Bed di biang mpia ngei ndung
14
1 TUHAN pai bida tut bed di biang mpia ngei ndung,2 <<Minu Yehuda ningon ngguk bibor lewo nide minu ndig nya nahanok ma mai. Timiei Yehuda nya ibong ei dihyei njek dip lewo ingon buhun bibor. Minu ndig Yerusalem hara bak no di mikwei mpu no.
3 Yo di inyeng icuk ide awak nya biyuug nggok minyei bidem minyei bousi kin bak minyei nya noro hagom pingge leu su leu api awak dima yok ingkwei hanyen tut ide dibijig di ngwak. Ingon kiowi niti ba, ide ningon cut leusi bindei ba, immai sut yonti binggai kep iimaisi.
4 Yo di igyai miai inggai kep iimaisi lewo ingon dahat leu drek dip mpia di but bi kin dihyei ninjek dip di nggos bibor.
5 Minta hagom mui bingwig su. Gima rino rusa niwek kes nimien di sindi bep ei bimbut leu.
6 Keledai bigbehei nya cem igya hak bidem nungug dip nya ba, igyai nggrop buhun lewo minta mui bingwig leu su leu api innei sor noyam kin nsien mbrei nya.
7 Ditde limwa nya yahara Da bipai <TUHAN e, mbro nok gino nyeni ningon hukti tut nyende sisar lo, ma ampu nye bit leu nok apreu ei mem nye tu. Niba ninghim bak Nani mbirimang ba, nibon sisar tut Nani cem tu.
8 Nye di mben Israel niyok ningon mem Nangkom. Nangkom rino ateu nye ba, ningwes ngun leu mun di buhun bibor. Nggon rino abon Nanti nok ngkiai ei nyende minu dini i? Nggon rino anok no di mbut binggi minu ba, kwei bong bit nye mem mmun gom ngat he i?
9 Nggon rino anok no di ningon tai-tai bou kin tentara di isindem mem gima impu nye bi i? TUHAN e, nijit ne angat rin bit nye! Nyeni ne Ade limwa nya ri. Ma akes nyeni bihigom ei au!> >>
10 TUHAN pai sut mben dini <<Diwok yok lewo inang leu Da ba, yoom kep ingon kan bi. Midingon prion ser ide mun di igyai tunggwei nya bi. Dikes hukum ei yok dip drek dip ide sisar.>>
11 TUHAN pai bida <<Ma ahara mem Da leu binhyepo dimpu yo dima au. 12 Mbro nok gino igyem njita bi mem nituti poi lo, midingig ditingou mem ighyet bi. Mbro nok gino ibon midut nindig mindhe titut kep nimbar humti kin midut njita nibipai sigyo bak Dati lo, dijoi sut yok bi. Noro midiba pran kin ninggum kin nsuwer ajar bihwen yok ningwig a.>>
13 Lene dipai <<TUHAN Di Ninyeng Jei Bibor e, akan tut bipia nabi nya ipai bak ide limwa nya bipia pran kin ninggum mihwen yok bi sren lewo apreu ei mem yok bipia ibong kei igwam kei kikau.>>
14 Noro TUHAN buhup <<Nabi dima yok iba dinyeng biris mun he. Dipinak yok ba, diyai nicukti biyok bidimbrap bit yok cem bi. Ningat-hi-ngat nya di ingat di isimbot kep nya kwei leu Dani bi. Ide nimbot kepti nya kwei leu yonti ingon kanti he ba, bon ninyeng bi. 15 Yoni itri tut yonti ighyet tug hon dinyeng bipia bit bon pran kin ninggum cut igkep minu dini kan bi. Noro dikes dihyet nok gima biyok bi. Yeremia e, Da di TUHAN midiyai notou sut nabi di dipinak yok bi dima i? Midiba pran kin ninggum biyai nimai biyok. 16 Nabi pima yok di itri tut nihyet biyok cem mitug ndei nimai tug hon nisinati dima. Ide siceu nya micom ingut sinsiou bidem simpak bou ei minu ndig Yerusalem noro yo di ingwes ngun hi di mitig yo dima ingut bi. Mun di buhun bibor dini micut igkep yahagom bitut itnem bat nya kin imunggwom bat nya cem. Midibindei ba, ibiang ide sisar di kinei bibor dima nibuhunti.>>
17 TUHAN cuk da ba, ditri tut dingon di buhun bibor bak Nide limwa nya. Suar dipai biyok,
<<Nna ba diyai nggwei kibor ug hon nohonti bidikes hon kan bi lewo ditde limwa nya ibok-ba ba, inghuisi wei nindig bibor.
18 Tirigi duug ei beisi nya lene dingat lo, tentara nya ingut mang bibor. Tirigi dicoi ug ei minu ndig nya lene dingat tungwatu nya di ninggum hwen yok. Nabi nya kin imam nya igyai kep ide midyai di suar igyai nya noro ingon dorti tut mun di igyai nya bi.>>
Timiei Yehuda nya yahara TUHAN mem gima ngondut yok
19 TUHAN e, akou sut timiei Yehuda nya bihigom tu e? Angon mpo tut timiei Sion nya e? Nggon rino abui nye bibor lene abindei ba, bit bon nikei hanyen kan bi i? Nijoi sut bipia nibong kei nigwam kei noro bi. Niba ningon com bipia nikei hanyen noro mun di bindei di ningon ttin bibor cut igkep nye.
20 TUHAN e, nibon sisar tut Nani tu. Gima rino nipai jit nyende sisar kin nidigup bat-digai bat nya cem ide sisar.
21 Ma ayok ngon kep Ade nipreu ei mem nyeti ba, angwes om nye cem au. Ma aluei angonti tut apreu ei mem nyeti au. Ma angwes pri gau minu ndig Yerusalem au lewo Ade banggo mbrei di kei-kau-kei jo ei minu ndig dini.
22 Bit bon ngkiai nya ide kwar nya ibindei ba, mpia but kan bi. Mpia-bbed him cem sindem mem gima bindei ba, biget mbras kwei ei dihyeisi dini bi. TUHAN e, niyok ningon mem Nangkom. Nangkom he rino abindei ba, mun dima yok pek kep mem nye.