Ibuwak Yeremia ug ei minu Mesir
43
1 Tirigi ditri tut TUHAN di Allah Israel de nisok nihyetti hagom bak limwa nya bit leu Nide nicuk dati biyok tu, 2 lene Azarya di Hosaya nipmot kin Yohanan di Kareah nipmot kin yo di nindigsi nya di inggei sut yonti dima ipai bida <<Abicum yo! Nyende TUHAN gicuk na mem gima acuon ser nye tut gima nuug bong ei minu Mesir bi. 3 Noro Barukh di Neria nipmot rino hwen angon dino acuon ser nye leu binhyepo jibindei ba, mben Babel inyeng tak kep nye ba, ibibon nye bit leu ingon kanti ba, migyai nimai bak nyeni e, he ikat nye bikri nye ug ei minu Babel e, lene nok.>> 4 Ningat ne TUHAN rino cuk Yohanan kin nibou tentara nya kin limwa nya yahagom leu binhyepo ibong hak ei minu Yehuda. Noro ikou sut gi bit TUHAN nicuk yokti dima. 5 Lene Yohanan kin nibou tentara nya ibuwak ide limwa nya di ingat rin ei minu Yehuda yahagom bitut yo di ikwei leu mpia di intek gimahap ug eisi nya kwei cem ba, yuug sut yok ug ei minu Mesir. 6 Ibuwak nye di Nebuzaradan kes nye bak Gedalya di ninyeng tak kep nye nok pinai nya kin sop nya kin munggwom nya kin nibou ndig nipmisop bat nya kin dani kin Barukh nahagom ba, nuug ei minu Mesir. 7 Yohanan nya ikou sut TUHAN nihyet ba, yuug ug ei minu Mesir lene itunggwei kikau ug ei minu ndig Tahpanhes.8 Lene TUHAN pai bida ei mpia dima, 9 <<Ma abei tig ndig ngat nindak poi ba, atig tig dima hanyen ei dihyeiti hammi dimbou hui di ibicoi ug ei kintror nindigti di jo minu ndig dima ba, ayai nok gima bou limwa Yehuda yahagom igyai him. 10 Leu api apai biyok Da di TUHAN Di Disindem Bibor di Allah Israel midicuk Ditde awak Nebukadnezar di nibou ndig minu Babel kwei ei mpia dima yo. Lene noni miwin nide banggo mbrei ba, bohok nide prak meng di ndo tut ninyeng jeisi ei tig ndig ngat di atig ei dihyeiti dima yok dip. 11 Nebukadnezar mikwei ba, bindei timek mben Mesir. Ba, yo di dikos tut mem igyai nimai tug hon nsuwer ajar nya mimai tug hon nsuwer ajar. Lene yo di dikos tut mem siceu ikat yok biyuug sut yok nok yo di isima nya ne siceu mikat yok biyuug sut yok nok yo di isima. Lene yo di dikos tut mem imai ei pranti nya mimai ei pranti. 12 Midipindei ig kwar di mben Mesir ide lene nibou ndig minu Babel mindig kwar di ikuk yok bak nya hagom. Nibou ndig minu Babel mindig kwar nya bihi kep hum lene pwoi bihi buug sut ei nitimieisi. Noni micok minu Mesir bipwoi kei noyam kin gino no di gembala bindei pwoi nide sinsun leu auuna. Nibou ndig mingkwei hanyen ba, hi di bigen ser noni bi. 13 Noni mibindei tig mma di mben Mesir itas pijum bikuk yok bak nya ei Heliopolis bindung-ndiem. Ningat ne noni mindig ig kwar ngot di mben Mesir ide hagom bitimek.>>