TUHAN kes hukum ei mben Amon dip
49
1 TUHAN pai sut mben Amon <<Nggon rino yo di ikuk yok bak Kwar Milkom igyai dihyei keret Gad di igyati lene ibibongti cem i? Mben Israel bihi ikon pran gau minu dima bi e? 2 Noro tto bou dem leu api midibindei timiei minu Amon de minu ndig pmem Raba ba, imiap pran nigwei di bong yo. Minu ndig dima mitti sinsiou ba, hum yem minu mien ngot di jo ttai nya hagom bingwig. Leu api mben Israel igyai dihyei di ide hanyen leu yo di nipou igyai di igyati pima inda nsi. 3 Je di mben Hesybon e, ma jipim lewo minu ndig Ai timek tu! Sop timiei minu ndig pmem Raba jen e, ma jipim kui jei! Ma jijuk sinsun kron di bindo tut jingon di ngguk. Ma jiba jingon tai-tai bou bittei yam kui-juk nyen. Siceu mikat jide Kwar Milkom bitut nide imam nya kin yo di igya kui nibou ndig ninyeng tak kepti nya yahagom bicom yok ei ingkiaisi! 4 Je di jingon gom bi e, nggon rino jinggei-nggwang tut jide mbang briep di nnum kei nya i? Mindei rino bindei di jiba jingon com jide ndigban di jinyeng tut nya ba, jipai bipia hi di brim ningkek bihwen je bi i? 5 Midibindei ba, ngkiai di isibut bibor nya mikwei leu minu di gahai dima kou kep je ri. Jinang ba, tungwagom-gom nggok puig mem nonti biningwes ngun. Lene bit bon hi dima nduk je hanyen kwei kan bi.6 Noro ei nijam gi nidipti bu ne dibindei ba, mben Amon ibong kei igwam kei hanyen. Da di TUHAN disimbot dat tu.>>
TUHAN kes hukum ei mben Edom dip
7 TUHAN Di Sindem Bibor pai sut mben Edom <<Mben Edom ipmem bat nya imiep ingon ba, ingon ki bi cem e? Bit bon yo di ipingok kep ingonti ipingok ingonti bu kan bi e? Ide ningon ki pror leu yok tu e? 8 Je di timiei minu Dedan e, ma jikiek je kep jinghim dip bijinang! Juug ba, jiku je. Leu dibindei timek yo di intun Esau him. Tto bou dem mem gima dikes hukum ei yok dip tu. 9 Gino tungwatu ipuk ba anggur ngat lene iba inda om bihi bijo ei. Gino no di nggimang igkei kwei nggimang mem mmun lene puk igbit nijoi sutti he. 10 Noro dicok tuto yo di intun Esau him ide mun di ima nya hagom bipwoi hak leu yok. Lene dikwek mimun tut ide mpia di iku yok eisi nya tut yok apino dem mem gima iku yonti bu bi. Dibindei sar mben Edom bitut ide bat nya kin yo di ibong dideu yok nya yahagom tu ba, hi di ningwes ngun bi.
11 Je di mben Edom e, ma jikes jide moibihi nya biDa leu api midinyohou yok. Ma jisindui sut ba, kibom jide nya cem iba ingon com Da.
12 Yo di idem mem gima itug ndei hukum bi nya itug ndei hukum tu. Gi nok lene mijitug ndei hukum bi e? Ningat ne jeni cem mijitug ndei hukum! 13 Deheng bitug hon Danti dinyeng bipia minu ndig Bozra nok mpia di tungwatu igyai ttin ba, nok iggum ndigsi cem. Tungwatu nya mipa tut ba, iba ninyeng bisigion yam cem. Minu mien ngot di jo ttai nya mitti sinsiou bihigom bijo ninno bijo kikau. Da di TUHAN disimbot dat tu.>>
14 Da di Yeremia dipai <<Je di mben Edom e, diyai nisokti dini leu TUHAN. Noni sok nihyet bak ngkiai nya bicuk yok mem gima imbus ide tentara nya keyam ba, itin ei mem gima injei bihwen je ri. 15 TUHAN bindei ba, ayai nisindemti bi leu api tungwatu nya ighyet wer mpiahi tut je cem. 16 Jide ninggei sut jenti ris je tu. Hi gi ttin tut je bit leu jide nikan hukti bi. Jigwam ei tig nggreti ting bibor ei nungug dip. Mbro nok gino jiwin jide ig ei mpia di anai bidem mpia di ha krubri tot naham eisi lo, TUHAN mibindei juk je leu jigwamti dima yo. TUHAN rino pai mun dima yok hagom tu.>>
17 Lene TUHAN pai <<Mun di buhun di micut igkep minu Edom buhun bibor he. Apino bikwop tungwagom-gom di mbut binjiriek mpia dima ne midigit tut biningon ttin. 18 TUHAN mibindei sar minu Edom noyam kin gi Noni bindei sar minu ndig Sodom kin Gomora bitut minu mien ngot di jo ttai nya. Hi di bong ei mpia dima bu bi. Da di TUHAN disimbot dat tu. 19 Midikwei ba, dibindei mben Edom binang kros leu itimieisi dima noyam kin singa di hei kwei leu baham tindurti ei Minyei Yordan nyai ba, kwei ndam minta nidumti di domba nya igyem kep minta eisi. Leu api mididimig nibou gom mem gima bie tut mben dima. Tou rima ibinai kin Dani i? Tou rima mimbri kui ningkek bibon munhyet bit Dani i? Nibou hi di sindem mem gima hwen bit Dani nonaha e? 20 Gima rino ma jimiap kep mun di ditin ei dingon kanti tut mem minu Edom kin mun dino dibon bak timiei minu ndig Teman ug e. Siceu nya mikri munggwom di ide nya inda biyuug sut. Lene tungwatu nya yahagom mittin tut bibor. 21 Mpe dino minu Edom cut lene tungwatu nya mimiap nibimbi di nindig bibor di bindei ba, dihyei dini ugwa-kwei. Timiei ighyet di yahara nya mitibim kikau ug bipek kin Muk Lipigya. 22 Siceu micut kwei bisus minu ndig Bozra noyam kin ha krubri di kieng ninyehei bicut bisus mun di yem a. Ei njap dima ne mben Edom mittin bibor bidem kep sop di ninghim dut di gwam tut munggwom a.>>
TUHAN kes hukum ei minu ndig Damsyik dip
23 TUHAN pai sut mben Damsyik <<Timiei minu ndig Hamat kin Arpad ingon ku yonti ba, idigit lewo imiap tut mun di kinei. Ingon tai-tai bou ba, ingon bos-bos nyen cem bidem kep muk ngwa dip di roi ug roi kwei ninyen he. 24 Timiei Damsyik nya inghuisi jet hak ba, iba ingon di ttin bibor binang. Ninggwenti kin ninghuisi weisi hwen yok bidem kep sop di ninghim dut di gwam tut munggwom a. 25 Minu ndig di nipou yo ninyeng jei ba, ninggei ngwig lo, tini bu ne mpia ntus ba, hi gi bong ser bi. 26 Njap dima ne minu ndig Damsyik de pilei nya mimai kak puig di mbut ei minu ndig dima hagom. Lene siceu nya mibindei timek nide tentara nya hagom cem. 27 Midindig ngug tig ei Damsyik nya hagom. Lene hum dima yem Nibou Ndig Benhadad de ig nibou ndig cem bingkiong. Da di TUHAN disimbot dat tu.>>
TUHAN kes hukum ei keret Kedar kin minu ndig Hazor dip
28 TUHAN pai sut keret Kedar bitut hanjop di Hazor ninyeng tak kep nya di Nebukadnezar di nibou ndig minu Babel yai di yati tu nya <<Nebukadnezar e, ma anjei siceu lene ahwen keret Kedar ba, abindei sar yo di ibong nite mpia nipriti! 29 Ba, apos mindhe nimuhup tu di ide nya di nok domba nya kin unta nya bitut prak meng di ide nya kin mun nyeng di joti nya hagom. Lene ambriom yok <Ningon ttin biborti kieng kep je o!>
30 Je di mben Hazor e, Da di TUHAN disok kep je jikiju bijipri leu minu ndig dini ba, jiku je ei minu ting. Nebukadnezar di nok nibou ndig mem minu Babel kos tut mem gima njei siceu bihwen je tu. Ba, noni pai, 31 <Jikwei ba, yuug bihwen yo di ikan bipia ibong nyahan igwam nyahan dima! Minu ndig di ide jo bas hak lewo bon dimbou pmem kin ngkimom nitu nibikibi dimbou pmemti cem hi bi.> >>
32 TUHAN pai bu bak Nebukadnezar <<Apos unta di ide nya bitut mindhe-ndhe nimuhup tu di ide nya hagom! Dibindei ba, yo di ikos ibou di cun dima yok intek gimahap ug ei tirima-tirima. Dikes mun di buhun leu nima kwei-nima kwei ei yok dip. 33 Hazor nok mpia di ngoi-nga di isindui bijo hak ei bijo ninno bijo kikau binok mpia di nsien bigbehei nya iku yo eisi cem. Hi gi bong ei sirima bu bi sren. Da di TUHAN disimbot dat tu.>>
TUHAN kes hukum ei mben Elam dip
34 Tirigi Zedekia kui bigwam nok nibou ndig minu Yehuda jei bigyo lene TUHAN Di Sindem Bibor mbrap bit da tut minu Elam. 35 Noni pai <<Midiyai nimai bak yo di ikri tibor kan di ibindei dino minu Elam sindem bibor nya yahagom. 36 Dimiep hou nimig leu nima kwei-nima kwei ba, dibihwen Elam. Dibindei ba, timiei Elam nya intek gimahap ug ei tirima-tirima ba, ibong ei ingkiaisi ei dihyeisi dini nisurti-nipekti. 37 Dibindei ba, mben Elam ittin siceu di ijoi sut igyai nimai biyok nya. Digga yoni bibor ba, dibindei timek yok. Dipinak tentara di ikon pran bit yok nya bihwen yok bingwig bibor hak. 38 Diya kep nibou ndig di ide nya bitut yo di igya kui yok nya bitimek ningwig a. Lene diwin Ditde banggo mbrei ei minu di ide dima. 39 Noro ei nijam gi nidipti bu lene diyai nibong kei nigwam keisi bak Elam hanyen bu. Da di TUHAN disimbot dat tu.>>