimiep doia ningon nggukti. 37 Yahagom ikak ibou nta kin yuhui nta ba, idat inda pang nya bijuk sinsun kron di bindo tut ide ningon nggukti tu. 38 Nihyet nipim ningkom he rino imiap bidem ig ninjek hu kwei kin biyati nya. Lewo dibindei ki minu Moab noyam kin dibijig di ikou bicom tu. 39 Minu Moab timek bindung-ndiem tu! Timiei Moab immai bibor! Ipim lewo tungwatu nya ighyet kinei sut ba, ngkiai nya di ibong ttai nya ipa tut no. Da di TUHAN disimbot dat tu.>>
Bit bon mben Moab ingwes ngun kan bi
40 TUHAN pai <<Mben ngkiai gom mikwei bisus minu Moab noyam kin ha krubrig di cut bikieng ninyehei bisus mun di yem. 41 Yo dima migyai minu Moab kin tentara nibousi di igya coi nya bigyati. Tentara Moab nya mittin bibor noyam kin sop di sindi ninghim dut bigwam tut munggwom. 42 Minu Moab timek bingwig leu ba, nok minu di hi ninyeng tak kep bu bi. Lewo ikon yonti bou diyai him. 43 Mun di bindei ningon di ttin biborti kin ndep jui kin bon nya srin ser inangti. 44 No di nang leu mun di biyai ningon ttin biborti micut ei ndep juiti ba, no di ningwes ngun leu ndep jui dima mibiam bon a. Mun dima yok hagom micut igkep mben Moab ei nituti di dikos tut ei mem gima dibindei sar yok. 45 Nikinei-kinau nya ipri binang ba, yuug gwam coi Hesybon leu binhyepo ingwes ngun lo, hum sindi yem minu ndig dima bitut nibou ndig Sihon de ig nibou ndig cem. Hum dima cok tut minu Moab ninghas him kin nungug him ba, nikon kep pran cig dima yok itimieisi hagom sar bingwig tu. 46 Buhun bibor mem mben Moab! Dibindei sar timiei minu Moab di ikuk yok bak Kwar Kamos yahagom leu api siceu nya ikat munggwom di ide nya nok yo di isima biyuug sut. 47 Noro ei nijam gi nidipti bu lene midibindei minu Moab bibong kei bigwam kei nok gi nipou hanyen. Da di TUHAN disimbot dat tu!>>
TUHAN mibindei ba, mun di buhun bibor dima hagom micut igkep minu Moab.