Nihyet nibiti nindati tut biei ara ningat di jo kui bansi can
24
1 Mpe di gom bu tirigi Nebukadnezar di nok nibou ndig mem minu Babel kat Yoyakhin di Yoyakim nipmot di nok nibou ndig mem minu Yehuda bitut nibou Yehuda nya di igya kui noni kin tukan di ibon mun bou inda him nya kin nibon kep ngkimom cig nya ba, kri yok leu minu ndig Yerusalem ug ei minu Babel ba, isima ei ingkiaisi lene TUHAN yai ningat-hi-ngat hi bida. Dingat bansi can di biei ara ningat jo niti di jo hak ei TUHAN De Ig nuhuigya. 2 Biei ara ningat di kei bibor di len bibor ei nijam biei ara ngat ningat nimbie him nya ningkom jo kui bansi nigom. Noro biei ara ningat gi kroi ningkom jo kui bansi gi nican ba, dem mem igyemti bi. 3 Leu api TUHAN hig ser da <<Yeremia e, angat mindei i?>>Dibuhup <<TUHAN e, dingat biei ara ningat ba, gi kei nya kei bibor kei lene gi kroi nya kroi bibor ba, dem mem igyemti bi.>>
4 Leu api TUHAN pai bida, 5 <<Dingat yo di disindui sut yok di ikat yok di ikri yok ug ei minu Babel dima idem kep biei ara ningat di kei bibor kei dini ri. Gima rino Da di TUHAN Allah Israel midiba dingon nggriu bibibon yok. 6 Midiya ser yok ba, dibuwak yok hanyen kwei ei itimieisi dini yo. Midiwin kep ingonti lene dinggek yok bi. Midita yok lene dohom yok bi. 7 Midiyai ningon di nyei nihim kin ningon di huk niti biyok leu binhyepo ingon huk niti bipia Dani ne TUHAN ri. Mpe dima lene yoni inok Ditde limwa nya bidinok ide Allah lewo iba ingon di gom bingkwei hanyen ndam Da.
8 Noro midibibon Zedekia di nok nibou ndig mem minu Yehuda kin yo di igya kui noni kin timiei minu ndig Yerusalem niken-ken di ibong ei minu dini kin gi hi di ipri ug ei minu Mesir nya ba, idem kep biei ara ningat di kroi ningkom di dem mem igyemti bi dini. Da di TUHAN disimbot dat tu. 9 Midibindei ba, mun di buhun di biyai ingon di ttin bibor micut ei yok dip ba, biyai nittin bak ngkiai nya ei dihyeisi dini nisurti-nipekti. Tungwatu nya iba ighyet bicig yok lene iba yok bilor yam ba, ighyet wer mpiahi tut yok bidem mpia di dicom yok ug eisi nya cem hagom. Tungwatu nya iba mben Israel inyeng bisigion yam. 10 Midiba pran kin ninggum kin nsuwer ajar bihwen yok. Apino yahagom imai leu ba, hi dima gwam ei minu di diyai biyoni kin idigup bat-idigai bat nya dini bu bi.>>