Nibou nya injei Yeremia ei jui nsi di minyei pingge leu
38
1 Lene Sefaca di Matan nipmot kin Gedalya di Pasyhur nipmot kin Yukhal di Selemya nipmot kin Pasyhur di Malkia nipmot imiap tut mun di ditri tut bak tungwatu nya, 2 bipia TUHAN pai <<Tungwa tou rino ku no nyahan ei minu dini mitug ndei nimai tug hon pran kin ninggum kin nsuwer ajar. Noro tungwatu tou rino hei leu minu dini bikes nonti ei tentara Babel indati mitug ndei nimai bi noro miningwes ngun.>> 3 Lene dipai bu biyok bipia TUHAN pai <<Midikes minu dini bak tentara Babel.>>4 Lene nibou dima yok yuug ngat nibou ndig bipai binoni <<Suar no dima tug ndei nimai. Nihyet dima bindei ba, tentara Yehuda ingon nddong bu bi ba, ingon cut leu su. Nok gima cem tut ade limwa nindigsi nya di ibong ser minu dini. Noni mpu yok bi noro bindei ba, ingon buhun tut mun di micut igkep yok.>>
5 Lene Nibou Ndig Zedekia buhup <<Nnaba jibibon Yeremia bit leu jingon kanti hak ug. Lewo bit bon disrep tut je kan bi.>> 6 Lene ikat da ba, yuhuk kuk tut da ug ei Malkia di Zedekia nipmot de jui minyei di jut bibor di jo ei biyati. Minyei hagom pingge leu jui dima tu noro igkrop ndig di jo nijou ba, disrei eisi.
7 Mpe dima lene timiei minu Sudan gom yai midyai nok awak ei nibou ndig de ig. Ninyeng Ebed-Melekh ba, noni miap tut bipia yo dima injei da ug ei jui minyei dimati tu. Mpe dima lene nibou ndig gwam nok nikei kui Dimbou Pmem Benyamin. 8 Gima rino Ebed-Melekh ug ei sirima bipai bak nibou ndig, 9 <<Na di Andigpoi e, nibou di igya kui na pima yok igyai munti kinei bibor. Yoni injei Yeremia ug ei jui minyeiti ba, ningat ne noni mimai ninggum ei jui nsi dima lewo njita ngwig leu minu dini tu.>> 10 Lene nibou ndig cuk Ebed-Melekh leu binhyepo noni ug buwak nisut bat nya ibou ningai bibrim da leu jui minyei nipou tirigi dimai bigyo. 11 Gima rino Ebed-Melekh ug buwak yo dima ei nibou ndig de ig gudanti bigyai sinsun nghas nitimiei leu api huk kuk tut juk ndam da, 12 bipai bida bipia suar dikrop sinsun nghas dima bidikes ei dingou bei leu binhyepo kuk di ibibrim da dima simai dingkek bi. Diyai igbit nicuk dati dima lene, 13 ibrim kuk tut da leu jui minyei dima nijou. Niabiati bu lene disima hanyen ei nibou ndig de mpia di jo bas pima.
Zedekia hara Yeremia kwei bipingok ningonti
14 Njap poi ser lene Nibou Ndig Zedekia hig da biduug ngat noni ei dimbou pmem niningai ei TUHAN De Ig bihig ser da <<Midihig ser na tut mun nyeng gom lene ma abuhup bida nok igbit. Ma angon tak kep mun nyeng hi au.>>
15 Dibuhup <<Andigpoi e, gino dibuhup ahyet nok igbit lene mporo abindei ba, dimai. Gino dipingok angonti he lene mporo ayok ngon kep dihyet bi.>>
16 Lene Nibou Ndig Zedekia preu ei mem da nyahan bipai <<Deheng bitug hon Allah Di Niyaijo di bindei ba, nyeni igyaijo ninyeng bipia midiyai nimai bina bi. Midikes na ei yo di igyok ingon gom mem gima igyai nimai bina indati cem bi.>>
17 Dipai bak Zedekia TUHAN Di Sindem Bibor di nok Allah di mben Israel ikuk yok bak pai <<Gino akes nanti ei yo di igya kui nibou ndig minu Babel indati lene ma angwes ngun lewo yoni ihwen na bi ba, indig minu dini bitimek bingwig cem bi. Apino nani kin ade bat nya cem jahagom jingwes ngun. 18 Ne gino akes nanti ei indati bi ne minu dini micut bak jide siceu di mben Babel leu api yoni mindig minu dini bitimek bingwig. Bit bon angwes ngun kan bi.>>
19 Lene nibou ndig buhup <<Dittin tut side limwa nya di inang ba, itti kin mben Babel tu. Gino tentara Babel ikes da ei yo dima indati ne ihwen da kinei ug ri.>>
20 Lene dibuhup <<Nok gima bi. Tentara dima mikes na ei yo dima indati bi. Dibidip huk na di Andigpoi leu binhyepo abit TUHAN nicuk nati hak ug. Gino ayai nok gima lene hagom mimbut kin gi kei bibor lewo isindui sut na ba, angwes ngun. 21 Noro TUHAN ndo brei bida tut mun di micut igkep na di Andigpoi gino akou sut gima akes nanti ei yo dima indati. 22 Dingat-hi-ngat bidingat lo, ade siceu nya mikri sop niken-ken di ibong ser ade ig ba, ikes yok ei nibou ndig minu Babel de nibou pran nya indati. Tirigi sop dima imbut lene yahara sok bipai,
<Nibou ndig minu Yehuda nisut bat di ningon kieti nya iris noni ba, ighyet om noni. Nogindini nibou ndig dilleu bisrei ei igkropti leu api nisut bat di ningon kieti nya yahagom ikes noni ei biyom yo leu.> >>
23 Lene dipai hanyen bu <<Ade siceu nya mikri amunggwom bat kin atnem bat nya yahagom ba, ikes yok ei tentara Babel indati. Lene bit bon angwes ngun leu inda nsi kan bi. Nibou ndig minu Babel mikat nani ba, asima leu api noni mindig minu dini bitimek bingwig.>>
24 Lene Zedekia buhup <<Ma akimut ahui tut mun di sisimbot kep biyam dini leu binhyepo hi ba nimbuk birop hanyen bina bi. 25 Gino yo di igya kui da imiap tut bipia sisimbot kep biyam tut mun nyeng hi lene yoni mikwei hig ser na tut. Yoni mipreu ei mem na bipia gino apai sut hagom biyok lene igyai nimai bina bi. 26 Gima rino ma abuhup hak biyok bipia ahwen dingon leu binhyepo dicom na hanyen ei ig bui nsi au. Leu gi nok lene amai hak ug ri.>>
27 Jei bi lene yo di igya kui nibou ndig yahagom ikwei hig pus da tut nyen leu api dibuhup bit leu nok nibou ndig nicuk dati. Nok gima lene bit bon ibibon da kinei kan bi lewo hi miap tut mun di nibou ndig nyeni nisimbot kep tut biyam pima bi. 28 Hon kep njap dima kui lene disima ei mpia di jo bas hak dima kikau bipek njap dino siceu nya igyai minu ndig Yerusalem bigyati.