Siceu igyon ttai minu ndig Yerusalem
6
1 Je di jintun Benyamin him e, ma jinang bijingwes ngun! Jinang leu minu ndig Yerusalem bijo! Jimiep pun mbrei ei minu ndig Tekoa. Jibuhui hum nibitto ei minu mien Bet-Kerem! Lewo jei bi ne mun di yok nisinsiou kin ninggruk biborti ei nyeti micut igkep nye kwei leu nite bei mpia nijjai ri. 2 Minu ndig Sion kei-kau-kei noro TUHAN mibindei sar hak ug. 3 Yo di inyeng jei nya migya tut ide tentara nya ba, yohok ide prak meng yati bigyon ttai minu ndig dima. Bikwop tentara nya miyohok ide prak meng ei mpia di yoni ijoi sut. 4 Nibou tentara mipai bak nide limwa nya <<Jikwei ba, itin ei mem icoi bihwen minu ndig Yerusalem! Jikwei binjei bihwen mem mpia ngket dini ug!>> Noro jei bi lene ipai biyam <<Mbenjen, ibinyen ba, mpia mmunti tu ba, dindi ug ri. Ingwes nya cem jei tu. 5 Gi kei mem injei bihwen mem mmun ba, ibindei timek minu ndig bitut tentara nibousi di igya coi nya dima cem.>>6 TUHAN Di Sindem Bibor cuk yo di inyeng jei pima yok leu binhyepo iwim biei nya ba, iroi dihyei keyam bikui sur ngug tig nidip ttai minu ndig Yerusalem. Noni pai <<Midikes hukum ei minu ndig dini dip lewo timiei nya ibon kep nico kep tungwatu nyati bijo ninno ei ninsi tu. 7 Minu ndig dini ngat ningat di kinei bijo kikau bidem kep nok minyei bousi di bindei hei minyei di hem jui kei bijo kikau. Dimiap yo di ibui yam kin yo di ipos mun leu yam nibimbiti di tibim kwei leu minu ndig dini ningkom he. Dingat lo, nibok-bati kin ninggwenti kieng kep minu ndig dini. 8 Je di timiei minu ndig Yerusalem e, suar jimiap kep mun di buhun bibor dima yok hagom nok mun di bisok kep je! Leu ma dikes jeni ei ba, dibindei minu ndig jide binok iggum ndigsi leu ba, hi di mibong ser bu bi.>>
Mben Israel yaham imbuk kep TUHAN
9 TUHAN Di Sindem Bibor pai bida <<Siceu nya mipuk Israel bingwig krebou hak dem kep nok ba anggur nghousi di ipuk ningat hagom bingwig hak leu tu. Gima rino nituti ndi jo yo dini ne ma ampu limwa niken-ken di igwam nya leu binhyepo ingwes ngun.>>
10 Lene dibuhup <<TUHAN e, suar dimbrap bit tou i? Suar disok kep tou i? Lewo ingkek ndok ba, igingig itingou mem ahyet bi. Ipa tut Ade nisok kepti di ditri tut biyok ba, ingon mpo tut cem. 11 TUHAN e, Ade nigga yokti dima tit hum ei dingonti. Nggruk mem gima doom dingonti tut a.>>
Leu api TUHAN pai bida <<Asiber ningon sibuisi dima ug ei munggwom di ingat rin ei puig ndigsi nya kin pilei di idem yam ei gom nya dip. Siceu nya mikat pinai nya kin sop nya ug ei ingkiaisi. Yo di ide njap ug ninno tu cem mingwes ngun leu bi. 12 Ide siceu nya mipos ig di ide nya bitut ide miai nya kin itnem bat nya. Midikes hukum ei timiei minu dini dip bipek nisurti-nipekti. 13 Ndigpoi nya kin munggwom nya yahagom iba ingon di sren bi biris mitiei leu yam ba, nabi nya kin imam nya cem iris mun bak ide limwa nya. 14 Yoni ingat Ditde limwa nya ibokti dima nok mun di buhun bi bipai biyok <Dwai. Hagom kei ba, jo nyahan.> Noro ningat ne nok gima bi bibor. 15 Ningat ne ma suar immai sut gi ibon mun di kinei bibor dima. Noro ingkek ndok ba, immai sut yonti kan bi. Gima rino yoni mimai nok nimbiam noyam kin nindigsi nya. Tirigi dikes hukum ei yok dip ne igyaijoti mingwig hon. Da di TUHAN disimbot dat tu.>>
Mben Israel ikou sut TUHAN nibie tut yoti
16 TUHAN pai bak Nide limwa nya <<Ma jiya hammi puig nahau yamti nya bijiyok jiyai kep mungkun. Ma jihig ser tungwatu nya tut puig gi nipou di kei bibor nya. Ma jikak puig dima leu binhyepo jibong kei jigwam kei.>>
Noro ibuhup <<E bi! Nikou sut puig dima!>> 17 Lene TUHAN ta yo di igya ser nya mbirimang mem gima iwin kep Nide limwa nya ingonti leu binhyepo imiap pun mbrei di tibim di bitto yok. Noro Nide limwa nya ibuhup <<Ningig nitingou mem bi.>>
18 Gima rino TUHAN pai <<Je di ngkiai nya e, ma jimiap kep dihyet! Suar jikan tut mun di micut igkep Ditde limwa nya. 19 Dihyei ni e, ma ayok ngon kep! Ditde limwa nya ijoi sut Ditde nipingok yokti nya bibit dihyet bi. Gima rino midiyok nisinsiou ei yokti drek dip ide niyok nihyet mem yamti nya. 20 Ide biei nggrai di igyai kwei leu minu Syeba kin biei ngat di ui-gwang kei di igyai kwei leu minu nindigsi nya cem bon ninyeng mem Da bi. Dijoi sut ide midut nya kin ide mindhe di indig ei nimbar hum dokti bi. 21 Midibindei ba, indrat ndiyok bikinoi. Pinai nya kin imunggwom bat nya kin yo di inttig-tta nya kin ide adig-ajoi nya yahagom misar bingwig.>>
Ngkiai nya di ikwei leu nite bei mpia nijjai mikon pran bit timiei minu ndig Yerusalem
22 TUHAN pai <<Mben di isindem bibor gom minjei kwei leu itimieisi ei nite bei mpia nijjai ei minu ting bibor bikon pran. 23 Itin ei ide hampiap kin tibor kin ide simeda nya tu ba, imbuk bibor. Bit bon ingon nggriu sut tungwatu nya kan bi. Ide kuda nya imbutti sindem ba, nibimbi dem kep nok muk di tti nindig bibor. Injei siceu mem gima ikon pran bit timiei minu ndig Yerusalem nya.>>
24 Tirigi timiei minu ndig Yerusalem imiap yo dima inghapti tu lene inghuisi jet bibor. Idigit tut ba, inghuisi wei noyam kin sop di sindi ninghim dut tut munggwom. 25 Ibrim ingkek mem gima igya-ya nyen kak simpak ba, yuug ei beisi bi lewo ittin tut ide siceu nya di ikrau ide minggwen ei inda him bigyai igbit igyaisi bidem puig hagom bibindei ba, timiei minu ndig Yerusalem ittin bibor.
26 TUHAN pai bak Nide limwa nya <<Ma jijuk sinsun kron ba, jirim-bijibong ei atriemti. Ma jingon ngguk bibor bijiyai nggwei kibor dem kep nok yo di ingon ngguk tut munggwom di nimig gom ngat di mai su. Lewo nibou pran di kon pran bit je mikwei kros bibindei sar je bijingwig.>>
27 TUHAN pai bak Yeremia <<Ma abingon Ditde limwa nya noyam kin gino abingon ngkimom nitu. Ma ayok ayai kep igyai munti nya! 28 Yahagom yaham imbuk kep Da ba, ingkek ndok noyam kin ngkimom-tembaga kin ngkimom nitu. Yahagom igyai munti nya mpiei bibor ba, ittei mumpui ei yamti. 29 Tong di tukan kwen ngkimom nitu eisi dut bibor noro mumpiang di srig ngkimomti jet bingwig leu bi. Dibingon Ditde limwa nya bijo ninno leu binhyepo ingon kwes noro dem tut bi. Lewo yo di imbuk bibor di isrig ikieti ijet bingwig leu yok bi. 30 Hi mipai sut Ditde limwa nya bipia inok mumpiang perak nicom ei lewo Da di TUHAN dicom yok tu.>>