Allah mibindei ba, Nide limwa nya mibindei timek ide siceu nya
26
1 Mpe dima kwei ne timiei Yehuda nya di ingat rin mipai doia dini.<<Mei, ide minu ndig dini sindem bibor! Allah Nonti rino win tentara nibousi di igyai coi nya ba, ingwes ngun eisi.
2 Jikau dimbou pmem nya leu binhyepo mben di ingon gom nya icoi ba, yo dima ne yo di igyai igbit Allah ningon kanti ri.
3 TUHAN e, ayai ningon kwes kin yamti bak yo di ingon nddong lewo iba ingon com Nani.
4 Ma jiba jingon com TUHAN bijo kikau lewo TUHAN Allah nyohou nye kikau.
5 TUHAN cut yo di ingon jei inyeng ba, bindei timek minu ndig di ide nya di bon ngug tig cem ba, nggek bisur yam kin dihyei ninjek dip. 6 Yo di yuhui mbum kin yo di igyai niwei nya mico kep nyen minu ndig dima.>>
7 Yo di ingon sren nya mimbut kak puig di sren kei lewo Na di TUHAN adime kep puig di sur yam kei mem yok.
8 Nibit Na di TUHAN Ade nikos tutti nya ba, niyok ningon mem Na. Nani ne No di nikon ninyeng kin No di nijoi sut ri.
9 Diyok dingon mem Nani mem mpia mmun. Dingonti joi sut Nani mem mpia tekti. Tirigi agwam nok nikei mem timiei dihyeisi dini lene yoni mikan igbit tut nikei nikos tutti di sren kei nya.
10 Mbro nok gino nibibon yo di isibut nok gi igbit lo, ingon dorti tut igyai munti di igbit nya bi. TUHAN e, Ade nikos tutti di sren-srau mbut sindem ei minu dini noro yo dima ibon mun di kinei ba, ibikou sut Ade nisindemti.
11 TUHAN e, atin ei mem gima akes hukum ei Ade siceu nya dip noro igikan tut bi. Nnaba gino ingat Ade ningon ngakei Ade limwa nyati bi lene ma itug ndei nimmai sut yonti bibor ug. Nnaba yoni ijjem ningwig hak tug hon hukum di atin ei mem yok tu.
12 TUHAN e, abindei ba, nyeni nibong kei nigwam kei. Mun nyeng di niyai kep nya hagom tug hon Ade midyai nya.l
13 Nibou ndig ngkiai nya inyeng tak kep nye nipou pini jug. Noro nipai brei bipia Nangkom rino nyende TUHAN Allah ba, nikon anyeng a!
14 Yo dima imai bihigom tu ba, ingwes mikiju hanyen bu bi. Lewo abindei yok bisar ba, aciu ser niyok ngon kep yokti leu tungwatu nya intin tu.
15 TUHAN e, abindei ba, Ade limwa di nyeni nimangti kum eisi binimang bibor ba, abindei nyende minu di ninyeng tak kepti bres tu. Gima rino nikon anyeng bijo anai.
16 TUHAN e, akes hukum ei nyeni dip lo, tirigi nitug hon ningkiemti lene nikiek hanyen ndam Nani ba, ningat nadi biNa.
17 TUHAN e, abindei ba, nidem kep sop di ninghim dut mem gima gwam tut nimunggwom di dahat kukwei ninghusi nyen ba, hara ninghusi di wei.
18 Nyeni nitta buhun ba, ninghuisi di wei bindei ba, nidahat kukwei ninghuisi tut noro nisrek tut mun nyeng hi bi. Nibindei timek siceu nya ba, nibikum ei timiei dihyeisi dini imangti bi.
19 Ade limwa di imai su nya migyai niyaijo hanyen ba, ingut di mai su nya mikiju hanyen. Yo di nitig yok tu nya mikiju hanyen bimbos-hi-mbos. Awin Ade limwa di imai mimbrek ngan tu nya ba, ayai niyaijo hanyen biyok noyam kin nggou di kwek dihyei ninghuisi.
TUHAN mimbus tungwatu nya ingonti bipui nihyet tut yok
20 Ditde limwa nya e, ma jicoi ug ei jide ig leu api jinggam dimbou a. Jiku je sri bibou TUHAN niggati cut leu e. 21 TUHAN mijuk kwei leu Nide gumihyep di gwam niti ei gwamti bikes hukum ei timiei dihyeisi nya dip drek dip ide sisar. Noni mimbot kep ide niyai nimai bak tungwatu niku di jo nding leu tungwatu igyai him apino mijo ei nibreisi. Dihyei miyon kep tungwatu di igyai nimai biyok tu nya bu bi.