Yeremia tri tut nihyet ei TUHAN De Ig
7
1 TUHAN cuk Yeremia, 2 buug biya kui dimbou pmem ei TUHAN De Ig lene tri tut biyok <<Je di timiei minu Yehuda di jicoi ug jicoi kwei nyen ei dimbou pmem dini bijikuk je bak TUHAN e, ma jingig jitingou mem TUHAN nihyet. 3 Da di TUHAN di mben Israel ide Allah Di Sindem Bibor dipai <Ma jittin ser jide sisar kin jiyai munti di kinei bibor nya leu api disindui sut ba, jibong ser jitimieisi dini gingga. 4 Ma jiba jingon com yo di iris igkei nya di ipai bije bipia jibong kei jigwam kei drek dip TUHAN De Ig di jiwin ei mpia dini au. Lewo ipai bipia Igbit ri! Ig dini ne TUHAN De Ig ri!>5 Ma jinggek tut jiyaijoti di kinei bibor bijittin ser jiyai munti di mbuk bibor nya. Ma jiba jingon gom biyai mun tut yam. 6 Ma jico kep ngkiai nya kin moibihi nya kin sop kibom nya yahagom bu au. Ma jiyai nimai bak no di ningon ngun ei jide minu dini au. Ma jikes hon ba, jikuk je bak nung nya bu au lewo jiyai munti dima mibindei ba, jisar bijingwig. 7 Gino jinggek tut jiyaijoti di kinei bibor leu lene midisindui sut ba, jibong ei jide minu di diyai bak jidigup bat-jidigai bat nya dini bijo ninno bijo kikau.
8 Noro ningat ne jiba jingon com yo di iris igkei nya ighyet mikui-kausi he. 9 Jinggimang cem jihwen mun cem jicut tut yam cem jiba neheng om ser mun ei nikei noho bei cem jindig mindhe ei Baal de nimbar hum dokti cem jikuk je bak ngkiai nya ide kwar nya cem. 10 Niabiati jibinut kep jibon sisarti dima hagom leu su lene jikwei ya ei Doho bei ei Ditde Ig dini bijipai <Nibong kei nigwam kei o!> Leu api jibisinggre bijibon kep mun dima yok hagom hanyen bu. 11 Jikan bipia Ditde Ig dini noyam kin hak mihyeti mem ninggimang kep mun cig nya iku yok nyahan eisi e? Dingat jiyai munti nya hagom bou diyai him tu. 12 Ma juug ei Silo.a Minu ndig di didimig ei mem gima jikuk je biDa eisi. Ma jingig jiyai kep hukum di dikes ei Ditde limwa nya dip drek dip ide sisar di ibon ei mpia dima bou jiyai him. 13 Mbro nok gino dimbrap bit je kikau su lo, jikou sut dihyet bijibon bidem sisar ninyeng dini yok hagom tu. Tirigi dihig je lene jinghek Da ba, jibuhup dihyet bi. 14 Gima rino midikes hukum ei Ditde Ig dini di jiba jingon com di diyai bak jidigup bat-jidigai bat nya kin jeni dip noyam kin hukum di dikes ei Silo dip. 15 Midijji jeni ug ei minu ting leu Doho bei dem kep nok dijji jide bat mben Israel nya nipou su. Da di TUHAN disimbot dat tu.>>
Timiei Yehuda nya ingkek ndok
16 TUHAN pai <<Yeremia e, ma angat nadi tindei yo dini au. Ma ahara Da mem gima dimpu yok ba, angat nadi mem yok au. Ma abidip huk Da tut yok au. Lewo dikou sut nadi di angat mem yok. 17 Angat mun di ibon ei ide minu nya kin mun di timiei minu ndig Yerusalem ibon ei simpak nya bou ayai him tu! 18 Munggwom nya irop biei ba, pinai nya ibindig hum. Leu api sop nya ibon tepun nok roti mem ide kwar di ikuk yok bak di ijem ninyeng bipia Nibou Ndig Sop Gwamti. Lene ibon midut nisiber ba anggur ningei bak nung nindigsi nya cem leu binhyepo ibindei ba, dingon buhun. 19 Noro ibindei ba, dingon buhun bi. Ibindei ba, yonti ingon buhun apino ibimmai sut yonti. 20 Gima rino Da di TUHAN Di Dinyeng Jei Bibor midisiber Ditde nigga biborti ug ei Ditde Ig dini kin tungwatu nya kin mindhe-ndhe nya kin biei ninjem nya kin njita beisi hagom dip. Ditde nigga biborti nok hum di cig-cai leu api bit bon hi mu kan bi.>>
21 TUHAN pai <<Je di Ditde limwa nya e, jikan tut bipia suar jindig mindhe-ndhe di jindig kep hum ei nimbar hum dokti ma jindig bingwig hak ug. Disindui sut ba, jiyem mikwau hiter di jindig ei nimbar hum dokti ndrim hi. Noro Da di TUHAN dipai bije bipia nna ba, jiyem mikwau hagom bingwig ug! 22 Tirigi po dibuwak jidigup bat-jidigai bat nya kwei leu minu Mesir pima lene dipai sut nidimig sutti tut nibon midut nindig mindhe titut kep humti kin nibon midut hiter bak yoni bi. 23 Noro dipai nicukti gom ngat dini biyok. Suar ibit dihyet leu api dinok ide Allah lene yoni inok Ditde limwa nya. Lene dicuk yok bipia suar ibit dicuk yokti nya leu binhyepo ibong kei igwam kei. 24 Noro ibit dihyet bi ba, ingkek ndok. Ibit leu yonti ingon kanti lewo ingon ndok bibor ba, imbuk bibor cem ba, niyai munti di kei bibor hi ntun yoni him bi noro igyai munti di mbuk bibor kum eisi bu. 25 Dipinak Ditde awak di nabi nya ndam je tirigi po jidigup bat-jidigai bat nya yehei leu minu Mesir pima kikau kwei bipek ammani kep. 26 Noro jingig jitingou mem ighyet bijiyok ngon kep ide nicuk jeti nya bi. Jengkom dini jingkek ndok ba, jaham jimbuk kep Da nindig bibor dor njiriek jidigup bat-jidigai bat nya.>>
27 Lene TUHAN binut nihyet bu bipai bida <<Gima rino Yeremia e, mbro nok gino atri tut dihyet dini hagom bak Ditde limwa nya lo, yoni igimiap kep ahyet bi. Mbro nok gino ahig yok lo, igibuhup bi. 28 Gima rino apai kep yok bipia inok mben di ingkek ndok igkei. Dani ne TUHAN rin bidinok ide Allah noro ibit dihyet bi. Hukum di dikes ei yok dip tot ingonti bi. Ide niba ningon com Dati pren hak leu yok ba, isimbot kep biyam tut cem bu bi.>>
Igyai munti di kinei bibor ei Mbang Briep Hinom
29 TUHAN pai <<Je di timiei minu ndig Yerusalem e, ma jingon ngguk bibor! Ma jikak jibou nta bijicom! Ma jipim bijibikiek nimai nya ei mbigdip nya lewo Da di TUHAN dingon sibui sut je ba, dikou sut jahagom.
30 Timiei Yehuda nya ibon mun di kinei bibor. Ikon ide kwar di dingon mpo tut nya ba, itas ei Ditde Ig bibindei ba, map kui Ig dima. 31 Ba, ibon nimbar hum dok Tofet ei Mbang Briep Hinom leu binhyepo indig imunggwom bat nya tut igyai noha kep hum eisi. Dicuk yok tut nibon munti dima bi ba, ningon kanti dima jo dibou ngwakti cem bi sren. 32 Gima rino tungwatu nya mijem mpia dima ninyeng Tofet kin Mbang Briep Hinom ei nidipti bu bi noro mijem ninyeng Mbang Briep Nibui Mikwau. Tungwatu nya mitig nimai ei mpia dima lewo jui dip hiter nya hagom mpung ser tu. 33 Ha nya kin mindhe-ndhe di niten-pos nya mikwei yem nimai ngut dima bingwig lewo hi di mijji yok leu bu bi. 34 Jide minu dini miluei nitta binok mpia ngoisi. Midibindei ba, yo di ingon llei bibor nya ighyet kin yo di ibit pesta niwak yamti nya ighyet hagom ntus ningwig ei minu mien Yehuda lene bidem simpak bou nya ei minu ndig Yerusalem cem.