Yeremia nso bak TUHAN
12
1 TUHAN e, gino dikon ditde munhyet bidikes ei Aho bei ne akos tutti nya rino igbit a. Noro suar dihig ser Na tut munhyet di bitut ningon gomti. Nggon rino yo di isibut nya inyeng tut mun di isuar nya hagom i? Nggon rino yo di ingon sren bi nya igyai bipek kep mun di ita ibou eisi i? 2 Ata yoni nok ata njita kioi leu api igau com dihyei. Yehei ba, ingat ningat. Ighyet di itri tut Nani tereu nok nihyet di kei bikwop noro ningat ne igiyok ingon mem Nani bi. 3 Noro TUHAN e, akan tut dani. Angat diyai munti nya ba, akan tut bipia dingon gom tut Na. Ma akri yo di isibut dima yok bit leu nok domba di ijem ug ei mpia di ibui nok mikwau kikep eisi. Aya ser yok kikau ug bipek njap ngon bou dima ibui yok dem ug e. 4 Dihyei ninjek dip ei minu dini mingak-cai ba, gandum mimui bidem ngoi dumti nya ug bipek apig bu i? Nyende mben ide nisibutti bindei ba, ha nya kin mindhe-ndhe nindigsi nya imai ningwig tu. Yo dima ipai bipia Allah ngat mun di mipek kep mem nye bou niyai him bi.5 Lene TUHAN pai <<Yeremia e, gino nani kin tungwatu nya jibinang yam lo, anghuisi wei lene dem tut gima nani kin kuda jibinang yam kan bi. Gino attin bibor ei mpia di mbum-bra dini lene abon mindei ngan ei mpe di angat rin ei baham tigotti ei Minyei Yordan nyai i? 6 Yo dima ibakilak na tu lo, yoni he bi noro bitut ade adig-ajoi nya cem. Yahagom ibicom yam mem gima ihwen na. Mbro nok gino ikes igkep ighyet di mmau kei lo, ma aba angon com yok au.>>
TUHAN ningon ngguk drek dip Nide limwa nya ide sisar
7 TUHAN pai <<Dikes Ditde Ig ei su. Dikou sut mben Israel di didimig yok tu. Dikes Ditde limwa di dingon ngakei yok nya ei ide siceu indati tu. 8 Lewo yaham imbuk kep Da noyam kin singa ei baham tindurti di yau-yau nyen binggok Da. Gima rino dingon mpo tut yok. 9 Yoni idem kep ha nitu di hacam nya icut igkep ba, isus ningut bei ninghim-noho kin ninggangti nite hi nite hi cem a. Ajem mindhe-ndhe di iten-pos nya gom-gom kwei leu binhyepo yoni cem injei bibindei ngwig Ditde limwa nya hak ug. 10 Nibou ndig ngkiai nya imang bibor inda jo kep Ditde miai ba anggur nghousi binggek tu. Itug-tug nyen gandum ei Ditde ngoi dumti nya cem tu. Ibindei ba, Ditde minu di kei-kau bidem kep iggum ndigsi di mpia mbum-bra bram. 11 I, dingat lo, ibindei Ditde minu bidem kep mpia di mbum-bra di biyai ningon di ngguk. Hagom kinei-kinau leu api hi di ningon buhun tut bi. 12 Siceu nya di ikwei leu nungug him ibikwam ug ei iggum ndigsi mem gima ipos ndigban. Dibindei ba, pran cut lene diba pran dima binggek minu titut yam. Apino tungwa hi dima bong kei gwam kei bu bi. 13 Ditde limwa nya indim gandum ngan ei miaisi leu api ipi bikos gandum ningat kwei noro ikos mintu-minta he kwei. Icom yahanggwap noro ingat ningat hi bi. Ditde nigga biborti bindei ba, ide gandum ngat ningat hi bi.>>
TUHAN nipreu eisi mem ngkiai nya di ibong ttai minu Israel
14 TUHAN pai <<Gini ne Ditde nisokti mem ngkiai nya di ibong ttai minu Israel di inggek dihyei di diyai bak Ditde limwa di mben Israel ri. Midibindei hei yo di isibut dima leu ide minu nya noyam kin njita kioi di yohom leu dihyei ba, midikwek timiei Yehuda nya leu inda nsi. 15 Noro tirigi dibindei hei yok lene midingondut yok hanyen bu. Midibuwak bikwop ngkiai nya yahagom ba, midikes yok ei itimieisi hanyen. 16 Gino iba ingon titut bicigit Ditde limwa nya ide nibindei mbut mun di ikuk yok bakti kui yok lene iba neheng bipai <Nipreu ei tug hon TUHAN di niyaijo ninyeng> (bit leu nok nipou yo ico dri Ditde limwa nya tut gima yeheng tug hon Baal ninyeng) lene yoni cem minggre kin Ditde limwa nya ba, ibong kei igwam kei. 17 Noro bikwop ngkiai nya di ibit dihyet bi ne midohom yok noyam kin njita kioi di tungwatu nya yohom ba, dibicok tut yok. Da di TUHAN disimbot dat tu.>>