41
1 Ug cut bed gi nimuhwindacan mem ari bingwam dima lene Ismael di Netanya nipmot di Elisama nignyon ya tut ibou simnai ba, yuug ngat Gedalya ei Mizpa. (Ismael ne no di ntun nibou ndig minu Yehuda him hi rin ba, noni cem nibou tentara Yehuda gom di ninyeng jei ri.) Hammi tirigi yahagom igyem njita bit yam, 2 rino Ismael kin ibou simnai pima ikus ide singau simeda noyam ba, ibiyai nimai bak Gedalya di nibou ndig minu Babel ta nok nibou hanjop. 3 Ismael nya igyai nimai bak timiei Yehuda nya di igya kui Gedalya ei Mizpa dima yahagom ba, ibiyai nimai bak tentara Babel di ingat rin ei minu ndig dima cem yahagom.4 Njap gi bram bu di tungwatu nya ikan tut Gedalya nimaisi bigyo, 5 lene ibou ningot muhwindaningai ikwei leu Sikhem kin Silo kin Samaria minu dini yok. Yo dini ikak yuhui nta leu birik sinsun di ijuk cem iba singau biyai nibokti biyonti. Yo dini ipwoi gandum kin biei nggrai di ui-gwang kei mem gima ibikuk yok bak TUHAN ei Nide Ig. 6 Leu api Ismael hei leu Mizpa ba, ya um yok lene ba nipim bipai biyok <<Jikwei ngat Gedalya hak ug.>> 7 Haninyai tirigi yuug ei minu ndig dima nahacanti lene Ismael ya tut nide tentara nya ba, igyai nimai biyok. Leu lene ikri ingut ba, injei ei jui di nok minyei bousi ei mpia dima. 8 Noro ibou simnai leu yo dima yahara ser Ismael <<Ma ayai nimai binye au! Lewo niku nyende gandum ninyeng can kin mini zaitun kin ahwei lon hagom ei minu ndig nisai ma kwei.>> Gima rino Ismael sindui sut ba, igyai nimai biyok bit isut bat nindigsi di igyai nimai biyok binjei ingut ug ei juiti bi. 9 Minyei bousi dima nindig bibor ba, Nibou Ndig Asa cuk yok bitig jui dima ei mpe di po Baesa di nok nibou ndig mem minu Israel njei siceu di bihwen yok pima.
10 Leu api Ismael kat nibou ndig nipmisop bat nya kin yo di yahagom di ingat rin ei Mizpa di Nebuzaradan kes yok bak Gedalya di ninyeng tak kep yok nya yahagom. Noni kat yok bisima leu api nang tut yok hallu kak puig di bie ug ei minu Amon.
11 Yohanan di Kareah nipmot kin nibou tentara di ingat rin bit noni imiap tut Ismael nibon munti di kinei bibor dima, 12 lene igya tut ide limwa nya ba, yuhuk bram leu api yahatap noni ei igpong mien Gibeon. 13 Tirigi Ismael nya ingat Yohanan kin nibou tentara dima yok di ikwei tau lene yo di ikat yok di isima pima ingon kei bibor, 14 leu api ikiek yok binang kep inghim dip hanyen ndam Yohanan nya. 15 Noro Ismael ya tut nide limwa nya ibou muhwindaningai binang ba, ingwes ngun kikau ug ei minu Amon.
16 Leu api Yohanan kin nide nibou tentara nya induk tentara nya kin sop nya kin munggwom nya kin yo di igyai midyai ei ig nibou ndig nya di Ismael kat yok di isima tirigi yai nimai bak Gedalya leu pima bidem yam kwei ba, 17 yahagom inang ug ei minu Mesir. Imbut kikau ba, igwam kep inghuisi ei Kimham di jo dideu Betlehem. 18 Yahagom ittin tut tentara Babel tut gi po Ismael yai nimai bak Gedalya di nibou ndig minu Babel ta nok nibou hanjop ei minu Yehuda.