TUHAN nihyet di sok mem mben Israel di ibong ei minu Mesir
44
1 Lene TUHAN pai bida tut mben Israel ngot di ingat rin ei minu Mesir di ibong ei minu ndig Migdol kin Tahpanhes kin Memfis kin hanjop di jo nibiho. 2 Gini ne TUHAN Di Sindem Bibor di Allah Israel nihyet di sok mem yok rin, <<Jingat mun di buhun di dikes kwei ei minu ndig Yerusalem kin minu ndig ngot gi nindigsi nya ei Yehuda dip bou jiyai him tu. Minu ndig ngot dima timek ningwig tu ba, hi bong ser bi kikau kwei bipek ammani kep. 3 Mun di buhun dima cut igkep yok lewo timiei di ibong eisi ibon sisar apino sisar dima bindei ba, digga yok. Ibon midut nindig mindhe-ndhe ei humti mem gima ibikuk yok bak kwar nya di nipou ne yonti kin jeni kin jidigup bat-jidigai bat nya jahagom jikuk je bak bi sren. 4 Dipinak Ditde awak di nabi nya ndam je bijo kikau leu binhyepo iggai ser je tut jide nibon munti di kinei bibor di dingon mpo tut dima. 5 Noro jikou sut gima jimiap kep dihyet. Jingig jitingou mem bi. Jikou sut gi jikes hon nibon midut di kinei bibor nya tug hon gi jinding mindhe-ndhe ei humti ba, jibikuk je bak kwar nya. 6 Gima ribindei di disiber Ditde nigga biborti ei minu ndig ngot di jo ei Yehuda kin puig ngot di mbut ei minu ndig Yerusalem dip ug a. Dindig hagom bindung-ndiem ba, ngoi hak cem. Ba, jingat gima bou jiyai him tu.7 Ba, nogindini Da di TUHAN Di Disindem Bibor di Allah Israel dihig ser je bipia nggon rino jibon mun di binduk mun di buhun di nindig bibor dima ei jenti dip i? Jijoi sut gima jibindei sar pinai nya kin sop nya kin munggwom nya kin munggwom ngwoi nya yahagom leu ba, yo di ntun mben Israel him hi niyaijo bu bi e? 8 Nggon rino jibon kep mun di bibon diggati nya i? Jikwei bong ei minu Mesir di jingkiaisi leu api jikuk je bak kwar nya hanyen bu. Jibon midut nindig mindhe-ndhe ei humti ba, jibikuk je bak timiei minu dini ide kwar nya! Nggon rima jibindei timek jenti bijibindei ba, ngkiai nya yahagom ighyet kinei sut je ba, iba jinyeng bisigion yam i? 9 Jibbwe ser mun di kinei hagom di jidigup bat-jidigai bat nya kin nibou ndig minu Yehuda nya kin itnem bat nya kin jeni kin jitnem bat nya jibon ei minu Yehuda kin puig ngot di mbut ei minu ndig Yerusalem cem tu e? 10 Noro jigoom kep jenti bi kikau bipek ammani kep. Jikon dinyeng ba, jigibit Ditde nicukti nya di diyai bije kin jidigup bat-jidigai bat nya bi.
11 Gima rino Da di TUHAN Di Disindem Bibor di Allah Israel midihwen je bidibindei timek minu Yehuda titut yam. 12 Lene gino timiei Yehuda niken-ken di igyaijo nya no ibungwam ndam gima yuug bibong ei minu Mesir lene yo dima yahagom misar. Ndigpoi nya kin munggwom nya yahagom mimai ei minu Mesir tug hon pran kin ninggum. Tirigi tungwatu ingat yok lene igyai ttin cem ighyet kinei sut yok cem ba, iba inyeng bisigion yam. 13 Midikes hukum ei yo di ibong ei minu Mesir nya dip noyam kin gi dikes hukum ei minu ndig Yerusalem dip. Yoni mimai ei pranti ba, ninggum kin nsuwer ajar cem mibindei ba, imai drek dip. 14 Timiei Yehuda niken-ken di igyaijo nya di yuug bong ei minu Mesir hi dima ningwes ngun ba, niyaijo cem bi. Mbro nok gino yahagom igyok ingon mem gima ingkwei hanyen ug ei itimieisi ei Yehuda lo, ingkwei hanyen bi sren. Ibou poi di ingkwei hanyen rino yo di inang bipri bibie.>>
15 Mpe dima lene imang bibor ikwei ngat da. Yo dima ne pinai ngot di ikan lo, itnem bat nya ibon midut nindig mindhe-ndhe ei humti ba, ibikuk yok bak kwar nya kin sop di igya nyen ei sirima bitut limwa mben Israel di ibong ei Patros ndam minu Mesir nibiho ri. Yahagom ipai bida, 16 <<Nikou sut gi ningig nitingou mem mun di apai binye gau TUHAN ninyeng dima. 17 Miniyai mun nyeng bit leu nyenti ningon kanti. Minibon midut nindig mindhe ei humti ba, nibikuk nye bak Nibou Ndig Sop Gwamti bijo kikau. Nikiber ba anggur ngei nok mun di nibikuk nye bak kwar dima noyam kin gi po nidigup bat-nidigai bat nya kin nyende nibou ndig nya kin nyende nibou di inyeng jei nya ibon bidem minu ndig ngot di jo ei minu Yehuda kin gi ibon bidem puig di mbut ei minu ndig Yerusalem tu pima. Mpe dima njita dem mem nye ba, nibong kei nigwam kei lene mun di buhun cut igkep nye cem bi. 18 Noro hon kep tirigi po nikes ninda tut nibon midut nindig mindhe-ndhe ei humti mem gima nibikuk nye bak Nibou Ndig Sop Gwamti ba, nikiber ba anggur ngei mem gima nibikuk nye bak bu bi pima lene nyeni nuhui mbum. Nyende limwa nya imai ei pranti ba, imai inggum cem.>>
19 Lene sop dima yok ipai <<Nijjep bat nya ice tut bipia nikang roti ninggop di nibon ningwes noyam kin Nibou Ndig Sop Gwamti dima cem nibon midut nindig mindhe-ndhe ei humti cem nikwas ba anggur ngei mem gima nibikuk nye bak nyende kwar dima hagom cem tu.>>
20 Lene dipai bak pinai nya kin sop nya di ibuhup dihyet nok gima, 21 <<Jikan bipia TUHAN kan tut jidigup bat-jidigai bat nya kin jide nibou ndig nya kin jide nibou di inyeng jei nya kin ide limwa di timiei Yehuda nya kin jenti jide midut nindig mindhe-ndhe ei humti mem jibikuk je bak kwar ei minu ndig ngot di jo ei Yehuda kin puig ngot di mbut ei minu ndig Yerusalem po jibon pima bi e, he Noni bbwe ser hagom tu e? 22 TUHAN om ningonti tut gi ngat jibon munti di kinei kin gi suwok dima bu bi tu. Gima rino nogindini jitimieisi timek tu. Tungwatu ibong ser bu bi noro iba minu dima ninyeng bisigion yam. Yo di ingat gima yok nya igyai ttin ningat tu. 23 Jide nibon midut nindig mindhe-ndhe ei humti ba, jibikuk je bak kwar nya cem jibon sisar tut TUHAN cem jigibit Nide nicuk jeti nya bi cem hagom bindei ba, njap di ammani jitimieisi timek tu. Tungwatu ibong ser mpia dima bu bi. Noro iba minu dima ninyeng bisigion yam. Yo di ingat gima yok nya igyai ttin ningat tu.>>
24 Leu api dipai bak yo dima yahagom noro dibipai pijum bak sop di ide nya je di limwa Yehuda di jibong ei minu Mesir e, ma jingig jitingou mem TUHAN nihyet. 25 TUHAN Di Sindem Bibor di Allah Israel pai <<Jiya tut jitnem bat nya ba, jiba neheng bipreu ei mem Nibou Ndig Sop Gwamti bipia mijibon midut nindig mindhe-ndhe ei humti ba, jikiber ba anggur ngei ei noho bei nok mun di jibikuk je bak noni cem. Lene jiyai bipek kep jipreu eisi dima tu. Gima rino nnaba jiyai mun bipek kep jide nipreu ei mem noti tu dima hak ug! 26 Noro je di mben Israel di jingat rin ei minu Mesir e, nogindini ma jingig jitingou mem mun di dipai bije. Da di TUHAN deheng bitug hon Danti dinyeng di jei bipia midisindui sut ba, bit bon hi dima meheng bitug hon Da dinyeng bu kan bi. 27 Midibindei ba, jitug ndei mun di buhun ba, jibong kei jigwam kei bi kikau bibou jahagom jimai ningwig ug e. Jimai ei pranti ba, jimai tug hon nsuwer ajar cem. 28 Ibou poi he rima ingwes ngun bingkwei hanyen leu minu Mesir kwei ei minu Yehuda. Lene timiei Yehuda nya di ingat rin ei minu Mesir yahagom mingon hukti tut tou rino nihyet pek kep mem yok i? Danti dihyet e, he yoni ighyet e? 29 Midikes mun di buhun bibor ei je dip ei mpia dini leu binhyepo dibindo bindo bije tut hukum di dikos tut bit leu dingon kanti tu. Ningat ne hukum dima micut igkep je ri. 30 Midikes Hofra di nok nibou ndig mem minu Mesir ei nide siceu nya di igyai nimai bak noni indati noyam kin gi dikes Zedekia di nok nibou ndig mem minu Yehuda ei nide siceu Nebukadnezar di nok nibou ndig mem minu Babel di yai nimai bak tu nindati ri.>>