8
1 Mpe dima lene jide siceu nya miket nibou ndig nya kin nibou timiei Yehuda nya di igya kui yok nya kin imam nya kin nabi nya kin timiei minu ndig Yerusalem nindigsi nya yahagom injum leu ijui nya. 2 Iket injum dima leu ijui bijo keyam mem gima itig hanyen ei dihyeiti bu bi. Noro iba injum dima yok bimbin mpia ei dihyei ninjek dip nok mumpiang hak. Injum nya mijo sinsiou hak ei mpia njap kin bed mmun kin ham mpia-bbed him nya di yo dima ikuk yok bak di ingon ngakei cem igyai midyai mem cem ikuk yok bak cem yahara bindo puig biyok cem hagom yoho bei. 3 Apino mben di ibon munti kinei dini di ingwes ngun bigyaisi jo yo nya di dibindei bintek gimahap ug ei tirima-tirima mingon bisau ndam ide njap ningwig honti hak leu gima igyaijo a. Da di TUHAN Di Disindem Bibor disimbot dat tu.>>Timiei Yehuda nya ide sisar bindei ba, hukum micut igkep yok
4 TUHAN cuk da bidipai bak Nide limwa nya <<Gino tungwagom cut lene noni mikiju hanyen. Gino hi kriek leu puig lene noni mingkwei hanyen. 5 Nggon rino je di jinok Ditde limwa nya jikriek leu pui di nijit ba, jiba jinghim biDa bijo kikau i? Jikrau kep jide kwar nya di jikuk je bak bingkiem ba, jikou sut gi jingkwei hanyen ndam Da. 6 Dibeintup ninno tu noro jiba jingon sren bipai mun biDa bi. Jigom ngat cem ginso nonti tut nibon munti di kinei bi. Hi di pai bipia nitunggweisi rimindei i? cem bi. Jahagom jidor kak jide puig dem kep nok kuda di ba ningon bisau sut nikon pranti bicoi pran. 7 Kindus kan tut nituti di ngkwei hanyen ug ei nitimieisi. Hakimoi kin hacincau kin ha murai cem ikan tut nijam di ipri leu itimieisi ba, yuug ei mpia ttou nsi hiter bu. Noro je di jinok Ditde limwa nya jigikan tut Ditde niggai serti nya di diyai bije bi. 8 Jibrim jingkek bibor bijipai bipia jingon ki bijikan tut Ditde niggai serti nya! Ma jiyok jiyai kep yo di ibindei mbut mun di jikuk je bak di ingon can nya lewo iluei Ditde niggai serti nya tu! 9 Yo di ingon ki ei jikieti mitug ndei nimmai sut yonti. Ibou buwei ba, ibiam bon drek dip. Ikou sut Ditde nipingok ingonti apino ningon ki-kut mindei rino jo bit yok i? 10 Gima rino yo di hiter migyai ide ngoi dumti nya nok ide dihyei ninda rom bu. Midikes itnem bat nya bak yo di hiter bu. Ndigpoi nya kin munggwom nya yahagom iba ingon di sren bi biris mitiei leu yam ba, nabi nya kin imam nya cem iris mun bak ide limwa nya. 11 Yoni ingat Ditde limwa nya ibokti dima nok ibokti di mien he ba, ipai biyok <Dwai. Hagom kei ba, jo nyahan.> Noro ningat ne nok gima bi sren.
12 Je di Ditde limwa nya e, suar ma jimmai sut gi jibon mun di kinei dima hagom. Noro jingkek ndok ba, jigikan tut jide nimmai sut jentiti bi. Gima rino mijimai nimbiam noyam kin nindigsi nya di imai su. Tirigi dikes hukum ei yok dip lene igyaijoti mingwig hon.
13 Dipi bidimbus Ditde limwa nya keyam noyam kin gi tungwatu nya imbus njita kwei leu beisi lo, yoni idem kep ba anggur kin biei ara di ngat ningat bi. Nimeng nya cem mbris. Gima rino disindui sut ba, ngkiai nya ikwei ba, inyeng tak kep Ditde limwa nya itimieisi. Da di TUHAN disimbot dat tu.>>
14 Allah de limwa nya ihig yam <<Nggon rino igwam hak ba, immou kep yam he i? Jikwei ba, yahagom ipri ug ei minu ndig di bon tentara nibousi di igya coi nya leu api nnaba yahagom imai ei sirima. Ide TUHAN Allah kos tut bipia suar isar. Noni yai krisieu ngei binye mem gima idut lewo ibon sisar tut Noni tu. 15 Ingon ya mem nijam nibong kei nigwam keisi kin nijam niyai ningkek ngun eisi hanyen noro gima mikui-kausi he. Lewo mun di bindei di ingon ttin jo kep nye. 16 Siceu nya ingat rin ei minu ndig Dan tu. Kuda di ide nya idungwek ba, tibim ei itingou nsi bimiap tu. Timiei minu dini yahagom ittin bibor. Siceu nya ikwei mem gima ibindei sar ide minu nisurti-nipekti bitut mun di joti nya hagom kin ide minu ndig nya bitut timiei di ibong ser nya cem.>>
17 TUHAN pai <<Jitou kep! Nogindini dipinak wou nya hwou ug ei jikieti leu binhyepo yaham je. Wou piet di dem mem tungwatu iba porei nya bipijuk ingonti bimuhup kan bi.>>
Yeremia kan-kan nyen tut nide limwa nya biningon ngguk tut yok
18 Ningon di ngguk bindei bidingon bok cem dingon dut cem ba, dem mem gima obat mpu ditde ningon ngguk biborti kan bi.
19 Jimiap i! Ditde limwa nya iba nipim bahara kot. Ighyet dima nugwei bong bidem minu nisurti-nipekti ba, ihig ser <<TUHAN ningat rin ei Sion bu bi e? Ide nibou ndig no hantou i?>> Lene ide nibou ndig di TUHAN buhup <<Nggon rino jikuk je bak kwar di ibon inyeng bi bibor nya i? Nggon rino jibindei di dingon wei tug hon gi jikuk je bak kwar di jibon bou jinda him nya di ibon inyeng bi bibor nya i?>>
20 Mben Israel yahara <<Nijam nikos gandum kui ig gudan kin nijam ngei ndung cut njiriek tu. Noro igingwes ngun cem bigyo.>>
21 Dingon wer mumpiang lewo mben de nya inggwen buhun. Dingon ngguk bibor bidingon mbut-mbut nyen cem.
22 Apo mindei rino bindei dino ditde mben igyai ningkek ngun eisi hanyen bigyo di kwei bipek nogindini i? Apo no di ninda kan kin obat hi jo bidem Gileadb nisurti-nipekti bi e?