Limwa nya yahara Yeremia bingat nadi tindei yok
42
1 Tirigi igwam kep inghuisi lene ndigpoi nya kin munggwom nya kin nibou tentara nya kin Yohanan di Kareah nipmot kin Azarya di Hosaya nipmot yahagom ikwei 2 ngat da bipai <<Andigpoi e, angat bou ayai him bipia nipou ne nye dini nimang noro tini bu ne nijo poi mien he. Nahara bak na di andigpoi leu binhyepo angat nadi bak TUHAN Allah di akuk na bak. Angat nadi tindei nye di niken di nimang bibor bu bi dini, 3 leu binhyepo TUHAN Allah ndo puig binye. Noni joi sut nyeni binuug ei hantou ba, miniyai midyai mindei i?>>4 Lene dibuhup hanyen biyok <<Jingon kanti dima kei ba, dice tut. Midingat nadi bak ide TUHAN Allah ba, mun mindei rino buhup hanyen bida lene midipai hagom hanyen bije. Midiku mun nyeng gom ngat cem leu je bi.>>
5 Lene ipai bida <<Gino niyai mun ba, nibibit TUHAN nicukti nya hagom di na di andigpoi apai sut binye bi lene TUHAN di ningon sren biningon gom tut nye cem mingat gima yok hagom bou niyai him. 6 Nahara bak na di andigpoi ba, angat nadi bak ide TUHAN Allah mem nye. Lewo nijoi sut nibit nihyet leu binhyepo niwer tungwatu. Ba, mbro nok gino Nide nicuk nyeti dima buhun e, buhun bi e, minibit.>>
TUHAN buhup Yeremia de nadi
7 Njap simnai bu lene TUHAN mbrap bit da. 8 Leu api dijem Yohanan bitut nibou tentara nya kin nindigsi nya di ibit noni kwei. 9 Bidipai biyok <<Jicuk da bidipai jingon kanti di jahara mem bak TUHAN Allah Israel apino TUHAN pai, 10 <Gino jijoi sut jigwam ei jitimieisi kikau ne midibindei timek je bi. Noro midahati tut je. Dibindei bijiya ngkiem kei bijitti bi. Dingon ngguk bibor tut gi dikes mun di buhun ei je dip tu. 11 Ma jittin tut nibou ndig minu Babel dima bu au. Dingat rin ei jikieti mem gima dimpu je ba, diteu je leu ninda nsi. 12 Lewo dingondut je ba, dibindei nibou ndig minu Babel cem mingondut je. Noni mice tut ba, jingkwei hanyen ug ei jide ig. Da di TUHAN disimbot dat tu.> >>
13-15 Noro je di niken-ken di jigwam ei minu Yehuda e, ma jingkek ndok bijisrep tut jide TUHAN Allah nihyet bijikou sut gi jibong ei minu dini lene ma jipai nok gini au, <<Nikou sut gi nibong ei minu dini! Nijoi sut nuug ei minu Mesir binibong ei minu dima leu binhyepo nuum pran cem nigimiap pun mbrei di jem tentara mem gima ikon pran nibimbi ei nitingou nsi cem nicut ei ninggumti cem ei minu dima bi.>> Gino jingkek ndok ba, jisrep tut jide TUHAN Allah nihyet leu ba, jijoi sut juug ba, jibong ei minu Mesir lene TUHAN Di Sindem Bibor di Allah Israel sok mem jeni nok gini, 16 <<Pran kin ninggum di jittin tut dima muhuk bram je kikau ug ei minu Mesir bijimai ei minu dima. 17 Yo di yahagom di impig bou ba, yuug ei minu Mesir bibong ei minu dima mimai ei pranti kin ninggum kin nsuwer ajarti cem. Tungwa hi dima ningwes ngun leu mun di buhun di dikes kwei ei yok dip dima bi. Yahagom imai.
18 Midisiber Ditde nigga biborti ug ei je di juug ei minu Mesir dip noyam kin gi Da di TUHAN di Allah Israel disiber Ditde nigga biborti ei timiei minu ndig Yerusalem dip pima. Tungwatu di ingat jeni lene igyai ttin tut je bipai je kinei. Iba jinyeng bisigion yam cem. Leu api mijingat jitimieisi dini bou jiyai him bu bi.>>
19 Leu api dibinut bu <<TUHAN cuk je di niken-ken di jibong ei Yehuda leu binhyepo juug ei minu Mesir au. Gima rino disok kep je nogindini leu binhyepo jiyok ngon kep, 20 bipia jibon mun tunggwei nindig tu. Jahara da leu binhyepo dingat nadi bak ide TUHAN Allah mem jeni. Lene jipreu ei mem gima jibit mun nyeng hagom di TUHAN pai bije. 21 Nogindi pa ditri tut ide TUHAN Allah nisok mem jeti nya hagom bije noro jikou sut nibit nisok mem jeti dima. 22 Gima rino ma jiyok ngon kep bipia mporo jimai ei pran kin ninggum kin nsuwer ajarti ei minu di jibisau sut juug bijibong timiei eisi dima ug ri.>>