Barukh kwop srat kijum nibokti ei TUHAN De Ig
36
1 Tirigi Yoyakim di Yosia nipmot ninyeng tak kep minu Yehuda mem ari bingwam bitai su lene TUHAN pai bida, 2 <<Ma aug yai srat kijum k gom kwei ba, apas kep mun nyeng hagom di disok ei na dip eisi bak mben Israel kin timiei Yehuda nya kin ngkiai nya ei dihyeisi dini hagom. Suar apas kep mun di sindi dipai bina habiei tirigi Yosia kui nok nibou ndig kikau kwei bipek ammani kep eisi. 3 Mpaba timiei Yehuda nya imiap tut mun di buhun bibor di dikos dat bidikes ei yok dip lene ikiek yok leu igyai munti di kinei bibor nya. Gi nok lene dikos ser ide sisar kin igyai munti di kinei bibor nya.>>4 Gima rino dihig Barukh di Neria nipmot kwei leu api dindat kep mun nyeng di TUHAN sok ei da dip hagom bak noni leu api noni pas kep hagom ei srat kijum gomti. 5 Lene dicuk noni <<Nibou nya icuon ser da leu ba, dicoi ug ei TUHAN De Ig bu bi. 6 Gima rino ma acoi ug ei TUHAN De Ig mpe dino tto bou dem mem timiei Yehuda nya igyem njita bi mem nituti poi. Lene aba ahyet ndig bikwop srat bokti di dindat kep bina di apas kep dini hagom leu binhyepo yahagom imiap kep nihyet di TUHAN sok ei da dip. Ma aya ei yahagom yoho bei leu binhyepo ahyet tibim ei yahagom itingou nsi bitut timiei Yehuda nya di induk yam kwei leu ide minu ndig nya cem. 7 Mpaba ahyet dima mibindei ba, yoni mingat nadi bak TUHAN bittin ser igyai munti di kinei bibor nya. Lewo TUHAN ba nigga biborti bicug yok tu.>> 8 Lene Barukh coi ug ei TUHAN De Ig bikwop leu TUHAN nihyet bit leu nok dicuk noti.
9 Tirigi Yoyakim nok nibou ndig mem minu Yehuda ei ari bingwam muhwi ba, bed muhwindatai su lene tungwatu nya igyem njita bi mem nituti poi leu binhyepo ibindei ba, TUHAN ngondut yok. Timiei minu ndig Yerusalem nya bitut yo di induk yam kwei leu minu ndig nya ei minu Yehuda yahagom igyem njita bi mem nituti poi. 10 Lene Barukh kwop kep srat bokti di dipai binoni di pas ei srat kijumti dima hagom brei biyok ba, imiap. Noni kwop kep srat bokti dima tirigi noni ya kui Gemarya di Safan nipmot de kintrorti ei TUHAN De Ig. Safan dima ya kui imam nya binok ide sekertaris. Gemarya de kintrorti jo dideu mpia di jo bas hak di iba ngug tig bikrop ttai nite bei TUHAN De Ig nijjai dideu puig di bie ug ei Dimbou Pmem Nijep.
Barukh kwop srat kijum nibokti bak nibou nya
11 Mikhaya di Gamarya nipmot ba, Safan nignyon miap Barukh nihyet tirigi kwop TUHAN nihyet ei srat kijumti. 12 Lene noni ug ei nibou ndig de ig bicoi ug ei sekertaris di ya kui nibou ndig de kintrorti bingat lo, nibou Delaya di Semaya nipmot kin Elnatan di Akhbor nipmot kin Gamarya di Safan nipmot kin Zedekia di Hananya nipmot kin Elisama di nok sekertaris kin nibou nindigsi nya yahagom idem yam ei ba, isimbot dat mun biyam. 13 Mikhaya ndat kep mun nyeng di Barukh kwop kep ei TUHAN De Ig hagom biyok. 14 Leu api nibou dima yok icuk Yehudi (di Netanya nipmot ba, Selemya nignyon ba, Kusyi nidigup) bisok ighyet ei noni dip bak Barukh leu binhyepo ttei srat di noni kwop kwei. Gima rino Barukh kwei sut srat dima bit leu nok icuk noti. 15 Ipai binoni <<Agwam jug ba, akwop srat bokti dima binyeni cem.>> Gima rino Barukh yai igbit icuk noti. 16 Niabiati noni kwop srat bokti dima bingwig biyok leu su lene iba ingon di digit bitou kep yam yaisi bipai bak Barukh <<Suar nitri tut srat bokti dini bak nibou ndig. 17 Ma apai igbit binye tut notou apas kep srat bokti dini hagom nipou ug e. Apo Yeremia rino ndat kep hagom bina e?>>
18 Barukh ce bipai <<Igbit ri. Yeremia ndat kep srat bokti dini hagom bida leu api diba buk ngei bipas hagom sindam ei srat kijum diniti.>>
19 Leu api icuk noni <<Suar Yeremia jeni jinang bijiku je nyahan. Ma hiter kan tut mpia di jiku je eisi au.>>
Nibou Ndig Yoyakim ndig srat kijum kep hum
20 Nibou nya igyai srat dima bigyok ei Elisama di nok sekertaris de kintrorti leu api yuug ngat nibou ndig bipai sut srat dima bak. 21 Leu api nibou ndig pinak Yehudi buug yai srat kijum dima kwei. Noni ug ei Elisama de kintrorti biyai srat kwei lene kwop kep srat bokti bak nibou ndig kin nide nibou nya di igya ttai noni. 22 Mpe dima lene bed di biang hou nindig bibor tau su bindei ba, nibou ndig gwam hek hum ei ig nibou ndig. 23 Tirigi Yehudi kwop srat bokti dima hanjop nsi ningai bitai leu su lene nibou ndig ba nide singau mien bikos tut hanjop nsi dima leu bicom ug ei humti. Noni yai nok gima sindam kikau ba, hum yem srat dima hagom bingwig.
24-25 Mbro nok gino Elnatan kin Delaya kin Gamarya ibrim ingkek kep nibou ndig ser nhyema noni ndig srat dima kep hum au lo, noni kou sut gima miap kep ighyet. Ningat ne nibou ndig kin nibou di igya ttai noni yahagom ittin tut srat nibokti dima ba, ingon ngguk tut nihyet dima bi. 26 Lene noni cuk nipmot Yerahmeel kin Seraya di Azriel nipmot kin Selemya di Abdeel nipmot leu binhyepo ikwei kat dani kin ditde sekertaris di Barukh ba, nisima. Noro TUHAN ku nye nyahan leu yok.
Yeremia ndat kep srat kijum nibokti mbigom kin bu
27 Niabiati Nibou Ndig Yoyakim ndig srat kijum di dindat kep bak Barukh kep hum tu lene TUHAN cuk da bipia, 28 suar duug yai srat kijum gom kin bu kwei leu binhyepo dipas kep srat bokti di noyam kin nibokti gi nipou pima eisi. 29 Noni sok nihyet ei da dip bak nibou ndig bipai <<Andig srat pima kep hum tu ba, ahig ser Yeremia tut nggon rino noni pas kep srat bokti dima tut nibou ndig minu Babel di mikwei bindei timek minu dini bibiyai nimai bak timiei nya kin mindhe-ndhe nya i? 30 Gima rino Da di TUHAN dipai brei bak na di Nibou Ndig Yoyakim bipia ade nintun him yamti di bram yam nya migya luei ahoti ba, inyeng mitak kep yo di intun Nibou Ndig Daud him bu bi sren. Tirigi igyai nimai bina ne tungwatu nya minjei angut ug ei nisai hek mpia mem njap kin nggou mmun. 31 Midikes hukum ei nani kin yo di intun nani him kin nibou di igya kui nani jahagom dip drek dip jide sisar di jibon nya. Midibindei ba, mun di buhun bibor di dibicuug na hagom micut igkep na. Lewo nani kin timiei minu ndig Yerusalem kin timiei Yehuda nya jahagom jingkek ndok tut disok kep jeti nya.>>
32 Leu api duug yai srat kijum gom kin bu kwei bidiyai bak Barukh di nok ditde sekertaris leu api noni pas kep srat bokti di dindat kep bak noni nipou pima hanyen bu ba, dibikum dihyet hi kin bu eisi.