Zedekia hara Yeremia
37
1 Mpe dino Nebukadnezar di nok nibou ndig mem minu Babel cut Yoyakhin di Yoyakim nipmot ninyeng nibou ndig leu noni lene noni ta Zedekia di Yosia nipmot biya luei Yoyakhin nohoti nok nibou ndig minu Yehuda bu. 2 Noro Zedekia kin nibou nya di igya kui noni kin nide limwa nya yahagom ibit nihyet di TUHAN sok ei da dip bi.3 Zedekia pinak Yukhal di Selemya nipmot kin Imam Zefanya di Maaseya nipmot kwei ba, ibidip huk da leu binhyepo dingat nadi bak TUHAN Allah tindei timiei Yehuda nya. 4 Mpe dima lene disima bigyo ba, diya nyen srig timiei minu ndig dima ikieti. 5 Tentara Babel igyon ttai minu ndig Yerusalem wer ninno tu noro tirigi imiap tut tentara Mesir inghapti bipia ikinyon leu minu Mesir tu lene tentara Babel yoom yo leu nyende minu.
6 Leu api TUHAN di nok Allah Israel sok nihyet ei da dip, 7 bidipai bak yo di Zedekia cuk yok kwei bipia <<Ma jipai bak Zedekia <Tentara Mesir sindi ikinyon kwei mem gima impu na noro jei bi lene yoni mitti kep inghim dip bingkwei hanyen. 8 Mpe dima lene tentara Babel mikwei hanyen bigyon ttai minu dini leu api mihwen ade tentara bibindei timek yok lene indig minu dini bitimek bingwig. 9 Da di TUHAN disok kep je ser nhyema jiris ei jenti dip bijikan bipia tentara Babel mikwei hwen je hanyen bu bi au. Yoni mikwei hanyen yo. 10 Mbro nok gino ahwen tentara Babel yahagom bingwig lene gi hi di imai bigyo ibok-ba bibong kep inghuisi ei ide prak meng yati nya lo, yo dima migyai nisindem bikiju hanyen bindig jide minu dini bitimek bingwig.> >>
Ikat Yeremia ba, noni sima ei ig bui nsi
11 Mpe dima lene tentara Babel yoom yo leu minu ndig Yerusalem drek dip tentara Mesir di injei kwei su. 12 Gima rino sindi dijo leu minu ndig Yerusalem ba, duug ei ditimieisi ei hanjop Benyamin leu binhyepo diyai dihyei hanjop nsi di dide bat nya ibet ei mem da nok ditde dihyei ninda rom. 13 Noro tirigi sindi dehei leu Dimbou Pmem Benyamin lene nibou tentara gom di ya ser dimbou dima srep tut da bipai kep da <<Ningat ne anang leu nye ba, atti kin mben Babel ug ri!>> (No dima ninyeng Yeria di Selemya nipmot ba, Hananya nignyon.)
14 Lene dibuhup <<E bi! Dinang biditti kin side siceu nya bi.>> Noro Yeria ningkek ndok bimiap dihyet bi. Noni kat da bikes da ei nibou nya yoho bei. 15 Yo dima ingon sibui sut da nindig bibor ba, icuk yo di igya ser nyen nya bibui da bidinem-nnai leu api icom da bidisima ei Yonatan di sekertaris gom nide ig di ikinding binok ig bui bu. 16 Yo dima injei da ug ei jui nsi gom di jo dihyei jou bidibong ei mpia dima wer ninno.
17 Njap poi ser lene Nibou Ndig Zedekia hig da kwei ei nide ig leu api hig ser da nyahan <<TUHAN sok nihyet gom-gom kin bu ei nani dip e?>>
Lene dice bidipai <<I, jei bi ne acut ei nibou ndig minu Babel nindati ri.>> 18 Dihig ser noni <<Dibon mun di mbuk mindei ritut na di Andigpoi kin yo di igya kui na kin ade limwa nya di bindei ba, disima ei ig bui nsi i? 19 Ade nabi nya di ipai bina bipia nibou ndig minu Babel mikon pran bit na di Andigpoi kin minu dini bu bi sren nya yuug ei siritou i? 20 Na di Andigpoi di anyeng jei e, nogindini ma angig atingou mem dihyet. Ma acom da hanyen ug ei ig bui nsi ei Yonatan de ig dima bu au. Leu gima mibindei bidimai hak ug ri.>>
21 Gima rino Nibou Ndig Zedekia cuk nide yo di igya ser nya leu binhyepo inggam da ei nide mpia di jo bas hak di iba ngug tig bikrop ttai apino dibong ei mpia dima. Lene yo dima igyai roti nindak gom kwei leu nikang roti nibousi bikwop njap bigyai bida kikau ba, roti ei minu ndig dima hagom ngwig ug e.