TUHAN nisok tut minu Filistinti
47
1 Nipou tirigi nibou ndig minu Mesir njei bihwen Gaza bigyo lene TUHAN mbrap bit da tut minu Filistin. 2 TUHAN pai <<Angat i! Minyei biam kwei leu nite bei mpia nijjai ba, kui mpia bidem kep minyei ndig di su bihwen minu dini bitut mun di joti nya kin minu ndig nya bitut timiei di ibong niti nya cem. Tungwatu nya yahara nimpu yokti ba, limwa nya yahagom mipim nggruet. 3 Yoni imiap kuda nidor sindemti nibimbiti kin kroba pran nibimbiti kin kroba dima nimig nibimbiti ei itingou nsi. Ndigpoi nya inghuisi jet leu ba, igingkwei hanyen binggok imunggwom bat nya bi. 4 Lewo tto bou dem mem gima siceu nya ibindei sar mben Filistin titut yam tu. Leu ba, hi dima dem mem gima mpu minu ndig Tirus kin Sidon bi. Da di TUHAN midibindei sar mben Filistin di niken-ken di itimieisi leu Mios Kreta. 5 Ningon ngguk biborti cut igkep timiei Gaza nya. Timiei Askelon nya igwam bibbwe ei yamti. Mben Filistin di niken-ken nya ingon ngguk kikau bipek apig bu i? 6 Jahara <TUHAN de singau simeda e, ma ahwen nye bipek apig bu i? Ma angkwei hanyen ei ahamti ba, agwam kep anghuisi ei sirima hak ug!> 7 Noro gino dicuk singau simeda dima mem gima ug tot timiei Askelon kin timiei muk nipimat nya tu lene notou singau dima gwam kep ninghuisi i?>>