SRAT NABI YESAYA
NIHYET GI BIBIE TUT
Srat Nabi Yesaya pai sut nabi di ninyeng jei gom di bong ei minu ndig Yerusalem mem nijam gi nimuhwindaningai nipou tirigi Yesus srek bigyo. Srat dini bon hanjop nsi ningai.
1. Pasar 1-39 pai sut nijam di mben Asyur di isindem bibor icug timiei Yehuda nya bitin ei mem gima ikon pran bit yok. Jo nibreisi mem Yesaya bipia mben Asyur di isindem bibor di itin ei bikon pran bit yok nok mun di buhun bibor bi. Noro timiei Yehuda nya ide sisar kin gi ibit Allah nihyet ba, iba ingon com Noni bi dima nok mun di buhun bibor mem yok. Gima rino Nabi Yesaya ba nihyet di ten kin niyai munti nya bisok kep yok kin ide nibou nya leu binhyepo igyaijoti bit leu Allah ningon kanti ba, igyai mun di igbit cem. Noni sok kep Allah de limwa nya bipia gino itingou nam ser nihyet lene mun di buhun bibor micut igkep yok apino itimek bingwig. Yesaya mbot kep tut nijam di nidipti bu mpe di tungwatu dihyeisi dini hagom ingon kwes kin yam leu api nibou ndig gom di ntun Daud him ninyeng mitak kep yok.
2. Pasar 40-55 pai sut nijam di timiei Yehuda nya imang bibor isima hak ei ingkiaisi ei minu Babel leu api bit bon ingwes ngun kan bi. Nabi Yesaya tri tut biyok bipia Allah kos dat ningon kanti mem gima kwek Nide limwa nya bibuwak yok kwei ei minu ndig Yerusalem leu binhyepo ibong kei igwam kei ei sirima hanyen. Hanjop nsi dini pai sut Allah di nok TUHAN di ninyeng tak kep nibohon tungwatu dihyeisi dini hagom. Ningon kanti mem Nide limwa nya rino Noni mipinak yok ndam mben dihyeisi dini hagom rin leu binhyepo yo dima igyai ningon nggei-hi-nggei tug hon mben Israel. Ayat hi pai sut TUHAN De Awak ba, bon ninyeng ei Gi Preu Nitimieiti mem nye di mbusyamei nya.
3. Pasar 56-66 pai sut nihyet di Yesaya tri tut bak timiei Yehuda nya di ingkwei hanyen kwei ei minu ndig Yerusalem tu. Yo dima isuar tungwagom di miwin kep ingonti tut mun po Allah preu ei mem yok pima hanyen. Ayat dini yok bidip huk tungwatu nya tut ingon di sren kin nikei nikos tutti nya di sren kei nya kin nisinati mem gima ibigyok ngon kep Njap Nigwam Kep Ninghuisi kin midut di ibon ei nimbar hum dokti kin nadi cem. Ayat di bon ninyeng rino 61:1-2. Yesus ndat kep ayat dini tut Allah ningon kanti mem Noni tirigi kinyon ei Nide midyai nyati.
Nirop Ninda Ndigsi
Yesaya sok kep yok bipreu ei mem yok 1:1--12:6
Hukum di micut igkep ngkiai nya 13:1--23:18
Allah mbus tungwatu dihyeisi dini hagom ingonti 24:1--27:13
Nisok kep yokti kin nipreu ei mem yokti hi kin bu 28:1--35:10
Mben Asyur ikon pran bit Nibou Ndig Hizkia ei minu Yehuda 36:1--39:8
Nihyet di biwin kep Allah de limwa nya ingonti tut mun di Noni preu ei mem yok 40:1--55:13
Nabi Yesaya nisok kep yokti kin Allah nipreu ei mem yokti 56:1--66:24