Yeremia pingok timiei Yehuda nya ingonti tut gi preu di Allah preu ei mem yok
11
1 TUHAN pai bida, 2 <<Ma angig atingou mem gi preu di dipreu ei mem Ditde limwa nya nidimigsi di suar yahati tut nya. Apai bak timiei Yehuda kin timiei minu ndig Yerusalem nya bipia 3 Da di TUHAN Allah disigion yo di yahagom di ibit Ditde gi preu dima nidimigsi bi nya. 4 Dibon gi preu dima mem idigup bat-idigai bat nya mpe dino dibuwak yok kwei leu minu Mesir mpia di nok komfor hum di cig-cai biyem yok. Disok kep yok leu binhyepo ibit dihyet ba, ibon kep Ditde nicuk yokti nya hagom. Tini bu ne dipai biyok bipia gino ibit dihyet lene yoni minok Ditde limwa nya ba, dinok ide Allah cem. 5 Gino ibon mun dima yok hagom lene midiyai bipek kep mun di dipreu ei mem idigup bat-idigai bat nya. Midiyai minu di nogindini ibongti dima di nnum kei di mun nyeng hagom dem kei joti dima biyok ri.>>Lene dibuhup bak <<TUHAN e, Igbit ri.>>
6 Leu api TUHAN pai bida <<Aug ei minu ndig ngot di jo ei minu Yehuda. Aug ei simpak bou ngot di jo minu ndig Yerusalem ba, atri tut dihyet di disok ei na dip dini bak yo di ingat rin ei sirima. Asok kep yok bipia suar ingig itingou mem dihyet bibit Ditde gi preu pima nidimigsi di suar yahati tut nya hagom. 7 Mpe dino dibuwak idigup bat-idigai bat nya kwei leu minu Mesir lene disok kep yok bingkiem leu binhyepo ibit dihyet. No disok kep yok tut mun nyeng dima kikau kwei bipek ammani kep. 8 Disok kep yok leu binhyepo ibit gi preu dima. Noro igimiap kep ba, igibit kep dihyet bi. Noro ingkek ndok bijo kikau ba, isibutti jo kikau noyam kin gi nipou nya. Gima rino dikes hukum hagom di jo ei gi preu dimati ei yoni dip ug a.>>
9 Leu api TUHAN pai bida bu <<Timiei Yehuda kin timiei minu ndig Yerusalem nya igyok ingon gom mem gima yaham imbuk kep Da tu. 10 Ibon kep sisar di idigup bat-idigai bat nya ibon kep. Sisar di idigup bat-idigai bat nya ibon kep dima rino igibit dihyet bi ba, ikuk yok bak nung di ngkiai nya ikuk yok bak nya. Igyai mun bibicim tindei Ditde nicuk yokti cem bi. Israel kin Yehuda yahacem injiriek Ditde gi preu di dipreu ei mem idigup bat-idigai bat nya tu. 11 Gima rino Da di TUHAN dipingok ingonti. Suar igyok ngon kep bipia midikes mun di buhun bibor kwei ei yoni dip ba, bit bon ingwes ngun kan bi. Gino yahara mem gima dimpu yok lene midimiap ighyet bi. 12 Leu api timiei Yehuda kin timiei minu ndig Yerusalem nya miyuug hara ide nung nya di ikuk yok bak tug hon nibon midut nindig mindhe titut kep humti leu binhyepo nung nya impu yok. Mpe di mun di buhun bibor dima kwei ne nung di ikuk yok bak nya isindem mem gima iteu yok bingwes ngun kan bi. 13 Timiei Yehuda nya ide nung mang bibor ba, nimangti dem igbit ide minu ndig nimangti. Timiei minu ndig Yerusalem nya iwin ide nimbar hum dokti ba, nimangti dem puig di mbut ei minu ndig Yerusalem nimangti ba, ibikuk yok bak Kwar Baal tug hon midut nindig mindhe titut kep humti. 14 Gima rino na di Yeremia e, ma angat nadi tindei yok au! Ma ahara Da mem gima dimpu yok cem au! Gino mun di buhun bibor cut igkep yok leu api yahara Da mem gima dimpu yok lene mporo digimiap ighyet bi.>>
15 TUHAN pai <<Ditde limwa di dingon ngakei yok nya ibon mun di kinei bibor nya tu. Dem mem gima icoi-coi nyen kwei ei Ditde Ig bi. Ikan bipia gino ipreu mun ei bit Da ba, ibon midut nindig mindhe titut kep humti lene igyai munti dima mibikkin ser mun di buhun bibor dima e? Igyai ningon llei bibor tug hon nisinati dima e? 16 Nipou pini jug ne dijem mben dima inyeng biei zaitun di nggrou di ningat di kei hun tut. Noro tini bu ne diba nihyet di nok kru nindig bibor bindig nimeng ba, didahat ninda nya hagom cem.
17 Da di TUHAN Di Disindem Bibor rino diwin minu Israel kin Yehuda. Noro tini bu ne dikos tut bak yoni bipia midikes mun di buhun bibor ei yok dip. Yonti rino ibindei di mun dima cut igkep yok lewo ibon kep mun di kinei tug hon ide midut nindig mindhe titut kep humti ba, ibikuk yok bak Baal. Apino digga yok ug a.>>
Nimpung nisibut gom igyok ingon gom mem gima ihwen Yeremia
18 TUHAN mbot kep bida tut siceu nya di igyok ingon gom mem gima ihwen da. 19 Didem kep domba di ijem nyahan ug ei mpia di ikos kep domba nya eisi. Ikos tut ingon kanti di kinei dima mem dani lo, digikan tut bi. Yuhum yam nsi <<Jikwei ba, iwim biei di ngat ningat kei dini. Icok tut noni hak ug leu binhyepo tungwatu ingon prion ser ninyeng hak ug.>>
20 Leu api dingat nadi bidipai <<TUHAN Di Sindem Bibor e, Nani ne nikei di ningon gom ri. Nani rino abingon tungwatu nya ikan-kan nyenti kin tungwatu ingonti. Dikes munhyet dini bak Nani. Nnaba abindei ba, dingat Ade nibuhup biyokti drek dip ide nibon munti dima yok bou diyai him.>>
21 Timiei minu ndig Anatote nya ijoi sut gi igyai nimai bida bipai <<Gino atri tut TUHAN nisok kep nyeti nya binye bijo kikau lene miniyai nimai bina.>> 22 Gima rino TUHAN Di Sindem Bibor pai <<Midikes hukum ei yok dip! Pinai pilei di ide nya mimai ei nikon pranti. Lene munggwom di ide nya mimai inggum. 23 Dikos tut nituti mem gima dibindei ba, mun di buhun bibor micut igkep mben Anatot tu. Tirigi hukum dima tau kep yok lene hi dima ningwes ngun leu bi.>>