Yeremia pingok nibou ndig minu Yehuda kin nide ig bei nsi nya ingonti
22
1-2 TUHAN pinak da leu api duug ei nibou ndig minu Yehuda di ntun Daud him de ig nibou ndig mem gima ditri tut TUHAN nisokti bak nibou ndig nonti kin yo di igya kui noni kin timiei minu ndig Yerusalem nya yahagom. TUHAN sok nihyet ei da dip bak yo dima bipai, 3 <<Da di TUHAN disok kep je mem gima jiba ningon gomti kin ningon srenti biyai kep jiyai munti nya. Ma jikwek no di yo di isibut nya ikes nibittemti nindig bibor ei ninghat dip dima leu inda nsi. Ma jico kep ngkiai di ibong timiei bit je nya kin moibihi nya kin kibom nya ba, jibon mun kinei sut yok au. Ma jiyai nimai bak yo di ingwes ngun ei mpia dini au. 4 Gino jibit Ditde nicuk jeti nya mungkun kei ne midibindei ba, yo di intun Nibou Ndig Daud him migya luei yohoti bram yam kikau. Yoni kin yo di igya kui yok bitut limwa di ide nya cem miba pran kin kuda nya bicoi-coi nyen kak dimbou pmem kwei ei ig nibou ndig de dini. 5 Noro gino jibit Ditde nicukti nya bi ne diba neheng bipai bipia ig nibou ndig de dini mitti binok ig kum kroi bijo ei. Da di TUHAN disimbot dat tu.6 Nibou ndig minu Yehuda de ig kei-kau-kei binok minu Gilead kin Nungug Libanon nya bou diyai him. Noro midibindei mpia dima bidem kep nok iggum ndigsi di tungwatu ibong ser bi. 7 Midipinak nibindei timek mun cig nya hwou ba, yoni mibindei timek nibou ndig minu Yehuda de ig di kei-kau-kei dima. Lene yoni mittei oi mem gima ibiwim nidihim di iba buom Libanon bibon di dia-diau nya bicom hagom ug ei humti.
8 Gima leu api ngkiai nya imang bibor mimbut binjiriek mpia dima ba, ihig yam nyen ser <<Nggon rino TUHAN bibon minu ndig di kei-kau-kei dima nok i?>> 9 Leu api nindigsi nya mibuhup bipia gima yok hagom cut igkep je drek dip gi jiba jinghim bak Da di jide Allah de nipreu eisi di ipreu ei mem yam tu leu api jikuk je bak ngkiai nya ide nung nya.>>
Yeremia nihyet di pai kep Yoahas
10 Je di timiei Yehuda nya e, ma jingon ngguk tut Nibou Ndig Yosia nimaisi au. Noro ma jipim tut nipmot Yoahas he. Lewo siceu nya ikat Yoahas biyuug sut ug ei ningkiaisi tu. Noni mingkwei hanyen kwei bingat nitimieisi bou niyai him bu bi sren.
11 TUHAN pai sut Yoahas di Yosia nipmot di kui bigwam nok nibou ndig ei minu Yehuda biya luei Yosia nohoti <<Yoahas ug leu minu dini tu ba, mingkwei hanyen kwei bu bi sren. 12 Noni mimai ei minu di icom noni ug eisi bingat nitimieisi bou niyai him bu bi.>>
Yeremia nihyet dipai kep Yoyakim
13 Buhun bibor mem no di ba ningon di gom bi bingot nide ig lene ba ningon di sren bi bibindei ig dima bres. Buhun bibor mem no di cuk yo di ninttig-tta nya bigyai midyai lo, kwas imuhup tut yok bi a. 14 Buhun bibor mem no di pai <<Misingot ig nibou ndig bitut nghim nsi di bres di sitap ei ig nidip di jo ninten di anai nya.>> Gima rino noni tu kendera mihyeti eisi lene ba buom Libanon bibon kendera mihyet ninghim leu api ba cet ningwoi bihwen. 15-16 Na di Nibou Ndig Yoyakim e, ma amiap! Gino aba buom Libanon di kei bibor bingot ade ig nibou ndig lene gima bindo bipia nani ne nibou ndig di kei dor njiriek nibou ndig nindigsi nya rin e? Ma abisrip tut acig di ngat ningwes ei nibong kei nigwam keiti ba, ningat ntun midyai di yai nya hagom him. Lewo ningon sren kei ba, mig mbus tungwatu nya bi cem. Noni ba ningon di gom bimbus munhyet di yo di yuhui mbum ide cem. Suar ma yo di ikan tut TUHAN mungkun kei igyai munti nok gima. 17 Noro na di Yoyakim ne ayai munti ter. Anggok tut ningat di bukum eisi mem nanti he. Ayai nimai bak yo di ingon ngun nya lene aba ambuk bico kep ade limwa nya cem.
18 Gima rino TUHAN pai sut Yoyakim di Yosia nipmot di nok nibou ndig mem minu Yehuda <<Nimaisi mibindei ba, ipim tut biyahara <Ayo, disut ug o! Ayo!> Miyahara nok gima bi. Hi dima ba ningon ngguk bahara <Ndina, nibou ndig ndia ug o!> Nok gima cem bi. 19 Siceu nya mikri Yoyakim ningut bicom kak dimbou pmem ug ei minu ndig Yerusalem nisai. Ibibon noni noyam kin ibibon keledai di mai pimo.>>
Yeremia tri tut nihyet tut minu ndig Yerusalem nipek kep memti
20 TUHAN pai <<Je di timiei minu ndig Yerusalem e, juug ei minu Libanon kin minu Basan ba, jiba jihyet nindig bahara ei minu dima. Jiba jihyet nindig bibor bicot ei nungug him minu Moab lewo siceu ihwen tentara ngkiai nindigsi di yahati tut je yahagom ba, icut tu. 21 Dimbrap bit je mpe di jibong kei jigwam kei yo pima noro jigimiap kep dihyet bi. Ningat ne jiyai munti nok gima ei nipou pima kikau kwei bipek ammani kep. Jigibit dihyet kan bi sren. 22 Gima rino nibou jide di ibie tut je nya mipror noyam kin hou di dimiep nye di bipror hak. Siceu nya mikat tentara ngkiai nindigsi di yahati tut je yahagom bikri yok ug ei ingkiaisi ba, isima. Leu lene ibindei minu ndig jide kinei ba, jimmai drek dip jiyai munti di kinei bibor nya. 23 Jibong kei jigwam kei ei tiang di iba buom Libanon bibon ninggreti lo, hammi tirigino ninghuisi wei cut igkep je kros rino mijahara noyam kin sop di ninghim dut tut nisrek tut nimunggwomti.>>
TUHAN mikes hukum ei Yoyakhin dip
24 TUHAN pai bak Nibou Ndig Yoyakhin di Yoyakim nipmot di nok nibou ndig mem minu Yehuda <<Dipai bina tug hon Da di Allah di niyaijo dinyeng bipia mbro nok gino adem kep srak mas nibitak buk di jo dinda comti lo, midijuk na leu dinda, 25 leu api midikes na ei tungwatu di attin kep yok kin gi ijoi sut igyai nimai bina indati. Midikes na ei Nebukadnezar di nok nibou ndig mem minu Babel kin nide limwa nya indati. 26 Midijji apmem jeni bidicom je ug ei jingkiaisi di jisrek eisi bi leu api jahacem mijitug ndei nimai ei minu dima. 27 Mijingon ngguk bibor tut jitimieisi dini noro mijingkwei hanyen kwei eisi bi sren.>>
28 Da di Yeremia dipai <<Nibou Ndig Yoyakhin dem kep nok dibijig di kimbo di icom ba, ikou sut tu e? Tug hon nisinati dima icom noni kin nimunggwom bat nya ug ei ingkiaisi di ingat bou igyai him bigyo e?>>
29 Minu tde ug o, ma angig atingou mem mun di TUHAN pai bije, 30 <<No dima ne no di TUHAN kos tut mem gima nimunggwom bat nya isar leu nitta ri. Noni ne no di ngat ningat di tug hon niyai munti nya bi bijo kikau. Nide nintun him yamti di bram yam nya inyeng mitak kep minu Yehuda nok nibou ndig di ntun Daud him bu bi sren. Da di TUHAN disimbot dat tu.>>