9
1 Gino dibou midem kep minyei bousi di mpung tut minyei ba, diyai midem kep kon di bindei srek minyei lene midipim nggruet mmun jei njap jei tut mben de di siceu nya igyai nimai bi yok nya!2 Handei kon ba, midingat mpia ttou nsi gom di yo di imbut puig sinon ibong kep inghuisi eisi ei iggum ndigsi mem gima dibongti lene midikes mben de nya leu ba, dinang ug ei mpia dima bidibong minu ting leu yok! Yahagom yaham imbuk kep Allah tu. Inok nimpung nibicom yam di ingon gom tut Allah bi.
3 Itindei kep nituti mem gima iris mun bijo kikau. Mun di nijit ninyeng tak kep minu titut yam bi. Noro ningon sren bisi kieng kep minu nisurti-nipekti.
TUHAN pai <<Ditde limwa nya ibon mun di kinei bibor bijo-jo yam dip. Ikon Dani bidinok ide Allah cem bi.>>
4 Suar bikwop tungwatu nya ingon sok kep yonti tut isut bat nya. Gi mbun adig-ajoi ningat-ngat nya cem iba ingon com yam kan bi. Lewo idem kep Yakub ba, bikwop yahagom iris bak ide adig-ajoi nya. Bikwop tungwatu nya ibindei hi ninyeng kinei ba, iris mun cem.
5 Yahagom iris yam nyen ba, hi di pai mun di nijit-jau bi. Iris mun biyam kikep ba, insi yai ngan-ngan tu. Ikou sut gima ikes hon ba, ibon sisar bu bi kan bi.
6 Nisibut tut yamti jo kep nisibut tut yamti ba, niris mun biyamti jo kep niris mun biyamti. Ibon kep nok gima bijo kikau ba, irok TUHAN bibor ei cem.
7 Gima rino TUHAN Di Sindem Bibor pai <<Midibingon Ditde limwa nya dem kep nok tukan di kwen ngkimom nitu leu binhyepo idem kep ngkimom nitu di pimbai kei. Mindei bu rima dibon bak Ditde limwa di ibon mun di kinei bibor dinok gima i?
8 Ighyet di tibim leu yuhui him nya buhun bibor ba, dem mem gima biyai nimai bak tungwatu cem dem kep tibor di iba krisieu ngei bidip niyenti cem. Ighyet di indat kep nya mpung tut niris mun ningkom he. Ikes igkep ighyet di mmau kei di brim ingon noro nijit ne ighyet nok bon di indin ri.
9 Suar ma dikes hukum ei mben dini yok dip bit leu ide nibon munti nya bi e? Midibuhup biyok drek dip ide nibon munti nya bi e? Da di TUHAN disimbot dat tu.>>
Yeremia ningon ngguk tut nide limwa nya
10 Da di Yeremia dipai <<Midingon ngguk tut nungug him nya. Diyai nggwei kibor tut beisi nya lewo hagom ngoi-nga ba, tungwatu nya ikriau binjiriek cem tu. Mindhe di ihyen kep nya idungwek eisi bu bi ba, ha nya kin mindhe-ndhe di niten-pos nya hagom inang bingwig leu su.>>
11 TUHAN pai <<Midibindei ba, minu ndig Yerusalem cut bitimek ningwig leu api nsien mbrei nya milus-lus nyen kwei bibong ser ig kumti ba, minu mien nya di jo ei minu Yehuda nya minok ha ngunti lewo timiei nya isar bingwig leu su.>>
12 Lene dihig ser TUHAN <<Nggon rino minu dini timek bingwig binok mpia ngoisi di ngak-cai apino tungwatu nya ikriau binjiriek i? Tou riningon ki biningon dorti tut mun dini yok i? Apai nisinati tut gini bak tungwa tou leu binhyepo noni tri tut bak nindigsi nya i?>>
13 Lene TUHAN buhup <<Mun dini yok hagom cut igkep Ditde limwa nya lewo igyok ngon kep dipingok yokti nya ba, ibit dihyet bigyai igbit dicuk yokti nya bi. 14 Ingkek ndok ba, ikuk yok bak Baal de kwar nya bit leu nok idigup bat-idigai bat nya ingginau yok tut. 15 Gima rino ma atou kep mun di Da di TUHAN Di Disindem Bibor di mben Israel ide Allah dikes bicut ei yok dip. Midiyai njita di mpo-mpam biyok bigyem. Miduhug krisieu ngei biyok bidut. 16 Midibindei ntek gimahap yok srig ngkiai di yoni kin idigup bat-idigai bat nya cem ikan tut yok bi nya ikieti. Lene midipinak tentara di mikon pran bit yok bram yam kikau bibou yahagom isar bingwig ug e.>>
Timiei minu ndig Yerusalem yahara mem gima hi kwei mpu yok
17 TUHAN Di Sindem Bibor pai bak Nide limwa nya <<Ma jiyok ngon kep mun di sindi cut igkep minu dini. Ma jibipbur ba, jihig nipim bikiek nimai cig nya kwei leu binhyepo iba doia bikiek jide ningon ngguk biborti.>>
18 Lene timiei Yehuda nya ipai <<Acuk yok leu binhyepo ibipbur bikwei pim ba, ibikiek nimai mem nahagom bibindei ba, niyai nggwei kibor bisilipti ningyoi nya.>>
19 Ma jingig jitingou mem mben Sion di ipim kui jei bipai <<Nitimek biningwig binimmai sut nyenti. Lewo suar nikes nitimieisi ei binimbut leu. Nyende siceu nya inggek nyende ig nya sinsiou bingwig.>>
20 Lene dipai <<Je di sop nya jahagom e, ma jimiap kep TUHAN nihyet. Ma jingginau jipmisop bat nya leu binhyepo ipim ba, ibikiek nimai igkei. Ma jipingok jisut bat nya ingonti leu binhyepo ingon ngguk bibor ba, ipim bibikiek nimai igkei.
21 Lewo nibon kep nimai cig coi nyende kendera mihyet kwei su ba, tau ug ei nibou ndig de ig tu. Nimai kat munggwom nya kak simpak bou nya bihwen pinai pilei nya ei biyati cem.
22 Nimai ngut jo sinsiou dem kep nok mumpiang di kui sur mpia kin gandum nintam di ikos di ikes ei beisi noro hi kam bi. Gini ne TUHAN nicuk dati rin ba, suar ditri tut bak tungwatu nya.>>
23 Lene TUHAN pai <<Ma yo di ingon ki nya illei sut ide ningon kiti au. Ma yo di isindem nya illei sut ide nisindemti au. Ma yo di inyeng nya illei sut mun di inyeng tut nya au.
24 Tungwa tou rino llei sut mun nyeng hi lene suar llei sut gi noni kan tut Dani biningon dorti tut dingon kanti nya. Lewo dingon ngakeisi jo ninno bijo kikau ba, dita nikos tutti nya di mungkun kei kin ningon di sren tut yamti ei dihyeisi bingkiem-kiau. Dijoi sut mun dini yok hagom. Da di TUHAN disimbot dat tu.>>
25-26 TUHAN pai <<Nijam dem ne midikes hukum ei mben Mesir kin Yehuda kin Edom kin Amon kin Moab kin timiei iggum ndigsi di ikos ibou nta bicun dip.c Yo dini kin mben Israel yahagom igyai nibon midut sunat tu noro yahagom igyai munti nya noyam kin yo di igyai nibon midut sunat nya igyai munti nya bi. Lewo igibit gi preu di nibon midut sunat tak buk kep bi.>>