Siceu nya di ikwei leu nite bei mpia nijjai
25
1 Tirigi Yoyakim di Yosia nipmot kui bigwam nok nibou ndig minu Yehuda ba, ug ei ari bingwam gi nibitai lene diyai nisokti leu TUHAN tut timiei Yehuda nya yahagom. Mpe dima lene Nebukadnezar gwam nok nibou ndig mem minu Babel ei nijam ari bingwam gi nimbie him ri. 2 Dipai bak timiei Yehuda kin timiei minu ndig Yerusalem yahagom, 3 <<Dingkek ndok tut TUHAN nisokti di pai bida mem nijam ari bingwam nyatungwagom ba, ningai habiei leu ari bingwam gi nisimnaibrimigningai di Yosia di Amon nipmot ninyeng tak kep minu Yehuda kikau kwei bipek njap di ammani kep bi. Ditri tut Nide nisok ei da dipti hagom bije tu. Noro jigingig jitingou mem nisokti dima bi. 4 Mbro nok gino TUHAN pinak Nide awak di nabi nya ndam je tu lo, jigimiap kep ighyet ba, jigingig jitingou mem ighyet cem bi. 5 Nabi dima yok icuk je leu binhyepo jikes hon jiyaijoti di kinei bibor kin jibon munti di sisar ntun him leu binhyepo jibong kikau ei minu di TUHAN yai bijeni kin jidigup bat-jidigai bat nya nok jide minu ninda rom dini. 6 Nabi dima yok icuon ser je leu binhyepo jikuk je bak ngkiai nya ide nung nya bi. Iggai ser je leu binhyepo jikuk je bak kwar di jibon bou jinda him nya cem au. Lewo jiyai munti dima bibon TUHAN niggati. Gino jibit TUHAN nicukti dima lene Noni kes hukum ei jeni dip bi. 7 Noro TUHAN Nonti pai bipia jikou sut nihyet leu api jiba jide kwar nya bibibon kep Nide niggati. Jenti rino jibindei di Nide hukum cut igkep je a.8 Jikou sut nimiap kep nihyet di pai nya apino TUHAN Di Sindem Bibor pai, 9 <Midinduk ngkiai nya yahagom kwei leu nite bei mpia nijjai kin Ditde awak Nebukadnezar di nok nibou ndig mem minu Babel cem kwei. Midiya tut yo dima mem gima ikon pran bit minu Yehuda bitut nide limwa nya kin ngkiai nya di ibong ttai yok yahagom. Midibindei sar timiei Yehuda kin ngkiai nya di ibong ttai yok yahagom lene midisindui sut ba, ijjem bijo ninno bijo kikau. Yo di ingat ditde niyai munti dima idigit tut ba, igyai ngkek ttin. Da di TUHAN disimbot dat tu. 10 Midibindei ba, nihyet ninggei-hi-nggei di kui yam kin niyai nillei ei pesta niwak yamti kes hon hak. Mini dihyei mem ide njeng mbrei kin ide gandum cem hagom ngwig. 11 Midisindui sut ba, minu dini titut yam timek bingwig bidem iggum ndigsi bram. Ngkiai nya di ibong ttai nya inok awak mem nibou ndig minu Babel mem nijam ari bingwam ningot muhwindacan. 12 Gima leu api midikes hukum ei mben Babel bitut ide nibou ndig cem dip drek dip ide sisar. Midibindei minu Babel bicut ba, disindui sut bitimek bingwig bihigom. 13 Midiba mun di buhun bibor hagom di ditin ei dingon kanti tut ei mem ngkiai nya kin gi dipai sut tug hon Yeremia ba, dibihwen mben Babel. Gima ne mun di buhun bibor hagom di ipas kep ei srat diniti tu ri. 14 Midibirop bak mben Babel drek dip ide nibon munti nya hagom. Apino nibou ndig di inyeng jei nya kin ngkiai hiter nya imang bibor yuubon yok nok awak.> >>
Hukum di Allah mibindei cut igkep ngkiai nya
15 TUHAN di mben Israel ide Allah pai bida <<Ayai mok ba anggur ngei di ut tut Ditde nigga biborti di noyam kin ba anggur ngei dini. Attei ba, aug sut ndam ngkiai nya yahagom bidem minu di dipinak na ndam yok nya. Lene ma acuk yok bidut ei gimokti dini. 16 Tirigi idut gimokti dima lene igyai nang-nang nyen ba, intin kiek drek dip pran di dibindei cut ei yok dip.>>
17 Leu api diyai gimokti dima leu TUHAN nindati ba, duug sut ndam ngkiai nya yahagom bidem minu di TUHAN pinak da ug nya. Leu api dibindei ba, idut eisi. 18 Diyai gimokti dima bak minu ndig Yerusalem kin minu ndig hagom di jo ei minu Yehuda bitut nide nibou ndig nya kin yo di igya kui yok bidut. Apino iwer iggum ndigsi di ngoi-nga di bindei igyai ttin. Tungwatu nya iba minu dima ninyeng bisigion yam kikau kwei bipek ammani kep.
19 Yo di suar idut ei TUHAN de gimokti dima inyeng rino,
Firaun di nok nibou ndig mem minu Mesir kin nibou di igya kui noni kin yo di igya kui yok nya kin nide limwa nya yahagom poi, 20 kin mben Mesir yahagom kin ngkiai nya yahagom di ibong timiei ei minu Mesir kin nibou ndig minu Us yahagom kin nibou ndig minu Filistin yahagom di ibong bidem minu ndig Askelon kin Gaza kin Ekron kin yo di igyaijo di ibong ei ig kum kroisi ei minu ndig Asdod, 21 kin mben Edom kin Moab kin Amon yahagom, 22 kin nibou ndig ei minu ndig Tirus kin Sidon yahagom kin nibou ndig nya di inyeng tak kep minu di jo ei Muk Hacan nipimat yahagom, 23 kin minu ndig Dedan kin Teman kin Bus hagom kin yo di yahagom di ikos ibou bicun, 24 kin nibou ndig Arab yahagom kin nibou ndig yahagom di imbier kim keret di ibong srig yamti ei iggum ndigsi, 25 kin nibou ndig Zimri kin Elam kin Madai yahagom, 26 kin nibou ndig di ibong nite bei mpia nijjai gi ting kin gi dideu ba, yahagom sindam.
Ba, suar ngkiai nya di ingat rin bidem dihyei ninjek dip dini hagom idut ei gi mokti dima. No di dut gimokti dima ningwigsi hak rino nibou ndig minu Babel.
27 Leu api TUHAN pai bida <<Apai bak yo dima bipia Da di TUHAN Di Disindem Bibor di mben Israel ide Allah dicuk yok bidut kikau bibou ibou ngwak sibui sut ba, injim binghim dahat tut drek dip pran di dikes kwei ei yok dip di bindei ba, icut leu api bit bon ikiju hanyen kan bi ug e. 28 Gino ikou bigyai gimokti dima leu andati bidut ningei di joti bi lene ma apai biyok bipia TUHAN Di Sindem Bibor rino cuk je ba, jidut eisi hak ug. 29 Midikinyon ei nibindei timekti dima ei Ditde minu ndig bibie. Leu ma ingon kan bipia midikes hukum ei yok dip bi, Ningat ne midikes hukum ei yok dip lewo midikes pran kwei ei mben di ibong bidem dihyei njek dip dini nisurti-nipekti. Da di TUHAN Di Disindem Bibor disimbot dat tu.
30 Yeremia e, ma atri tut mun nyeng hagom di dipai bina. Apai biyok,
<TUHAN nihyet tibim kwei leu gwamti dem kep kru di cut a. Noni kes nihyet di dem kep kru di nugwei bong kwei leu gumihyep di kwes di gwam niti bibihwen Nide limwa nya. Noni ba nihyet di nindig bibor bimbrua ba, timiei minu dini yahagom imiap nihyet di dem kep no di kimut-kimut nyen ba anggur ngei ei mun di ikimut ningei kikep eisi nihyet.
31 Nihyet dima bong mpiati ninno ug bipek kin dihyei nisurti-nipekti. TUHAN bon munhyet bit ngkiai nya. Noni mimbus yahagom ingonti leu api kes hukum ei yo di isibut bibor nya dip.> >>
32 TUHAN Di Sindem Bibor pai <<Hou di nimig ten bibor micut ba, nugwei bong mpiati kikau ug bipek kin minu nohon keti. Mun di buhun bibor micut igkep ngkiai nya gom-gom sindam.>>
33 Njap dima dem lene yo di TUHAN yai nimai biyok nya ingut mijo sinsiou ei dihyei ninjek dip bidem dihyei nisurti-nipekti. Hi dima pim tut yok buug sut yok bitig yok bi. Noro isindui bijo hak ei dihyeisi bidem kep mumpiang di tungwatu nya injei di yem mpia ei a.
34 Je di nibou nya kin je di gembala mem TUHAN de limwa nya e, ma jipim kui jei! Ma jirim-rim nyen ei atriemti lewo nituti dem mem gima jitug ndei nimai. Yo di ingwes ngun nya intek gimahap. Jidem kep dibijig di nibok kak di cut ba, kimbo.g 35 Ningat ne bit bon jingwes ngun kan bi. 36 Jinso-nso nyen ba, jipim cem jingon ngguk bibor cem lewo TUHAN nggek jide minu di jinyohou limwa jide nya eisi. 37 Noni ba nigga biborti bibindei sar je di timiei Yehuda nya. Noni bindei timek minu jide di mpung tut yo di ibong kei igwam kei dima tu. 38 TUHAN dem kep singa di hei leu nimihyeti bihigom mem gima kes hukum ei Nide limwa nya dip. Nikon pran sindem biborti kin TUHAN nigga biborti bindei ba, minu dini wer iggum ndigsi.