Bindo tut minghas cun di iba linen ninggrun bibien
13
1 TUHAN cuk da mem gima duug pek minghas cun di iba linen ninggrun bibien ba, dibikri dintig bou a. Noro ma ditur minghas cun di iba linen ninggrun bibien dima ei minyeiti au. 2 Gima rino duug pek minghas cun dima ba, dibikri dintig bou a. 3 Leu api TUHAN cuk da bu bipai, 4 <<Aug ei Minyei Efrat nyai ba, aku minghas cun dima ei tig nggreti gom. 5 Gima rino duug ku minghas cun dima ei tig nggreti gom dideu Minyei Efrat dem igbit TUHAN nicuk dati pima.>>6 Nijam poi bu lene TUHAN cuk da mem gima duug ei Minyei Efrat nyai hanyen bu bidiyai minghas cun dima hanyen. 7 Gima rino duug ba, dibrim minghas cun pima leu tig nggreti di diku eisi lo, minghas dima nggun tu ba, bit bon dibikri dintig bou hanyen kan bi.
8 Leu api TUHAN pai bida hanyen bu, 9 <<Midibon nok gima tut timiei Yehuda kin timiei minu ndig Yerusalem. Midibindei sar ide ningon jei biborti di mipbor ngat dima. 10 Mben di isibut bibor dini igibit dihyet bi lewo ingkek ndok bibor. Ikuk yok bak nung di ngkiai nya ide ba, inok awak mem. Gima rino yoni midem kep minghas di nggun dini. 11 Dipi bibou limwa mben Israel kin Yehuda iba yonti bikri Da bingkiem noyam kin minghas cun di niceu nonti bikri nintig bou a. Tug hon nisinati dima lene inok Ditde limwa di ibindei ba, tungwatu ikon dinyeng ba, ibou cut biDa cem. Noro ikou sut gima ibit dihyet.>>
Bindo tut dibijig di anggur ngei joti
12 TUHAN Allah pai bida <<Yeremia e, atri tut Ditde nisokti bak mben Israel bipia suar yuhug ba anggur ngei ba, ibikwop dibijig ba anggur ngei gom-gom buut hak. Yoni mibuhup hanyen <Nggon rima nikan tut gi suar nuhug ba anggur ngei ba, nibikwop dibijig ba anggur ngei gom-gom buut bi i?> 13 Ma apai biyok bipia miduhug ba anggur ngei ei yo di ibong ei minu dini bitut nibou ndig di intun Daud him nya kin imam nya kin nabi nya kin timiei minu ndig Yerusalem yahagom poi ba, ibou ngwak sibui sut ri. 14 Leu api diba yok bibui yam nyen. Midingon nggriu sut ndigpoi nya kin pilei nya bi sren. Midibindei sar yok lewo dingon nem tut yok ba, dingondut yok cem bi. Da di TUHAN disimbot dat tu.>>
Yeremia pingok yok tut ide ningon jei biborti
15 Je di mben Israel e, TUHAN simbot dat tu! Ma jingon jei au! Jimiap kep nihyet a!
16 Suar jikon jide TUHAN Allah ninyeng bijo nai nipou tirigi Noni pinak nidinditi kwei bigyo ba, nipou tirigi ba nidinditi biluei nipigati di jiyok ngon mem bigyo. Leu mpe dima lene mijindrat mpia bijikinoi ei nungug him.
17 Gino jikou sut nimiap kep dihyetti ne midipim mmuti. Diba ningon di ngguk bibor bipim tut jide ningon jeisi dima. Diyai nggwei mikibor drek dip siceu nya di ikat TUHAN de limwa nya bikri yok ug ei ingkiaisi.
18 TUHAN pai bida <<Acuk nibou ndig kin nitnem ba, ijuk kwei leu ide nibou ndig de banggo mbrei lewo ide topi nibou ndig di kei bibor cut leu ibou nggramhim tu. 19 Siceu nya no igyon ttai minu ndig ngot di jo ei minu Yehuda nite bei mpia nibiho a. Ba, bit bon hi di kus no nyahan binjiriek niyon ttaisi dima billu kan bi. Yo dima ikat timiei Yehuda yahagom bikri yok ug ei ingkiaisi tu.>>
20 TUHAN pai bak timiei minu ndig Yerusalem nya <<Jingat i! Jide siceu nya no imbut kep kwei leu nite bei mpia nijjai ma kwei. Jide limwa di diba dingon com je tut nya bijinggei sut yok cem ingat rino hantou i? 21 Gino yo di jihig jisut bit yok pima ibindei timek je ba, inyeng tak kep je lene mijipai mindei sut yoni i? Ningat ne mijiyai niwei noyam kin sop di sindi ninghim dut tut nimunggwom nisrekti. 22 Hi rima jihig ser bipia nggon rino mun dini yok hagom cut igkep je i? Nggon rino siceu nya irik sinsun jide leu je dino ikat je di icut tut je i? Ma jiyok ngon kep bipia jitug ndei mun di buhun dima yok hagom drek dip jide sisar di nindig bibor. 23 Bon no di ningkek rom luei ningkek bitiei kei kan e? Bon macan kes ninta nibahai ei leu no kan e? Ningat ne hi nok gima bigyo sren. Nok gima cem tut je di jibon kep mun di kinei. Bit bon jibon mun di kei kan bi. 24 Midibindei ba, jintek gimahap noyam kin pas ntam di hou di cut kwei leu iggum ndigsi ninnei miep. 25 Gima ne mun di micut igkep je bit leu nok dikos tut eisi tu ri. Lewo jingon prion ser Da ba, jiba jingon com nung nya tu. 26 Da di TUHAN midirik sinsun leu jingkek bidibindei ba, jingat ngu leu api mijimmai sut jenti. 27 Dingat igbit je tirigi jibon kep mun nyeng di dingon mpo tut nya tu. Dingat gino juhuk bram nung nya ug ei nungug tou nya kin ngoi dumti nya tu. Jidem kep pinai gom di nibou buwei kep hi nitnem ba, jidem kep kuda nikre di bit niwek igkei. Je di timiei minu ndig Yerusalem e, buhun bibor mem je o! Apig bu leu api mijingon kwes ba, mun di kinei rap je bu bi i?>>