TUHAN miteu Nide limwa nya ei nidipti bu
23
1-2 TUHAN di mben Israel ide Allah pai <<Buhun bibor mem je di nibou di jibindei ba, Ditde limwa nya itimek bingwig bisar ei ingkiaisi! Suar jinyohou yok nok gi igbit noro jinyohou yok bi. Jibindei bintek gimahap apino inang bingwig. Nogindini midikes hukum ei je dip drek dip jiyai munti di kinei bibor dima. 3 Midinduk Ditde limwa nindigsi nya kwei leu ingkiaisi di dicom yok eisi leu api ibong ser itimieisi hanyen ba, idigek kep mpia. 4 Midita nibou di inyeng tak kep yok binyohou yok. Mpe dima lene ittin ba, idigit cem bu bi. Hi di mipror leu yok cem bi. Da di TUHAN disimbot dat tu.>>5 TUHAN pai <<Midita nibou ndig di ningon sren di ntun Daud him mem nijam gi nidipti bu. Noni ba ningon kiti kin ningon sren-srausi kin ningon gomti bininyeng tak kep ei jide minu nisurti-nipekti. 6 Mpe dino ninyeng tak kep ne timiei Yehuda kin mben Israel nya yahagom mibong kei migwam kei. No dima ninyeng rino <Ide TUHAN Di Teu Nye Leu Sisar Biyai Niyaijo Nijep Binye.>
7 Ei nidipti bu ne tungwatu nya iba Allah Di Niyaijo di buwak mben Israel kwei leu minu Mesir ninyeng beheng bu bi. 8 Noro iba Allah Di Niyaijo di buwak mben Israel kwei leu minu di jo ei nite bei mpia nijjai kin minu nindigsi nya hagom dijji yok ug eisi ninyeng beheng bu. Mpe dima lene yoni mibong ser itimieisi hanyen bu.>>
Yeremia tri tut nihyet di pai kep nabi nya
9 Ditri tut nihyet tut nabi nya. Dingon buhun bibor ba, didigit nindig bibor. TUHAN ba nihyet di kwes-kwau bindei ba, dinok no di dut ba anggur ngei nindig bibor di pu no ba, dingon him wei. 10 Minu dini mpung tut yo di ingon gom tut TUHAN bi. Igyai munti nya kinei bibor ba, ibimangkrei ide nisindemti cem. TUHAN sigion abris nghousi di mindhe-ndhe nya igyem apino minu dini noyam kin no di ningon ngguk tut nimai.
11 TUHAN pai <<Nabi nya kin imam nya ibit dihyet bi. Dingat lo, ibon mun di kinei ei Ditde De Ig. 12 Gima rino midibindei ba, imig dilleu ba, ide puig dindi cem apino yoni ikinoi ba, mun di buhun bibor cut igkep yok cem lewo nituti mem dikes hukum ei yok dip dideu kwei su. Da di TUHAN disimbot dat tu. 13 Dingat lo, nabi nya ei minu Samaria ibon sisar. Yoni iba Baal ninyeng bimbrap bibindei ba, Ditde limwa nya israwir.
14 Noro dingat lo, nabi nya ei minu ndig Yerusalem ibon sisar nindig bibor binjiriek yok bu. Lewo iris ei tungwatu nya dip cem icut tut hiter nitnem cem yahati tut yo di igyai munti nya kinei bibor cem kikau ba, hi ttin ser nide sisar kan bi. Ba, yahagom ibon kep sisar di kinei bibor noyam kin timiei minu ndig Sodom kin Gomora bou diyai him.>>
15 TUHAN Di Sindem Bibor pai <<Midiyai njita di mpo-mpam biyok bigyem. Miduhug krisieu ngei biyok bidut. Lewo yahak ide mun di kinei ei tungwatu nyati bidem minu dini hagom bibindei ba, yo dima ikuk yok biDa bu bi.>> 16 TUHAN Di Sindem Bibor pai bak timiei minu ndig Yerusalem <<Ma jimiap kep jide nabi nya ighyet bu au. Lewo ibindei ba, jiyok jingon mem mun di igbit bi. Itri tut mun di yonti ikan huk nya bije lo, itri tut dihyet bije bi. 17 Itri tut bak yo di ikou sut dihyet bipai <Dwai! Mijibong kei jigwam kei.> Lene itri tut bak bikwop no di ningkek ndok bipai <Dwai! Mun di buhun bibor micut igkep na bi sren.> >>
18 Dipai <<Leu nabi dima yok ne hi dima kan tut TUHAN de mimun bi sren. Hi dima ntu kep TUHAN nihyet ba, ningon dor niti tut ningon kanti cem bi sren. Hi dima ngig nitingou mem nihyet ba, joi sut nihyet cem bi sren. 19 TUHAN nigga biborti noyam kin hou di nimig ten bibor di micut igkep yo di imbuk bibor binjei yok. 20 Nigga biborti dima mingwig hon nohonti bi bibou Noni yai hagom bit leu ningon kanti bidem ug e. Mun dini yok mijo nibreisi mem Nide limwa nya ei nidipti bu.>>
21 TUHAN pai <<Mbro nok gino dipinak nabi dima yok bi lo, yonti ibisinggre bimbut. Mbro nok gino dikes dihyet ei ingonti bi lo, itri tut yonti ighyet tug hon dinyeng. 22 Gino ikan tut mimun di jo ei dibou ngwakti nya ne suar itri tut dihyet bak Ditde limwa nya bibindei ba, ittin ser ide sisar di kinei kin igyai munti di mbuk bibor. Noro bi.
23 Dani ne TUHAN di ningat rin ei mpia gom ngat he bi noro dingat rin bidem minu. 24 Bit bon hi ku no nyahan nding leu diyai him kan bi. Lewo dingat rin ei gwamti kin dihyeisi dini cem nisurti-nipekti. 25 Dikan bidem tut mun di tibim ei nabi dima yok yuhui him. Iba dinyeng biris tungwatu nya tug hon gi ipai sut yonti bipia dimbrap bit yok tug hon mun di imumpriem nya. 26 Nabi dima yok iba yonti ide niris munti di igyai leu yonti ingon kanti dima bindei ba, Ditde limwa nya israwir mem nijam pig bu i? 27 Ikan bipia mumpriem di itri tut nya mibindei ba, Ditde limwa nya ingon prion ser Da bit leu nok idigup bat-idigai bat nya di ingon prion ser Da leu bikuk yok bak Baal pima e. 28 Suar nabi di tri tut nide mumpriem pai hak <Gini ne mumpriem he yo.> Suar nabi di miap kep dicuk noti tri tut dihyet dima nok gi igbit. Gandum nitu kei bibor dor njiriek gandum sisron. 29 Dihyet noyam kin hum kin apak di ki tig biki kukiau cem! 30 Ditte tut nabi nya di itri tut isut bat nabi nya ighyet bipai bipia nihyet dima ne Dani dihyet ri. 31 Ditte tut nabi nya di itri tut yonti ighyet bipai bipia nihyet dima ne Dani dihyet ri. 32 Da di TUHAN ditte tut nabi di itri tut ide mun di imumpriem nya di mpung tut mun di igbit bi. Iba ide mumpriem dima biris mun bak tungwatu nya. Iba ingon di jei bindei ba, Ditde limwa nya israwir. Dipinak nabi dima yok bi ba, impu Ditde limwa nya bi sren. Da di TUHAN disimbot dat tu.>>
TUHAN nihyet buhun bibor e?
33 TUHAN pai bida <<Yeremia e, gino Ditde limwa hi e, he nabi hi e, he imam hi e, kwei hig ser na <Apai TUHAN nihyet bida> lene ma abuhup <Nanti rino abuhun tak TUHAN. Gima rino Noni micom na hak ei.> 34 Gino Ditde limwa hi e, he nabi hi e, he imam hi e, kwei simbot kep tut mun di buhun tak TUHAN lene midikes hukum ei noni kin nide bat nya dip. 35 Noro suar ma bikwop tungwagom-gom hig ser nisut kin nide bat nya <TUHAN buhup notou i? TUHAN pai mindei binye i?> 36 Gima rino ma yoni indat kep <TUHAN buhun tak nye> bu au. Leu gino hi ndat kep gima hanyen bu lene midibindei ba, dihyet mibuhun tak noni nijit-jau a. Yo di indat kep <TUHAN buhun tak nye> ikiek Da Di TUHAN Di Diyaijo ba, Di Sindem Bibor cem dihyet bibit leu yonti ingon kanti. 37 Yeremia e, ma ahig ser nabi nya <TUHAN buhup jihyet notou i? TUHAN pai mindei i?> 38 Lene gino ibit dihyet dima bi leu api indat kep <TUHAN buhun tak nye> lene ma apai biyok, 39 midohom yok bitut ide minu ndig di diwin mem yok kin idigup bat-idigai bat nya cem leu api midicom yok ug ei minu ting bibor. 40 Midibindei ba, immai sut yonti ba, tungwatu nya minim kep yok bijo ninno bijo kikau. Bit bon tungwatu nya ingon prion ser mun di cut igkep yok kan bi.>>