Yeremia mbot kep tut minu ndig Yerusalem nicutti
21
1 Zedekia di nibou ndig minu Yehuda sok nihyet ei Imam Pasyhur di Malkia nipmot kin Imam Zefanya di Maaseya nipmot nya dip kwei bipai nibou ndig nahara dati bipai, 2 <<Ma ahara TUHAN mem gima ndo ningon kanti binye. Lewo Nebukadnezar di nibou ndig minu Babel ya tut nide tentara nya ba, igyon ttai ide minu ndig tu. Leu hi rima TUHAN mibon mindur mem nye bibindei ba, Nebukadnezar brim nide tentara nya bingkwei leu nye a.>>3 Leu api TUHAN pai ningon kanti bida ba, dicuk yo di nibou ndig cuk yok kwei, 4 leu binhyepo yuug pai hanyen bak Zedekia mben Israel ide TUHAN Allah pai <<Na di Zedekia e, midibindei timek ade tentara nya di ikon pran kikep bit nibou ndig minu Babel kin nide tentara nya. Midipos tentara nya ide minggwen nya hagom leu binhyepo dibirok kik minu ndig nahacanti. 5 Midiba Ditde nisindemti kin niggati di cig-cai cem bikon pran bit je. 6 Midiyai nimai bak timiei di ibong minu ndig dini yahagom. Tungwatu kin mindhe-ndhe cem mimai tug hon nsuwer ajar di buhun bibor. 7 Midisindui sut ba, Nibou Ndig Nebukadnezar om ningon tut je bingondut je bi sren. Noni kin nide limwa nya migyai nimai bina kin yo di igya kui na kin yo di ingwes ngun leu pran kin ninggum kin nsuwer ajar cem jahagom. Da di TUHAN disimbot dat tu.>>
8 Leu api TUHAN sok nihyet ei da dip bak nide limwa nya <<Jingig jitingou mem dihyet! Diyai nituti mem je ba, jindo gi hi di jijoi sut hak ug. Jindo puig di bie ndam niyaijo e, he jindo puig di bie ndam nimai e? 9 Bikwop yo di ibong ei minu ndig dini mimai tug hon pran kin ninggum kin nsuwer ajar. Noro yo di yuug leu minu ndig dini bikes yonti ei tentara Babel di igyon ttai minu ndig dini inda nsi mitug ndei nimai bi noro ingwes ngun. 10 Dikos tut bipia dingondut minu ndig dini bu bi noro dibindei sar hagom bitimek bingwig. Nibou ndig minu Babel miya kep minu ndig dini bindig titut yam bitimek bibor. Da di TUHAN disimbot dat tu.>>
Hukum di micut igkep nibou ndig minu Yehuda kin nide bat nya
11 TUHAN cuk da mem ditri tut nisokti dini bak nibou ndig minu Yehuda kin nide bat nya. Dipai <<Jingig jitingou mem mun di TUHAN pai bije.>> 12 TUHAN pai <<Je di jintun Daud him e, ma jiyai jibou tut gi jiba ningon srenti bikos tut munhyet bikwop njap-njap. Jikwek no di yo di isibut nya ikes nibittemti nindig bibor ei ninghat dip dima leu inda nsi. Gi bi ne jiyai munti dima mibindei ba, Ditde nigga biborti cig-cai noyam kin hum di bit bon hi mu kan bi.>>
13 Leu api TUHAN pai bak minu ndig Yerusalem <<He minu ndig Yerusalem e, ajoti anai dor njiriek briep bou him di jo ttai na nisurti-nipekti. Adem kep mbigdip tig di kui bijo anai ei briep bou him. Noro midihwen bit na. Atri tut bipia hi dima coi bihwen na kan bi. Hi dima njei ade tentara nibousi nya bibindei cut kan bi. 14 Noro midikes hukum ei nani dip drek dip ade nibon munti nya. Midindig ig nibou ndig de ba, hum dima miyem mun nyeng di jo ttai nya hagom. Da di TUHAN disimbot dat tu.>>